Job 6 - Biblia Enxet

Job

^1-2 Kélyetsátegkek agkok ekyókxoho ektémakxa seklegeykegkoho ekmaso xama kelyetsáteyak,

³ yentexek katnehek, megkaxók ma'a ekweykenxal'a ekyentaxno yagkamex wátsam ekwányam. Cháxa keñamak ekyenneykencha'a nak chá'a sekpeywa.

⁴ Élyát'ak ko'o yágke apagkok ma'a Ekha nak Apyennaqte, héweyk nahan émpehek ma'a pánaqte agkok segaqhamo nak. Egkéssek ko'o Dios ekyawe agko' sélmenaye eñama m'a setnéssesakxa nak señassásegkoho.

⁵ Megkapáwha yámelyeheykok ma'a ekha enxoho pa'at, megkapáwha han weyke kennawók ekha enxoho ekto.

⁶ ¿Yaqsa awanchek katwok meyke nak yásek kélenchehe xama aqsok? ¿Atseya katnehek xama aqsok meyke nak ekpaqneyam?

⁷ Sekto kaxwók ektamhákxak ma'a mamáheyo axta atwok.

⁸ ¡Tásók la'a hegkések Dios ma'a sélmaxneya nak; tásók la'a elának ma'a aqsok sekmámenyého!

⁹ ¡Tásók la'a heyaqhápok heykxa kaxwók Dios heyaqhek!

¹⁰ Askehek sa' eykhe katnehek seklegeykegkoho, kapayhekxak sa' eyke aqsa ewáxok, hakte élyeheykekxók ko'o chá'a m'a segánamakxa apagkok nak Dios appagkanamap.

¹¹ Méko táhak sekyennaqte, mowanchek kaxwók alenxanmagkoho', kaqhok altamhok aweynchamha chá'a.

¹² Maxnawok ko'o m'a ekweykenxa nak ekyennaqte meteymog, tén han ma'a sawo ekyexwase.

¹³ Mowanchek ko'o wásenneyxkohok ahagko', méko han ma'a sepasmo enxoho.

¹⁴ Kélmók aplegeykegkoho nak, kólásekhohok chá'a, megkeyxek apyenseyam apyetleykha m'a Wesse' ekha Apyennaqte,

¹⁵ makke kéxegke hélpasmak, énámakkok, máxa m'a alwáta' ekyamayél'a.

¹⁶ Kapésamok chá'a yegmen kalpexyewenták yetlo élyetleykentamho yeyam appok;

¹⁷ massék agkok xa yeyám appok nak, kalyameygkok ma'a alwáta' nak, keñe ekmexna enxoho, keymaksek ma'a yegmen.

¹⁸ Kalyetnakhaksek nahan chá'a ámay apagkok ma'a apkelxega nak chá'a, elmeyekxak ma'a meykexa nak énxet, keñe eletsapwakxak chá'a.

¹⁹ Eltamhok eykhe elwetágwók yegmen alwáta' m'a énxet'ák apkelxega nak chá'a apkeleñama m'a Temá tén han Sabá,

²⁰ apkelwokmek agkok ma'a, kalyaqhapwomhok apkelwáxok, melwetágwomek ma'a aqsok aptegyágkaxa'.

²¹ Cháxa sélteméssesakxa nak ko'o kéxegke xa: kélwet'ak ekyentaxna setnahakxa keñe kélaka han.

²² Makke ko'o almaxnagkók xama aqsok kéxegke, maltémók nahan kólyánmagkasek selyaqye yaqwayam hélwagkasek teyp,

²³ tén han maltémo hélwagkasek teyp neyseksa apmáheyo hemok ma'a sénmexma, maltémók nahan hélyementemekxak neyseksa sema m'a élmasagcha'a nak apkeltémakxa.

²⁴ Hélxekmós sa', awanmak sa' eyke aqsa ko'o: hélxekmós aqsok magwaqhémo sélane.

²⁵ Méko kataqheksohok ma'a ektaqmalma nak sẽlpaqhetchesso; élxénaha eyke aqsa kéxegke, meykexho sektáhakxa'.

²⁶ Élxénaha eyke aqsa ekmaso kéxegke, eñama m'a sekpeywa ekyeyháxma eksómo nak éxchahayam.

²⁷ ¡Kélwanchek kéxegke kóltawasagkohok ma'a apyéheykha nak, kawomhok kélyamasma ekha ekyánmaga m'a kélmók kélagko' nak!

²⁸ Héllano ko'o kaxwo', héltennés sa' sektáha enxoho sekmowána amya'a.

²⁹ Nágkólxén chá'a m'a kélxéna exchek, nágkólteme megkapéwomo kéltémakxa; kólyekpelkoho sa' ekpayhawo xa sektáhakxa nak ko'o sekpeywa.

³⁰ ¿Sekmowána amya'a ya ko'o kélaneyk meykpelchágwokmo m'a sektáhakxa nak sekpeywa?