Job 39 - Biblia Enxet

¹ ¿Apya'ásegkoya ekhem aptamheykegkaxa apnaqláw'ák ma'a yát'ay nápowha'ák nak? ¿Apweteyaya han aptémakxa etegkesek apketkok ma'a popyet?

² ¿Apya'ásegkoya han apwánxa pelten aptémakxa apnaqláwa?

³ Yaháxohok chá'a peya enxoho etegkesek apketkok, keñe etegkesek.

⁴ Keñe apkelyennaya enxoho, yektog ma'a yókxexma, elxog nahan meyke apkelweyktámho chá'a.

⁵ ¿Yaqsa éxeykekxa aqsa m'a yámelyeheykok nawha'ák? ¿Yaqsa eyhayo kalweynchamha?

⁶ Ko'o sekmésso chá'a yaqwánxa kallawha, cham'a meykexa nak énxet, tén han ma'a ekpayhegweykenxa nak yásek xapop.

⁷ Yámenyeyk keyxhok ma'a ekyennameykha exma nak tegma apwányam, megkalyahakxeyk han chá'a apwónchesso apmakókxa etnéssesek ma'a apchánte nak chá'a.

⁸ Kalweynchamha chá'a m'a egkexe nak kategyagkok pa'at, kategyagkok chá'a m'a pa'at éltaqmalma nak áwa' yaqwayam katawagkok.

⁹ ¿Apkenagkamcheya exchep kalyahakxohok egkések ektamheykha m'a weyke kennawók nawhak nak, tén han kayagqak aqsa axta'a m'a axagkok apkelánesso nak?

¹⁰ ¿Apwancheya ethetchesek nagyétek yámet tén han epeynchegkesek xapop, essenhan kaxog neptámen ekxák pa'at ma'a apkelchekha?

¹¹ ¿Apwancheya yásenneykxak xép ma'a eñama ekyennaqte, kalanaksek ma'a aptamheykha?

¹² ¿Apkeneykeya yepwának yásennaha yaqwayam kaneyxchesek aqsok apkeneykekxa, yaqwayam enxoho kánchessásekxak aqsok aktek kalsantagkasek ma'a kélchexakkassamakxa nak chá'a émpe'ék?

¹³ Elano xápen: elyeykesha chá'a apxempenák yátsaha, máxa katnehek ekha enxoho apxempenák ektémól'a seyána',

¹⁴ enegkenek chá'a appok neyseksa yagkamex, yaqwayam enxoho kalméxenchesek kaltátchesek ma'a ekhem.

¹⁵ Megkaxének apwáxok kólpáxqatchesek, essenhan kalteyammok xama aqsok nawhak.

¹⁶ Eltaqnaweygkok han ma'a apketkók nak, máxa megkatnaha apketkók etnehek, megkeytnakhók apwáxok etnehek eyaqhémo aptamheykha.

¹⁷ Megkéssok apmopwána aqsok; tén han ektaqmalma élchetámeykha apwáxok.

¹⁸ Apkempákxeyk agkok néten ma'a, keñe yenyehek, yesmaksek ma'a yátnáxeg tén han apha nak apkapok.

¹⁹ ¿Xépya apmésso apyennaqte m'a yátnáxeg, tén han apnegkenchesso apyespok ma'a áwa' apyespok?

²⁰ ¿Xépya apnextegkesso chá'a néten aptémól'a sawa', élyegwakkassamól'a énxet ma'a ekpáweykha apwéhek ekyennaqte?

²¹ Yetlo apyennaqtésso apyempehek chá'a emetmok ma'a ekpayhegweykenxa xapop, ektamagkok han chá'a kempakhakma meyke apkeye.

²² Ewanyohok han ma'a aqsok segyegwakkassamo nak, megkeygwakkase', megkayélaqtéssesek apwáxok ma'a sókwenaqte,

²³ kalaqtáwak eykhe yágke axanák apagkok ma'a apkelchánte nak yátnáxeg, kalápogwátek eykhe chá'a katyégwakxak mók ma'a sawhéwa, tén han ma'a héwa.

²⁴ Apmeyhek nahan yenyehek, ñohók chá'a emmok ma'a apmahágkaxa enxoho; kapáwak chá'a kélaqkahasso, keñe mopwanchek chá'a elánegwok apyáqto.

²⁵ Epáwak chá'a yátegmowágkok ma'a kélaqkahasso; makhawók chá'a etekhánek kempakhakma, eñohok han ma'a kélpeywa kéltémo nak kólchetamagkok kempakhakma, tén han kélpáxameykha.

²⁶ ¿Xépya apkeltámésso émpé meyke ahekhek, eñama apmopwána agko' aqsok, tén han apkeltémo kamhagkok kampak ma'a ekpayho nak nepyeyam?

²⁷ ¿Xépya han apkeltémo kalának axagkok náta ekyawe m'a netnók agko' nak?

²⁸ Yáqtegkek chá'a ekhem tén han axta'a m'a élyawakxa nak meteymog, keláneyak axagkok ma'a ekmahantegweykenxa nak meteymog.

²⁹ Kalanha chá'a ekyógkexma m'a ekyáqtamakxa nak néten, keyxánegkesek chá'a.

³⁰ Éma chá'a kalagkok ma'a étkók, kalyagqak chá'a m'a ekhágkaxa enxoho kélhapák.