Job 38 - Biblia Enxet

Dios apchátegmowéyak Job

¹ Keñe axta Wesse' egegkok appaqhetchesa Job neyseksa éxchahayam ekyennaqte.

Wesse' egegkok

² Mopwanchek xép metnéssesek naqso' ma'a ektémakxa nak sekya'áseykegkoho aqsok, hakte appaqméteykha aqsa chá'a exchep meyke apya'áseyak.

³ Hexekmós kaxwók apteme apyennaqte, yátegmowák sa' se'e aqsok sélmaxneyeykha:

⁴ ¿Háxko axta aphakxa exchep séláneya axta ko'o s'e náxop? ¡Héltennés sa' apya'ásegkoho enxoho naqso'!

⁵ ¿Apya'ásegkoya han ekxeyenma ekwánxa katnehek ekyawe? ¿Yaqsa axta énxet apkelyetsátéyák?

⁶ ¿Yaqsa axta aqsok kélpekkenma m'a awhak nak? ¿Yaqsa axta énegkessesso meteymog yaqwayam kólteyeksek,

⁷ neyseksa apkelmeneykmasso yaw'a apkelánteyapmól'a axto'o, neyseksa élpayheykekxa apkelwáxok yetlo apkelwónchesso m'a sélásenneykha apheykha nak néten?

⁸ ¿Yaqsa axta eyápeykekxa átog yaqwayam keyxnegwók sekxók axta ekteyapma wátsam ekwányam ma'a kañe' xapop?

⁹ Ekméssegkek axta ko'o yaphope yaqwayam katnehek ektaxno, keñe ekyáqtésso exma ektaháno.

¹⁰ Ekpekkenchessegkek axta han ko'o néxa m'a wátsam ekwányam, eyáhakkáseykekxeyk axta han átog agkok m'a ketchessama átog.

¹¹ Axta ektemék seyenagkama s'e: “Sa' katnehek néxa s'e, megkamallánek sa'; sa' kalnextog élyaqyahayam élyawe agkok se'e.”

¹² ¿Apkeltémoya chá'a exchep katyapok ekhem, essenhan kalsék chá'a neyseksa apha?

¹³ ¿Apkeltémoya han chá'a kasawhekxohok élseyéxma ekyókxoho keso náxop, keñe elyexanmok chá'a m'a élmasagcha'a nak apkeltémakxa?

¹⁴ Keñe agwethok ma'a ektémakxa xapop, máxa katnehek ma'a kéltaxno kélyexwássessól'a;

¹⁵ melxawagkehek élseyéxma m'a énxet'ák élmasagcha'a nak apkeltémakxa', katwássesha chá'a apmáheyo elanagkok apkeltémakxa ekmaso.

¹⁶ ¿Apmeheykegkeya m'a kañók agko' nak wátsam ekwányam éñamakxa nak ekteyapmakxa yegmen?

¹⁷ ¿Apweteyaya han ekheykegkaxa m'a atña'ák ekyáqtéssamakxa exma apkelmaheykegkaxa nak apkeletsapma?

¹⁸ ¿Apya'ásegkoya ekwánxa ekpayhakxa m'a náxop? ¡Héltennés sa' apya'ásegko enxoho ekyókxoho!

¹⁹ ¿Apya'ásegkoya han kélpekkenmakxa m'a élseyéxma tén han ekyáqtessóxma?

²⁰ ¿Apwancheya elya'aksek ekweykmoho m'a néxa xapop nak keñe elya'ásenták makham ma'a ekheykegkaxa nak?

²¹ ¡Katnehek mey'áseyak hakte apwányamók aptáhak, aphegkek axta exchep ma'a amonye' axta élánamáxche'!

²² ¿Apweykmeya han ma'a seknegkenmakxa nak yeyam appok tén han yegmen élyennaqte

²³ seyáphassamól'a chá'a ko'o ekwa'a enxoho ekhem ekmaso, tén han kempakhakma?

²⁴ ¿Apya'ásegkoya exchep élmaheykegkaxa élxega enxoho m'a élseyéxma? ¿Apya'ásegkoya ektémakxa kalxog éxchahayam eñama nak ekteyapmakxa ekhem, kalmahagkok ekyókxoho nak keso nélwanmeygkaxa?

²⁵ ¿Yaqsa ekyagqaxqatchesso chá'a ekteyapmakxa m'a ekmámeye, tén han éltennasso chá'a yaqwánxa kamhagkok éxchahayam ekyennaqte,

²⁶ yaqwayam enxoho kammék ma'a ekyamáyekxa nak exma, meykexa nak ekha,

²⁷ yaqwayam enxoho kayássesek ma'a xapop ekyaqhapmókxa nak exma, keñe kaltektekkásekxak ma'a pa'at?

²⁸ ¿Yaqsa yáp ma'a ekmámeye tén han yálye?

²⁹ ¿Yaqsa egken ma'a yeyam appok, tén han ma'a apmópeyak nak?

³⁰ ¿Yaqsa ekyennaqteyáseykekxa chá'a yegmen ektémól'a meteymog, tén han ekyennaqteyáseykekxa chá'a m'a néten nak wátsam ekwányam?

³¹ ¿Xépya apyepetcháseykekxa mók ma'a Élántépeyam nak, keñe han apkexpánchesso apheykegkaxa m'a yaw'a apkelyawe Orión?

³² ¿Xépya chá'a aptekkesso ekwokmo enxoho chá'a apteyapmakxa axto'ók ma'a yaw'a apwányam? ¿Xépya apnaqlo chá'a m'a yaw'a Osa Mayor tén han Osa Menor?

³³ ¿Apya'ásegkoya exchep ektémakxa nenláneykha m'a néten? ¿Apwancheya exchep xa etnehek apkeláneykha s'e náxop nak?

³⁴ ¿Apwancheya exchep ey'aksek appeywa néten yaphope yának káhakkasek yegmen ekyawe?

³⁵ Apcháphássek agkok takha' yának emhagkok mók nekha, ¿etneheya sa' yátegmowagkok se'e: “Keso ko'o s'e, alyahakxohok sa' aptáhakxa seyáneya?”

³⁶ ¿Yaqsa élmésso élya'áseykegkoho aqsok ma'a náta, cham'a kesseyána', tén han tat'a kennawo'?

³⁷ ¿Yaqsa ekyetna ekmowána agko' aqsok yaqwayam kay'asagkohok ekwánxa m'a yaphope? ¿Yaqsa awanchek kalyegkenek yaqwayam enxoho kamme',

³⁸ yaqwayam enxoho katnekxak yelpa' m'a xapop, keñe keypetchekxak mók?

³⁹ ¿Xépya aptegyáseykha chá'a ekyógkexma m'a méwa, yaqwayam enxoho katawagkok chá'a m'a étkók nak ekwokmoho élyaqkanakmo,

⁴⁰ cham'a élyexanma enxoho chá'a m'a élyáqtamakxa nak, essenhan élyexanmeyncha'a enxoho m'a neyseksa ekmompánaqma?

⁴¹ ¿Yaqsa éléyak chá'a apto m'a máma, apkelweynchámeyncha'a enxoho chá'a etegyagkok aptéyak ma'a apketkók nak, apkelpáweyncha'a enxoho chá'a hélmaxneyha?