Job 33 - Biblia Enxet

¹ Job, yeyxho sa' sekpeywa; etaqmelchesho sa' apháxenmo sekmako nak atnehek wána'.

² Ekpenchessek ko'o yaqwánxa atnehek wátegmowagkok:

³ apaqmétek sa' ko'o meyke sekyexamaxkoho, apékeshok sa' sekxeyenma ektáhakxa élchetamso ewáxok.

⁴ Dios ekha Apyennaqte axta ko'o sélane, egkéssegkek axta sekyennaqte apkennama.

⁵ Heyátegmowák sa' apkepwagko enxoho; elánekxa sa' aptáhakxa yaqwayam heyátegmowagkok.

⁶ Neghawók egmók nápaqto' Dios, xeyep tén han ko'o; yelpa' ko'óxa eñamak sélánamáxche'.

⁷ Kaqhok ko'o heyé', matnessásekxeyk kóneg.

⁸ Ekleg'ak axta ko'o exchep appaqmeta, (keso aptáhakxa axta s'e):

⁹ “Cháxña'awók ko'o sektémakxa, méko han sektémakxa, méko han aqsok magwaqhémo, tén han may'assáxma.

¹⁰ Aptegyeykha eyke aptémakxa apmáheyo hesexnenak ma'a Dios, máxa apkenmexma etnéssessók;

¹¹ apnaqtehetmeyk han cadena s'e emagkok, apkeláneykha han ma'a ektémakxa chá'a sekweynchámeykha.”

¹² Megkapayhawok xépxa aptémakxa nak appeywa, hakte apwányam apagko' ma'a Dios, mexnawok énxet.

¹³ ¿Yaqsa ektéma appehésseykmo exchep Dios apxeyenma megyátegmoweykegko m'a ektémakxa aqsok megkaleklo egwáxok?

¹⁴ Xámok aptémakxa hempaqhetchesek ma'a Dios magyekpelchehek eyke.

¹⁵ Apwanchek hempaqhetchesek axta'a, tén han negwanmagko essenhan aqsok senxekmósso, cham'a apnaqtena enxoho chá'a énxet, ekyentaxnawo agko' enxoho chá'a apnaqteyenma.

¹⁶ Ketók apeykok chá'a elpaqhetchesek Dios ma'a énxet'ák; elxénchásekxohok chá'a apkeltémakxa, keñe elyegweyk chá'a,

¹⁷ yaqwayam enxoho elwátéssesagkok apkeláneyak aqsok ekmaso, keñe han yeksek etnahágkok éleymáxkoho apkelwáxok.

¹⁸ Keñe elmallahanchesek chá'a m'a takhaxpop nak, elwagkasek chá'a teyp megyohok eletsapok.

¹⁹ Negmasse han chá'a yahak Dios ma'a énxet, elánekxések aptémakxa, yetlo ekmáske agko' apyempehek.

²⁰ Etaqnók han chá'a m'a ekyókxoho nento, tén han ma'a élmátsa nak.

²¹ Kataqmelchesagkohok émhowa', kalántépok apexchakkok.

²² Ketók katnehek aptaxnamakxa takhaxpop, ketók katnehek apketsapmakxa'.

²³ Apheyk agkok xama Dios apchásenneykha ketók ma'a, exének han xama m'a apkeñama nak nepyeseksa m'a mil Dios apkelásenneykha, exének aptáha ekpéwomo aptémakxa,

²⁴ kapyóshok han elano' keñe etnehek yának Dios se'e: “Ewagkas teyp, nágyoho yetsapok, ekwet'ak ko'o yaqwánxa atnehek awagkasek teyp”,

²⁵ keytlawhok han ekyenneykekxa apyempehek, máxa apketkok makham etnekxa'.

²⁶ Ewónmakha sa' Dios yának epasmok, yátegmowagkok sa' han; kapayhekxak agko' sa' han apwáxok étak ma'a Dios, ellegaksek sa' énxet'ák ektaqmeleykha apwáxok henlanok ma'a Dios.

²⁷ Sa' etnehek se'e: “Éláneyak ko'o may'assáxma, éláneyak han ma'a megkapayhawo nak antéhek, makke emáheyók heñássesagkohok ma'a Dios;

²⁸ ewagkassegkek teyp meltémo watsapok, ekweynchámeykha makham ma'a élsakókxa exma.”

²⁹ Cháxa apteméssessamakxa chá'a énxet ma'a Dios;

³⁰ elwagkasek chá'a teyp megyánhek yetsapok, elenxánegkesho aqsa chá'a apweynchámeykha élsakókxa exma'.

³¹ Job, yeyxho sa' sekpeywa, etaqmelchesho sa' apháxenmo; ewanma sa' aqsa sekpaqmeta enxoho.

³² Yetneyk sa' agkok aqsok yaqwayam héltennaksek, heyátegmowák sa'; naqsók sa' agkok aptáhakxa, kalkohok sa' ewáxok ekpayhawo aptáhakxa';

³³ sa' agkok kapayhawo', ewanma sa' aqsa yeyxhok sekpeywa, alxekmósek sa' ko'o exchep nentémakxa negya'áseyak aqsok.