Job 3 - Biblia Enxet

Job appaqméteykha eñama aplegeykegkoho ekyentaxno

^1-2 Nanók axta temék appaqméteyncha'a Job, apxénáncha'a ekmaso m'a sekxók axta aptéyeykmo.

Job

³ ¡Kamaskoho annaxtal'a m'a axta'a sekxók axta sélánexko kañe' méme awáxok! ¡Kamaskoho annaxtal'a m'a ekhem sekxók axta sektéyeykmo!

⁴ ¡Katnekxoho axtal'a ekyáqtessóxma xa ekhem nak, megkaxének axta nahan apwáxok Dios, tásók axtal'a megkalsakyehe'!

⁵ ¡Tásók axtal'a kápok pessesse yaqwayam kayáqtéssesek exma, essenhan kápok yaphope ekpésyam, essenhan kaspónak ekhem keygwakkasek!

⁶ ¡Katnoho annaxtal'a aqsa ekyáqtessóxma xa axta'a nak, keñe axta megkólyetsetagkehek chá'a ekhem, pelten ma'a apyeyam!

⁷ ¡Tásók axtal'a katnehek megkate étche kelán'a xa axta'a nak, méko axta katnehek kélwehéseykha kélátseykha!

⁸ ¡Tásók axtal'a yónek elxénmakha ekmaso apkelyohóxma xa ekhem nak, apkelásenneykha nak chá'a m'a Leviatán, cham'a yéwa ekwányam!

⁹ ¡Tásók axtal'a melápogwatagkek yaw'a m'a amonye' élseye axta, megkatyepek axta han ma'a ekhem élhaxnamáxko nak, megkóteyaxchek axta han ekyexwáseyam ma'a ekhem axto'o!

¹⁰ ¡Ekmaso agko' sa' katnehek ma'a axta'a seyhayo axta sektéyeykmo, setasa nak ekmaso sekha!

¹¹ ¡Yaqsak kexa ektéma magwatsapma axta m'a kañe' méme awáxok, essenhan ma'a sektéyámxoho axta!

¹² ¡Yaqsa axta ex'a ektéma sexnéssama awáxok méme tén han seyeykegko neme agkok!

¹³ Kaxtemék axta ko'o sétsapma, ataqmelcheshok axta aqsa sekteyenma allókasek sekyampe meyke ektáhakxa,

¹⁴ yetlo m'a kelwesse'e apkelwányam tén han apkeláneykha apkeltémo axta kóllánésagkok tegma apkelyawe apkeltaqmalma,

¹⁵ essenhan ma'a kelwesse'e apxámaseykekxo nak sawo ekyátekto élmomnáwa m'a apxanák apkeltaqmalma nak, tén han ma'a sawo ekmope élmomnáwa nak.

¹⁶ Tásók axtal'a kólyexaxkohok hélátawanyek ektémól'a sakcha'a eyaqhél'a egken awáxok, ektémól'a sakcha'a étsapmal'a amonye' ektéyam.

¹⁷ Takhaxpop ekmassegweykemxa apkeláneyak aqsok ekmaso m'a énxet'ák élmasagcha'a nak apkeltémakxa, keñe m'a apkelyampayo nak, elwetágwók chá'a m'a apkellókassamakxa apkelyampe;

¹⁸ cham'a apkelwetágweykenxa han meyke ektáhakxa apheykha m'a apkelmomap nak, kamaskok ellegak apkelpáxegkáseykha ekyennaqte m'a apkemha apmonye' apagkok;

¹⁹ cham'a apheykegkaxa han ma'a ekha nak kéláyo tén han ma'a meyke nak kéláyo, meyke apyeykhamap pók, cham'a ekmassegweykemxa han apchásenneykha wesse' apagkok ma'a apchásenneykha naqsa nak.

²⁰ ¡Yaqsa ektéma Dios apchahayo nak apweynchámeykencha'a m'a ekha nak aplegeykegkoho, yaqsa ektéma apméssama nak chá'a apweynchámeykha m'a ekyaqhápeykha agko' nak chá'a apwáxok,

²¹ apkelhaxanma nak chá'a yetsapok, makke yetsapmak, aptegyeykha apagko' nak chá'a, megkaxnawo nak ekwánxa aptegyeykha m'a aqsok ekmomnáwa ekpowásamáxche'!

²² Wánxa chá'a kapayhekxak apwáxok énxet aptaxna enxoho takhaxpop.

²³ Eweynchegkesha chá'a Dios meyke apya'áseyak apmahágkaxa, eláhakkasagkok chá'a apmonye' apmahágkaxa enxoho chá'a.

²⁴ Sélekxagweykha tamheykekxak ma'a sekto nak; seklegeykegkoho ekmáske tamheykekxak ma'a sekya nak.

²⁵ Eyáhapwayak ko'o m'a ekyókxoho aqsok, cham'a seyáyo ahagko' axta eykhe hetnehek.

²⁶ Méko séllókasseyam sekyampe, méko sektaqmelchessamo sekha; mateyk meyke ektáhakxa sekha, wánxa aqsa m'a ekmaso sekha.