Job 31 - Biblia Enxet

¹ Ewáxok ahagko' axta ko'o ekxeyenmak megkatsepek chá'a egkenyek alanok kelán'a étkok.

² ¿Yaqsa ekyánmaga egkések ekha nak Apyennaqte énxet ma'a aphakxa nak néten?

³ ¿Háweya élmasagcha'a nak apkeltémakxa apagkok ma'a ekmaso nak apheykha, tén han ma'a melya'assáxma nak?

⁴ ¿Enxeykel'a eteyk Dios ma'a aqsok séláneya nak? ¿Enxeykel'a eteyk ektémakxa nak sekxega?

⁵ Naqsók eyke ko'o maláneya aqsok yetlo ekmaso élchetamso ewáxok, maltémók nahan alyexanchesha xama énxet.

⁶ ¡Dios sa' ko'o hélyetsetagkok kelyetsáteyak megkamenyexma nak, keñe sa' ey'asagkohok sektáha ko'o meyke sektémakxa!

⁷ Ekyetnakhágwokmek sa' agkok ko'o m'a ámay ekpéwomo nak, sey'awo enxoho kamok ewáxok étsapeykha egkenyek, ekwetáxko enxoho sekmeykha m'a aqsok megkatnaha nak ahagkok,

⁸ pók énxet sa' etwok ma'a aqsok séneykekxa nak, elpátekkesek sa' han.

⁹ Ey'awók sa' agkok ko'o hélának xama kelán'a, essenhan sélteyanyáncha'a enxoho alanha aptáwa' m'a apha nak ketók exagkok,

¹⁰ pók énxet sa' etnehek apchásenneykha naqsa m'a etáwa' nak, pók énxet'ák sa' han epathetagkok.

¹¹ Hakte asagkók agko' sa' katnehek ma'a aqsok sélane; megkatnehek sa' mehellegassáseykegkoho.

¹² Kaxhok sa' ma'a ektémól'a táxa eyáléwe ekmassésseykmohol'a aqsok, kasawhohok sa' aqsok ahagkok.

¹³ Ey'aweykteyk axta agkok ko'o chá'a séláneykha héltennássetak aqsok megkaleklo apwáxok, alánekxések axta chá'a ko'o.

¹⁴ Agkok ko'o atnahak xa, ¿háxko atnehek ko'o amyekxak nápaqto' Dios? ¿Háxko atnehek ko'o wátegmowagkok sélyetsetchásekxoho enxoho sektémakxa?

¹⁵ Dios aqsa senlane kañe' méme egagkok awáxok, apkelméssegkek apkelyennaqte m'a, ekhawo nahan ko'óxa.

¹⁶ Axta alwátesseykmok chá'a ko'o sekpasmo eyéméxchexa enxoho m'a énxet meyke nak aqsok apagkok. Axta han wahayók kalnápok meyk ma'a kelán'a xentampe'e nak.

¹⁷ Axta atók chá'a ko'o sekto exakko', apasmok axta chá'a sekto m'a élyeheykha nak.

¹⁸ Máxa yáp axta ko'o ekteméssessók ma'a élyeheykha nak; séltaqmelchesso axta ektemék chá'a m'a xentampe'e nak.

¹⁹ Ekwet'ak axta agkok chá'a ko'o xama énxet meyke agko' nak apáwa, essenhan han meyke enxoho yaqwayam yaqlakpok ma'a meyke nak aqsok apagkok,

²⁰ almésagkok axta chá'a apáwa apkelánamap nak apwa' m'a nepkések seknaqtósso, keñe axta hegkések chá'a ekpayheykekxa apkelwáxok.

²¹ Axta ko'o eynnaqtéssók chá'a sekpeywa xama enxoho alának ma'a apkelyéheykha nak, wásenneykxak ma'a sélxegexma'a énxet'ák segyekpelchémo nak.

²² Háwe agkok naqsók xa sektáhakxa nak sekpeywa, hélekkexchesek sa' ahaktegák; hélhaxyawássesek sa' nahan awhók ahaktegák.

²³ Hakte eyáyak ko'o Dios senlegassáseykegkoho; ¡mowanchek alenmaxaxkohok nápaqtók ma'a wesse' ekha nak apcheymákpoho!

²⁴ Magwáyok chá'a ko'o xama enxoho m'a sawo ekyátekto ekmomnáwa, yaqwayam enxoho hetaqmelchessesek sekha.

²⁵ Mehepeykessáseykekxak ewáxok ma'a ekxámokma aqsok ahagkok, tén han sekxámáseyak ma'a selyaqye ahagkok.

²⁶ Ekweteyak chá'a ko'o kalsaksek exma ekhem, tén han apxega pelten yetlo apchápogwate aptaqmalma,

²⁷ makke eyxamaxkohok alpeykeshok xama enxoho, malya'ássessók han néten emék.

²⁸ Ektemék agkok xa, payhawók héllegássesagkoho'; ¡máxa sektaqnagko atnehek ma'a Dios apha nak néten!

²⁹ Megkapayheykekxak chá'a ko'o ewáxok katnégwomhok exma m'a sélenmexma nak, megkapayhekxeyk han chá'a ewáxok eyáhapwa'a enxoho ekmaso apha.

³⁰ Maltémók han ko'o katnégwomhok exma ekmaso xama enxoho, maltémók han yetsapok.

³¹ Peyk agkok han chá'a etwasagkohok xama énxet'ák ahagkok ma'a énxet apkeñama mók nekha,

³² magwohok chá'a etyenek aqsa axta'a m'a ámay. Almok axta chá'a ko'o takha' alhéssók exagkok ma'a apkelxega nak chá'a.

³³ Makpóssók nahan chá'a xama enxoho m'a aqsok magwaqhémo, aptamheykegko nak chá'a m'a pók énxet'ák, mamáheyók han akpósek

³⁴ eñama seyeye hexének énxet'ák. Maxmak nahan xama enxoho kañe' awanma', eñama seyeye hewanyaha m'a énámakkok.

³⁵ ¡Yeyxho annal'a sekpeywa xama énxet! ¡Sekwesey chá'a ko'o apekkenek sektáhakxa enxoho chá'a sekpeywa; heyátegmowagkok sa' kaxwók ma'a ekha nak Apyennaqte! Tásek kanaqtáxésaxchek ma'a aqsok sélpehésseyam nak chá'a ko'o sélane,

³⁶ asawha sa' chá'a ko'o yetlo meyke ektáhakxa ewáxok; watchásekxak sa' épátek ektémól'a nélháxaqxo.

³⁷ Altennaksek sa' ko'o Dios ekyókxoho m'a aqsok sélane nak, atnegwók sa' nápaqtók meyke sekháxaheykha.

³⁸ Mehexeyenmak han ko'o ekmaso m'a xapop ahagkok nak, megkalekxagweykha han ma'a xapop sekpeyncheyam.

³⁹ Élmenyexchessek agkok ko'o aqsok apagkok énxet ekwetasso nak xapop, essenhan seknaqtawásegkoho enxoho m'a énxet'ák apkeltamheykha nak namyep,

⁴⁰ ¡katyapok sa' menóke xapop ahagkok, keñe sa' hótáhap metyepe', katyapok sa' pa'at ekmaso, keñe sa' apho nak hótáhap metyepe'! Cháxa néxa axta appeywa Job apxeyenma aptémakxa'.