Job 37 - Biblia Enxet

¹ Ekwet'ak agkok chá'a éxchahayam ekyennaqte, katayha chá'a egkenyek, máxa katnehek ma'a ekmako enxoho kanextog.

² Kóleyxho éxtegyawà Dios appeywa, éxtegyawà ekteyapma nak apátog.

³ Esawheyásekxohok chá'a apkelyenma m'a néten, kawakxohok ma'a ektemegwánxa nak néxa xapop.

⁴ Keñe natámen kañexchek éxtegyawà aplegasa enxoho appeywa éxtegyawà eyeymáxkoho nak; megkamassegwomek chá'a apkelyenma m'a neyseksa eklegamaxche éxtegyawà nak.

⁵ Kextegyókek agkok appeywa m'a Dios, katekkesek ma'a aqsok élyawe nak; cham'a magmowána nak agya'asagkoho'.

⁶ Yának han chá'a etyamok yeyam appok se'e náxop nak, yának han chá'a kammék ekyennaqte agko'.

⁷ Yának nahan exmakha aqsa apxanák ma'a énxet, yának han chá'a elyekpelkohok apyókxoho ektáha chá'a apkelane aqsok ma'a.

⁸ Kalántaxnegwakxak nahan chá'a axanák meteymog áxwa m'a aqsok nawha'ák nak, kaxnagwakxak nahan kalyexanmok ma'a.

⁹ Nepyeyam chá'a kañék ma'a éxchahayam ekyennaqte, keñe nexcheyha m'a apmopsamáge nak.

¹⁰ Yeyam appok chá'a katekkesek ma'a Dios apkennama, keñe keynnákxak chá'a m'a yegmen ekyawe nak.

¹¹ Elyetmok chá'a yegmen ma'a yaphope nak, etekkesek han chá'a apkelyenma m'a;

¹² kaltaqhahagkok chá'a apkelyenma m'a néten, kalának ma'a apkeltamhókxa enxoho kalának Dios ekyókxoho keso náxop.

¹³ Cháxa apchásenneykekxa chá'a Dios yaqwayam ellegássesagkohok énxet'ák xa, essenhan yaqwayam exekmósek chá'a ektaqmeleykha apwáxok elano'.

¹⁴ Job, ná epekhésap aqsa, yeyxho sa', kalchetagkasha sa' apwáxok ma'a aqsok éltaqmalma apkelane Dios.

¹⁵ ¿Apya'ásegkóya exchep aptémakxa Dios apkeláneya xa ekyókxoho nak, tén han aptémakxa aptekkessama chá'a apkelyenma m'a neyseksa nak yaphope?

¹⁶ ¿Apya'ásegkóya exchep ektémakxa élchampeykencha'a yaphope m'a néten, senxekmóssama Dios apmopwána elának aqsok?

¹⁷ Elméxenchessesek chá'a exchep apyempehek apkelnaqta apkexchahakmo enxoho yeyam, élwónegkoho enxoho exma'.

¹⁸ ¿Apwancheya exchep epasmok Dios appékesso néten, tén han énnaqtések ektémól'a sawo éláxñe?

¹⁹ Hẽlxekmós hana negko'o eyéméxchexa antéhek agának Dios, hakte magya'ásegkok negko'o yaqwánxa antéhek nempeywa.

²⁰ Maltamhók nahan ko'óxa almaxnak yaqwayam alpaqhetchesaxkoho', hakte máxa katnehek séltamho enxoho hemasséssók.

²¹ Mogwanchek agwetak élsassóxma ekhem eyapa enxoho m'a yaphope; keñe éxchahakmo enxoho, káxñekxak néten.

²² Katyapok cha'a élyenmomo agko' ma'a ekpayho nak nexcheyha, apwakhesákpo enxoho ektémakxa apcheymákpoho Dios.

²³ Mogwanchek agya'asagkohok ma'a Ekha nak Apyennaqte, apmeyhók apagko' ma'a, appéwomo nahan; péwók nahan aptémakxa, metnéssesek han apyeykhamap pók elanok énxet'ák.

²⁴ Cháxa keñamak apkeláya nak énxet'ák; melanók chá'a m'a apkenagko nak chá'a etnahágkok apkelya'áseykegkoho apagko' aqsok.