Job 36 - Biblia Enxet

Ektáhakxa cuatro appeywa Elihú

^1-2 Ná epekhés aqsa, alxekmósek sa', yetneyk makham yaqwayam axének eñama appeywa m'a Dios.

³ Amha sa' ko'o ektémakxa nak ekyawe agko' sekya'áseykegkoho, yaqwayam sa' axekmósek ekpayhawo aptémakxa m'a aptáha nak Senlane.

⁴ Maltennaksek sa' ko'o exchep ma'a amya'a megkamámnaqsoho nak; apheyk nápaqtók xép apya'áseykegkoho apagko' nak aqsok, naqsók xa sektáhakxa nak.

⁵ Apmeyhók apagko' ma'a Dios apwanchek apagko' han aqsok, metaqnókkehek ma'a énxet meyke nak aptémakxa.

⁶ Megyohók eyke chá'a eweynchamha m'a ekmaso nak aptémakxa, elánekxéshok eyke chá'a amya'a m'a meyke nak aptémakxa;

⁷ eltaqmelchesek chá'a m'a énxet'ák apkelpéwomo nak; memasséssemek han chá'a apteméssesso apkelwesse'e apkelwányam, néten chá'a etnéssesagkok.

⁸ Keñe m'a kélpextete nak chá'a cadena, éllegassáseykegkoho nak chá'a m'a ekmáske,

⁹ Dios apxekmósso aqsok ekmaso apkeláneyak, eñama apkelyetleykekxa éleymáxkoho apkelwáxok.

¹⁰ Apkelpaqhetchesso yaqwayam elánekxések apkeltémakxa, keñe han yának elwátesagkok apkeltémakxa ekmaso.

¹¹ Apkelyahákxók agkok xa tén han apkelmeyásekpo enxoho, káhapwak ekyawe agko' apkelátseykha tén han élpayheykekxa apkelwáxok aphágkaxa nak makham.

¹² Agkok elyahákxa', eletsapok exnagwók kañe' takhaxpop, melya'ásegwánxa nak makham.

¹³ Apkellamchek apagko' ma'a élmasagcha'a nak apkeltémakxa, metegyaha han ekpasmo m'a apkelmákpo enxoho.

¹⁴ Aptáhakxoho apketkók chá'a eletsapok; elmassegwók chá'a ektémól'a m'a énxet'ák apkeláneykegkoho nak nentémakxa mansexta.

¹⁵ Ewagkasek chá'a teyp Dios aplegeykegkoho, yásenneykxak ma'a nenlegeykegkoho nak; ey'assásegwók chá'a yásenneykxak ma'a aplegeykegkoho.

¹⁶ Apwagkassegkek xépxa teyp neyseksa m'a aqsok ekmaso, apxámássessegkek ma'a aqsok apagkok, meyke kélya'ásekha exma; apxámássessegkek nento éltaqmalma m'a mésa apagkok.

¹⁷ Keñe kaxwók kéllegassásegkoho ektémól'a m'a ekmaso nak aptémakxa, mopwanchek nahan megyohok kólyekpelkoho', tén han kólxének yaqwánxa kólteméssesek.

¹⁸ Yáwho sa', ná ema aqsa exkak selyaqye yaqwayam mexének ma'a ektemégweykmoho exma, nágyoho aqsa kamok apwáxok selyaqye ekwányam.

¹⁹ Megkapasmehek apkelpáxameykha, tén han apyennaqte m'a ektémakxa nak ekyentaxno apha.

²⁰ Nágkapekhes chá'a kayáqtések, apmassegwokmo enxoho chá'a énxet'ák.

²¹ Elanagkoho sa' aptáhakxa yaqwayam melánekxeyk aqsok ekmaso, hakte aplegeykegkók xép eñama aptémakxa ekmaso.

²² Elano ektémakxa nak ekyawe apmopwána Dios. Méko xama enxoho sẽlxekmósso aghésho';

²³ méko xama énxet apwanchek eltennaksek eyeyméxchexa elána', tén han exénchásekxohok aptémakxa eyesagko aptáhakxa'.

²⁴ Apyókxoho énxet elxénmakha ektaqmela m'a aqsok apkelane; kaxén xépxa apwáxok eyéméxko elteméssesek éltaqmalma.

²⁵ Apyókxoho énxet han apwanchek elweta', makhawók eykhe katnehek.

²⁶ Apwányam apagko' ma'a Dios, mogwanchek agya'asagkohok aptémakxa; mogwanchek nahan ólyetsetchesagkok apyeyam apagkok.

²⁷ Cha'a apkelyeta chá'a yegmen élsekkenma m'a apyátamakxa nak chá'a, keñe etnessásekxak chá'a ekmámeye.

²⁸ Kayegkenek chá'a ekmámeye m'a yaphope, kapálwaták chá'a ekyawe agko' nepyeseksa m'a énxet'ák.

²⁹ ¿Yaqsa ekya'áseykegkoho? ¿Yaqsa ektéma élxegama chá'a m'a yaphope? ¿Yaqsa ektéma appáweykencha'a chá'a takha' m'a néten?

³⁰ Apsawheyáseykekxók Dios apkelyenma m'a wátsam ekwányam, keñe apchapma m'a kañók agko' nak wátsam ekwányam.

³¹ Cháxa aptémakxa apkeleykegko aptéyak ma'a énxet'ák, tén han apkelmeyáseykegko ekxámokma agko'.

³² Emagkok chá'a apkelyenma, keñe yaqhaksohok chá'a etyamok ma'a apkeltamhókxa enxoho.

³³ Exének chá'a takha' apkexyekmo m'a Dios, hẽltennaksek chá'a aplawa m'a éxchahayam ekyennaqte nak.