Job 5 - Biblia Enxet

¹ Elpáxamha Job, yaqsa sa' kexa kátegmowagkok. ¿Yaqsa sa' Dios apchásenneykha yának epasmok?

² Kaqhohok eklo apwáxok ma'a énxet ekyeyháxma nak, kaqhohok han apnathahéyak ma'a mey'áseyak nak aqsok.

³ Óthok chá'a ko'o énxet ekyeyháxma kataqmelek apha, megkawegqók eyke chá'a, yahamok eyke han chá'a kólmasséssessók ma'a apxagkok nak.

⁴ Méko han kapasmok ma'a apketchek nak; megkólpékessessók han chá'a kélteméssesakxa m'a sẽlyekpelchémókxa nak, méko han kátegmakkasagkok chá'a amya'a.

⁵ Meyk át'ák chá'a etókasek aqsok apkeneykekxa m'a ekyeyháxma nak, elmok chá'a neyseksa am'ák, elyementók chá'a aqsok apagkok ma'a apkelmopmenyého nak chá'a aqsok.

⁶ Háwe kañe' xóp ekteyapmakxa m'a ekmaso nentémakxa; háwe han ekteyapmakxa m'a nenlegeykegkoho:

⁷ énxet keñamak ekteyapmakxa m'a nenlegeykegkoho nak, ektémól'a táxa éllo kalchampa'.

⁸ Etnék agkok ko'o xa, ay'ókxak ma'a Dios, altennaksek ma'a setnamakxa nak;

⁹ ¡hakte elánhok chá'a ekxámokma aqsok élyawe éltaqmalma m'a, aqsok magmowána nak agya'asagkoho'!

¹⁰ Yáphaksek chá'a ekmámeye keso náxop, yaqwayam kalyássesagkok aqsok yókxexma;

¹¹ etnessásekxak nahan chá'a néten ma'a énxet mékoho nak, egkések chá'a meyke ektáhakxa apheykha m'a éllapwámeyak nak;

¹² etwássesha chá'a yaqwánxa enxoho etnehek ma'a énxet ekmanyehe nak chá'a ey'asagkohok yaqwánxa etnehek, megyohok chá'a katyapok aqsok apmáheyo elána'.

¹³ Yának han kápekxak chá'a aqsok apkelane m'a ekmanyehe nak chá'a ey'asagkohok yaqwánxa etnehek, megyohok chá'a katyapok aqsok ekmaso ekxeyenma apwáxok elána':

¹⁴ ¡ekhakxoho ekhem eykhe elpaknamagkok ma'a apkelmahágkaxa enxoho chá'a, chapmeyk ekyáqtésso exma, máxa axta'a temék apkelweynchámeykha!

¹⁵ Ewagkasek chá'a teyp Dios ma'a énxet meyke nak aqsok apagkok tén han kéltawáseykegkoho nepyeseksa m'a énxet'ák élmasagcha'a apkeltémakxa;

¹⁶ cham'a apkelhaxanma chá'a apkelyelqamákpoho nak ma'a, ¡cha'a apkelwanmeyáseykekxa nahan chá'a m'a élmasagcha'a nak apkeltémakxa!

¹⁷ Apkeleñémo énxet apnókáseykha nak aptáhakxa m'a Dios; ná etaqhéssesho aqsa aplegassáseykegkoho m'a Ekha nak Apyennaqte.

¹⁸ Apyensássek sa' agkok ma'a, sa' nahan epextehetchesek ma'a; apkelyekpexchetchek sa' agkok apmek, sa' han emasséssesek ekmáske m'a.

¹⁹ Megkatnégwomek sa' nahan néxa apmallahanchesso chá'a neyseksa aqsok ekmaso, megyohok sa' káhapwak ma'a aqsok ekmaso nak.

²⁰ Megyohok sa' yetsapok ekwa'a enxoho m'a meyk segaqhe nak, ewagkasek sa' nahan teyp neyseksa kempakhakma.

²¹ Emyók sa' neyseksa kéltekkessáseykha aqsa apwesey, megyekyek sa' nahan ekwa'a enxoho aqsok ekmaso ekmassésseykmoho nak aqsok.

²² Ewanyohok sa' aqsa m'a meyk, tén han aqsok ekmaso, megyekyek sa' nahan aqsok nawha'ák éllo.

²³ Megkalya'aksek sa' exma meteymog appeynchekmo enxoho xapop namyep apagkok, megkataqnókkehek sa' han ma'a aqsok nawha'ák.

²⁴ Kataqmelhok sa' apha m'a apxagkok nak, apkelanawók sa' agkok chá'a apnaqtósso, kalanaxkohok sa' aqsa chá'a ekyókxoho.

²⁵ Apxámok sa' etnehek aptawán'ák neptámen ektémól'a pa'at ma'a yókxexma nak.

²⁶ Apwányamók apagko' sa' etnehek, neyseksa ekyenneykha apyempehek sa' yetsapok, ektémól'a kamakhéthok ma'a aqsok kélcheneykekxa ekweykenxal'a kanakxaxche'.

²⁷ Cháxa ektémakxa senxekmósso aqsok negwete nak; yeyxho sa' xa sektáhakxa nak, elano sa' yaqwayam ey'asagkoho'.