Job 28 - Biblia Enxet

Kélxéneykha ektaqmalma negya'áseykegkoho aqsok

¹ Yetneyk kélhexyawassamakxa nak chá'a sawo ekmope ekmomnáwa, tén han kélaxñáseykekxexa nak sawo ekyátekto ekmomnáwa.

² Kañe' xapop chá'a kólhaxyawaksek ma'a sawo élyentaxno nak, keñe kélhánekxo enxoho chá'a m'a meteymog nak, katyapok chá'a cobre.

³ Yápogwatchesek chá'a énxet ma'a ekyáqtéssamakxa nak exma: elántexek chá'a m'a kañók agko' nak, keñe etegyagkok chá'a meteymog ma'a ekyáqtésakxa nak exma.

⁴ Epexyewenták chá'a emagkok táma', emetmok chá'a m'a meykexa nak énxet, melmeheykegkaxa nak chá'a énxet, makhawo' nak ma'a tegma apkelyawe.

⁵ Etyapok han hótáhap ma'a néten xapop nak, keñe m'a kóneg nak, élpaqteyapma táxa.

⁶ Cha'a ekheykegkaxa han meteymog élyápaqmate m'a, tén han sawo ekyátekto ekmomnáwa élpaxqamáxche m'a xapop.

⁷ Megkaték nahan xama enxoho meyke ahekhek, tén han máma xa ámay nak.

⁸ Megkalyeykhágweykmok nahan xama enxoho aqsok nawha'ák éllo m'a, megkalpéwomok han ma'a yámakméwa.

⁹ Apkelpáxqatmeyk meteymog ma'a énxet, apkelpátekkessegkek ma'a meteymog élekhahéyak nak.

¹⁰ Apkelmetamchek ma'a meteymog nak, apkelweteyak ma'a mók ektémakxa nak chá'a aqsok élmomnáwa.

¹¹ Apkelányok ma'a éleñamakxa nak chá'a wátsam, apkelántekkessegkek yókxexma m'a aqsok élpowásamáxche nak.

¹² ¿Háxko eyke éñamakxa m'a negya'áseykegkoho nak aqsok? ¿Háxko ekyetnamakxa m'a negmowána nak aqsok?

¹³ Mey'ásegkok ekwánxa ekmomnáwa énxet xa, métyehek han se'e apheykegkaxa nak énxet'ák.

¹⁴ Katnehek chá'a wátsam ekwányam se'e: “Méko s'e”, keñe han ma'a wátsam ekwányam ekmattawóneg nak katnehek chá'a s'e: “Méko ko'o m'a.”

¹⁵ Mogwanchek agyánmagkasek ma'a sawo ekyátekto ekmomnáwa, mogwanchek nahan agmok agyánmagkasek sawo ekmope ekmomnáwa nak.

¹⁶ Mogwanchek agyánmagkasek ma'a sawo ekyátekto ektaqmalma agko' nak, tén han ma'a aqsok étkók élánamáxche nak meteymog, essenhan meteymog ekyápaqmate nak.

¹⁷ Mogwanchek aghéshok ma'a sawo ekyátekto ekmomnáwa, tén han sokpésyam ekmomnáwa nak; mogwanchek agyaqmagkásekxak ma'a aqsok élánamáxche nak sawo ekyátekto ekmomnáwa.

¹⁸ Tásók agko' ma'a negya'áseyak nak aqsok, kaxnók ma'a meteymog ekmope nak, tén han ma'a meteymog élyenméyak nak, tén han ma'a meteymog élpexpope nak.

¹⁹ Megkaxnawok han ma'a meteymog yáma ekyátekto éleñama nak Etiopía, mogwanchek han agyánmagkasek ma'a sawo ekyátekto ekmomnáwa agko' nak.

²⁰ ¿Háxko eyke éñamakxa m'a negya'áseykegkoho nak aqsok? ¿Háxko ekyetnamakxa m'a negmowána nak aqsok?

²¹ Heykegkok ma'a megkalweteykxa nak aqsok nawha'ák éllo, tén han megkalweteykxa nak ma'a náta élchampeykha nak néten.

²² Weykmók han ektéma chá'a élanagkama ekmassésseykmoho nak aqsok tén han nétsapma s'e: “Nenlege aqsa chá'a negya'áseykegkoho'.”

²³ Dios aqsa apya'ásegkok ekyetnamakxa m'a negya'áseyak; wánxa apwanchek éteyekxak ma'a,

²⁴ hakte weykmók apwete m'a néxa xóp nak, keñe han ekyókxoho aqsok ekhéyak nak náxop kóneg yaphope.

²⁵ Xama axta apwet'a Dios ekwánxa ekyennaqte m'a éxchahayam, appekkenchessek axta ekwánxa ekxega néxa yegmen,

²⁶ xama axta appekkenchesa apkeltémókxa katnehek ma'a ekmámeye, apkeltennassegkek axta yaqweykenxa kapéwhok chá'a m'a éxchahayam ekyennaqte,

²⁷ keñe axta apkelano han ma'a negya'áseykegkoho nak aqsok, appekkenchessek axta ekwánxa ekmomnáwa ekyánmaga, apkelanók axta ektémakxa, keñe appekkena.

²⁸ Keñe axta Dios aptáha apkeláneya énxet'ák: “Nágkólyensem chá'a kélyetleykha Wesse' egegkok: cháxa negya'áseykegkoho aqsok xa; negyamasma aqsok ekmaso: cháxa ekha negmowána aqsok xa.”