Job 30 - Biblia Enxet

¹ Keñe s'e kaxwo' nak sésmésa m'a wokma'ák, maxnawo nak ko'o, cham'a magwahayo axta ko'o etnehek apkelxegexma apyapmeyk ma'a semheg séláneseykha axta seknaqtósso nepkések.

² Chaqhémok axta chá'a ko'o sélásenneykencha'a m'a, massegkek axta apkelyennaqte

³ eñama meyk élnapma tén han meyke aqsok. Eltakxaha axta chá'a aqsok egkepmenák élyamaye axta'a m'a meykexa nak énxet;

⁴ elpátekkesek axta chá'a pa'at ekmáske m'a ekmompagqaxa nak, weykmók axta aptéyak ma'a yámet egkepmenák.

⁵ Énxet'ák apkeltaqnómap axta m'a, kélmenxeneykha yetlo kélpáxegkáseykha, aptémól'a apkelmenyexma;

⁶ apheykha axta aqsa m'a meteymog áxwa nak, tén han élmayhamakxa nak xapop, keñe han neyseksa nak meteymog élyawe;

⁷ apkellekxagweykha axta aqsa neyseksa ekmompánaqma, aptaháneykekxeyk axta pók kóneg yenta'a étkók.

⁸ Énxet mékoho axta m'a, kélyekpexcheteykegkek axta kélántekkessama apchókxa'.

⁹ Keñe kaxwók sey'ássekmo ko'o, sésmésamaxche' etnéssessók.

¹⁰ Megkalchehek agko' chá'a apwáxok hélano' keñe elmahagkok chá'a makhawo', yexpaqhak chá'a apkelyamánog nahát.

¹¹ Keñe kaxwo' Dios setnéssesa mékoho, ekmassa kaxwók seyekawo.

¹² Ektámeykmek sekhakxa apxámokma apagko', eyaqnegkessegkek apmáheyo heyaqhek.

¹³ Eyáhakkáseykekxeyk ámay ahagkok yaqwayam enxoho hemasséssók, méko han élnókáseykencha'a.

¹⁴ Máxa kélyagqaxqatmal'a nápakha tegma kélhaxtegkesso aptemék sektámeykmo, yetlo éxtegyawà ekyennaqte.

¹⁵ Eyáhapwayak ko'o sekyegwakto; máxa éxchayaham temék ekxegama m'a ekha séláyo; máxa yaphope temék ekxegama m'a ektaqmalma sekha.

¹⁶ Mómenyeyk ko'o kaxwók alenxanmagkohok sekweynchámeykha; emomchek ko'o m'a seklegeykegkoho.

¹⁷ Weykmók élántaxno exchakkok ma'a ekmáske; megkayetyapwágweykmok señassáseykegkoho axta'a.

¹⁸ Apyaqhapmeyk ko'o eyespok ma'a Dios, apkelpaxnexcheykha ekyennaqte agko' ma'a sélnaqta.

¹⁹ Eyámasmeyk neyseksa yelpa', máxa xapop ánek ektemék, tén han táhap.

²⁰ Oh Dios, altamhok chá'a ko'o exchep hepasmok, keñe meheyátegmowagke', awónmakha chá'a, keñe mehélyahakxe'.

²¹ Asagkek ko'o setnéssessamakxa exchep, eyaqmáseykha yetlo apmopwána.

²² Apchahayók xép heswok éxchahayam, apchahayók seyawheyáseykencha'a éxchahayam ekyennaqte.

²³ Ekya'ásegkók ko'o exchep apmáheyo héntamok ma'a nétsapmakxa nak, kéltaqmelchessessamakxa nak apyókxoho m'a meletsapma nak.

²⁴ ¿Ya axta chá'a ko'o apasmók ma'a meyke nak aqsok apagkok? ¿Ya axta alwagkassók teyp neyseksa ekmaso apheykha?

²⁵ ¿Ya axta alekxagweykha chá'a ko'o sélányo m'a apkellegeykegkoho nak? ¿Ya axta kalmopyósak chá'a ko'o sélányo m'a ekha nak chá'a eyeyméxchexa aqsok?

²⁶ Élhaxanmeyk axta ko'o kapayhekxak ewáxok, keñe seyáhapwaya m'a ekyaqhápeykha ewáxok; élhaxanmeyk axta kawak élseyéxma, keñe seyáhapwaya ekyaqtessóxma.

²⁷ Malánegweykmok ektémakxa ewáxok; wánxa aqsa ekmáheyo hey'áwak ma'a ekyentaxno sekha.

²⁸ Ekweynchámeykha axta ekyaqhápeykha ewáxok, meyke sélsássesso exma m'a ekhem; atnamha chá'a apmonye'e apyókxoho énxet'ák altamhok hepasmok.

²⁹ Máxa sélxegexma'a ektemék ma'a semheg nawha'ák, tén han xápen.

³⁰ Ekpésyam tamheykekxak émpehek, meyesmeyk sekyókxa eñama ekmexanma émpehek.

³¹ Sélekxagweykha tamheykekxak sekháxenmo m'a arpa appáwà nak, keñe yámámok ekpáwà ektamheykegko sélapwayam.