Job 23 - Biblia Enxet

Job

^1-2 Makhemek ko'o makham sekpaqméteykha seklegeykegkoho ekmáske, eñassáseykegkók ko'o m'a Dios apmopwána nak.

³ ¡Ay'asagkoho annal'a ko'o ekpayhókxa óta', tén han yaqwánxa atnehek ammok ma'a aphakxa nak!

⁴ Altennaksek nahan nápaqtók ma'a setnamakxa nak, hakte xámok agko' aqsok yaqwayam axének.

⁵ ¡Ay'asagkohok han yaqwánxa atnehek wátegmowagkok ma'a ektáhakxa enxoho chá'a seyátegmowéyak!

⁶ Yeyxhok sa' ko'o sektáhakxa sekpeywa m'a, ménnaqtések sa' appeywa hélána', memha sa' ma'a ektémakxa nak ekha apmopwána

⁷ ey'asagkohok sa' ekpayhawo sektáhakxa'; hexének sa' sekteme meyke sektémakxa, ¡elwataksohok apagko' sa' han apteme sékpelchémo!

⁸ Ekmahágkek axta ekteyapmakxa ekhem sétama Dios, méko axta eyke m'a; ekmeyákxeyk axta sétama m'a taxnegwánxa ekhem, axta óteyákxa'.

⁹ Keñe sekmeyákxo makham nexcheyha, axta han ót'ak ma'a; ekmeyákxeyk axta han nepyeyam, méko axta han ma'a.

¹⁰ Apya'ásegkok ekyókxoho ektémakxa sekxega ko'o m'a; apkelanawók agkok sektémakxa, étak sa' eyáxña'awo agko' sektémakxa ektémól'a sawo ekyátekto ekmomnáwa.

¹¹ Ekyetlamchek chá'a ko'o meyke sekyetnakhágwayam ma'a ámay séltennassamakxa nak chá'a.

¹² Éláneyak chá'a ko'o m'a segánamakxa apagkok nak, tén han apchánamakxa nak antéhek, malaneyk ma'a sekmámenyého ahagko' nak.

¹³ Peyk agkok elának xama aqsok ma'a, elának nahan; méko awanchek kayaqmagkassesek ma'a yaqwánxa etnehek.

¹⁴ Cham'a apmakókxa enxoho chá'a hetnéssesek, hetnéssesek nahan, yetlo m'a ekyókxoho aqsok apmáheyo nak chá'a etnéssesek xa ektáha nak.

¹⁵ Cháxa keñamak seyáya nak ko'o m'a; xénchek agkok chá'a ko'o ewáxok ma'a, keytlawhok chá'a seyeye.

¹⁶ Eyélaqtéssessegkek ko'o ewáxok ma'a Dios, ekha nak Apyennaqte.

¹⁷ ¡Hexyánegkesho annal'a axta'a, keñe heyápok ekyáqtessóxma!