Job 34 - Biblia Enxet

Ektáhakxa ánet appeywa Elihú

^1-2 Kéxegke kélya'áseykegkoho nak aqsok tén han kélxekmowásamaxche nak, kóleyxho sa' sekpeywa.

³ Egheykok ekteme ekyekpelchémo amya'a, ekhawo ektémakxa nak ekyekpelchémo ekmátsa m'a empaqpehek.

⁴ Anlanok hana negko'óxa xa aqsok nak, keñe sa' agya'asagkohok ma'a ektaqmelakxa enxoho.

⁵ Axta aptemék chá'a Job se'e: “Méko sektémakxa ko'o, makke emáheyók hélánekxések amya'a m'a Dios.

⁶ Sekmowána amya'a ko'o atnehek sekxéna enxoho sekteme seksexnánémaxche'; megkaltaqmelweykmok sélyense, malaneyk eykhe m'a may'assáxma.”

⁷ ¡Méko xama énxet aphawo m'a Job! Ewanyaha chá'a Dios, aptémól'a ének yegmen xama énxet;

⁸ atsek epaxqaha m'a élmasagcha'a nak apkeltémakxa, elyetlawha chá'a m'a énxet'ák melya'assáxma.

⁹ Exének chá'a énxet méko kataksek epeykessásekxak apwáxok ma'a Dios.

¹⁰ Kéxegke kélya'áseykegkoho nak aqsok, kóleyxho sa' sekpeywa. ¡Nágkaxén kélwáxok Dios ekha nak Apyennaqte, apkeláneya chá'a m'a aqsok ekmaso tén han megkapayhémo chá'a aptémakxa'!

¹¹ Eyaqmagkásekxohok eyke chá'a ektémakxa aqsok apkelane xama énxet ma'a; etnéssesek chá'a m'a ekpayhawo nak chá'a etnéssesek.

¹² Naqsók melanyek xama aqsok ekmaso m'a Dios ekha nak Apyennaqte, tén han ma'a aqsok megkapéwomo nak;

¹³ ¿Yaqsa ekmésso apmopwána Dios apkeláneykha keso náxop? ¿Yaqsa éltémo elanha ekyókxoho keso nélwanmégkaxa'?

^14-15 Apkelyementamákxeyk agkok apkelennama m'a énxet'ák élméssama nak apkelyennaqte, eletsapok apyókxoho, xapop makham etnahagkokxa'.

¹⁶ Naqsók sa' agkok apya'áseykegkoho aqsok, heyeyxho sa'; etaqmelchesho sa' apháxenmo sekpeywa.

¹⁷ Naqsók agkok aptaqnagko Dios ekpéwomo nentémakxa', mopwanchek etnehek apkeláneykha énxet'ák. ¡Mopwanchek xép exének eyesagko aptáhakxa m'a ekpéwomo agko' nak aptémakxa!

¹⁸ Aptamhágkek agkok chá'a élmasagcha'a apkeltémakxa m'a kelwesse'e apkelwányam tén han ma'a ekha kéláyo nak, yahamók chá'a elxénchásekxohok apkeltémakxa m'a Dios.

¹⁹ Mepasmekxeyk ma'a apkeltaqmelchesso nak apchókxa, metnéssesek apyeykhamap pók elanok ma'a ekxámokma nak aqsok apagkok tén han ma'a meyke nak aqsok apagkok, hakte cha'a apkelane apyókxoho m'a.

²⁰ Katlakkasek chá'a eletsapok ma'a énxet'ák, axta'a eysekso'; elyegweyk chá'a énxet'ák keñe emassegwók; kólmasséssók chá'a m'a énxet ekha nak kéláyo, meyke kélásenneykxa m'a énxet.

²¹ Dios apkeláneykha chá'a ektémakxa apxega énxet, apya'ásegkok ekyókxoho apmahágkaxa enxoho chá'a.

²² Méko ekyáqtésso exma ekyentaxno agko' awanchek kakpósek ma'a ekmaso nak aptémakxa'.

²³ Mepekkenchessók Dios ekhem énxet yaqwayam emyekxak ma'a aphakxa nak yaqwayam ékpelkoho'.

²⁴ Metegyaha amya'a yaqwayam elántekkesek ma'a ekha nak kéláyo, yaqwayam elyaqmagkasek pók.

²⁵ Apya'ásegkok Dios ma'a aqsok apkeláneyak, yáqtéssek agkok, elántekkesek chá'a etnessásekxak mékoho.

²⁶ Elyekpexchetagkok chá'a ektémól'a élmasagcha'a apkeltémakxa, nápaqta'awók ma'a apyókxoho énxet'ák,

²⁷ hakte mopmenyeyk elyahakxohok ma'a apkeltémókxa nak chá'a etnahagkok, mopmenyeyk elmok takha'.

²⁸ Apwagkassessegkek élpayheykha apatña'ák meyke nak aqsok apagkok ma'a aphakxa nak Dios, tén han ektémakxa nak apnaqtawáseykegkoho, aplegayak han ma'a Dios.

²⁹ Apwanmakkek agkok ma'a Dios, ¡méko awanchek kaxének megkapayhawo aptáhakxa'! Agkok eltamhok éteyakpok, ¿yaqsa awanchek kóta'? Cha'a apkeláneykha chá'a apkelókxa m'a tén han ma'a énxet'ák

³⁰ yaqwayam enxoho metnehek apkeláneykha énxet'ák ma'a ekmaso nak aptémakxa, apkelyexancháseykha nak chá'a apnámakkok.

³¹ Aptemegkeya exchep apkenagkama Dios se'e: “Eyhayók ko'o sélyexancháseykencha'a; malánekxók sa' chá'a may'assáxma.

³² Hexekmós ko'o aqsok magwaqhémo mataya nak. Asagkek sa' agkok ko'o aqsok sélane, malánekxók sa' chá'a”.

³³ ¿Egkéseya exchep ekyánmaga Dios, cham'a apkeltamhókxa enxoho elána', neyseksa aptaqnagko? Xép sa' eyke ey'asagkoho', háwe ko'o, hẽltennés sa' ma'a apya'ásegkaxa enxoho.

³⁴ Sa' etnehek ko'o heyának énxet'ák apkelya'áseykegkoho nak aqsok, keñe han apmopwancha'a aqsok, apkelháxenmo nak sekpeywa:

³⁵ “Appaqmeyesmeyk aqsa mey'áseyak ma'a Job; méko aqsok ekxeyenma m'a appeywa.

³⁶ ¡Tásek sa' kóllanok aptémakxa nak appeywa m'a Job, hakte énxet ekmaso aptémakxa apchátegmowéyak ma'a aptémakxa nak!

³⁷ Háwe wánxa apteme mey'assáxma m'a Job, apkenmexeykekxeyk han ma'a Dios; negaqta'awók han negko'o apwanyémók ma'a Dios tén han apkelátegmómakpo.”