Job 22 - Biblia Enxet

Ektáhakxa ántánxo apkelpaqhetchásamap Elifaz

^1-2 ¿Apkenagkamcheya exchep etnehek apchásenneykekxa Dios énxet, megkeyxek ma'a apmopwána apagko' nak aqsok?

³ ¿Epeykessásekxaya exchep apwáxok ekha nak Apyennaqte etnehek ekpéwomo aptémakxa'? ¿Egkéseya exchep aqsok etnehek ektaqmalma aptémakxa'?

⁴ Ektaqmalma apyetleykhaya exchep keñamak aplegassásegkoho, meyenyaweykhaya keñamak apmáheyo ékpelkohok aptémakxa',

⁵ ekxámokma aptémakxa ekmaso keñamak, méko néxa apkelane mey'assáxma.

⁶ Meykexho eyeyméxchexa chá'a exchep aqsok elmaxnak ekyaqmageykekxa aqsok apkelmassáseykha m'a apkelyáxeg'a; elyementók chá'a m'a apkelnaqta nak, meyke apáw'ák chá'a etnéssesagkok.

⁷ Axta eleykegkok chá'a exchep yegmen ma'a hem át'ák nak; axta eleykegkok han chá'a aptéyak ma'a meyk át'ák nak.

⁸ ¡Apkenagkamchek axta exchep etnék apagkok se'e náxop nak, hakte apmeyhek axta, ekha kéláyo axta han!

⁹ Eláphaksek axta aqsa chá'a meyke apkelmésso aqsok ma'a xentampe'e nak, apnaqtawáseykegkók axta m'a élyeheykha.

¹⁰ Cháxa keñamak ekwakha'a nak kaxwók xép ekmaso apha, katlakkasek chá'a égwe'.

¹¹ Chapmeyk ekyáqtésso exma, mopwanchek étak xama aqsok enxoho; chapmeyk yegmen ekyawe.

¹² Apheyk Dios ma'a netnók agko' nak néten; apheykegkek kóneg apmagkok ma'a yaw'a aphéyak nak netnók agko'.

^13-14 Apxeyenmeyk xép méteya m'a Dios, apxeyenmeyk ektawassáseykencha'a apmáheyo ékpelkohok ma'a yaphope ekyentaxno nak, mopwanchek xép exének méteya m'a Dios, hakte apweynchámeykha m'a néten nak.

¹⁵ ¿Péya étlók aqsa exchep ma'a ámay ekyaqtéssamakxa nak exma, apkelyetlamakxa nak chá'a m'a élmasagcha'a apkeltémakxa?

¹⁶ Yahamók axta apkeletsapma m'a, ektémól'a kalsók aqsok ma'a wátsam.

¹⁷ Axta etnehek chá'a yának Dios se'e: “¡Ná hẽlye'és exma'! ¡Mopwanchek negko'o hempasmok ma'a ekha nak Apyennaqte!”

¹⁸ (Akke apxámássesso aqsok apagkok ma'a apxanák nak, ¡Megkalxegkáseykha ko'o katnehek élchetamso ewáxok ektémakxa nak ma'a élmasagcha'a nak apkeltémakxa!)

¹⁹ Apkelwet'ak agkok chá'a élpéwomo nak apkeltémakxa xa, kalpayhekxak chá'a apkelwáxok; ellektegmaha chá'a meyke nak apkeltémakxa

²⁰ apkelwet'a enxoho kalwatnek táxa aqsok apagkok ma'a élmasagcha'a nak apkeltémakxa.

²¹ Yásekhekxoho makham Dios, keñe sa' kataqmelekxak makham apha.

²² Yoho elxekmósek ma'a, epekken apwáxok ma'a appeywa nak.

²³ Apya'aweykxeyk sa' agkok makham yetlo meyke eyeymáxkoho apwáxok ma'a ekha nak Apyennaqte, apmasséssekmo enxoho aqsok ekmaso m'a apxagkok nak,

²⁴ apteméssesa enxoho máxa xapop ánek ma'a sawo ekyátekto ekmomnáwa agko' nak, apteméssesa enxoho m'a ektémól'a meteymog ekhéyak nak alwáta',

²⁵ tén sa' etnehek sawo ekyátekto ekmomnáwa apagkok ma'a ekha nak Apyennaqte, tén han sawo ekmope ekmomnáwa ekxámokma apagkok.

²⁶ Sa' epeykessásekxak xép apwáxok ma'a, tén sa' memegqáyhek chá'a elano'.

²⁷ Apkelmaxnakkek sa' agkok chá'a aqsok, yeyxhok sa' chá'a apkelmaxnagko, elának sa' nahan chá'a exchep ma'a apkeltennasso nak elána'.

²⁸ Tásek sa' chá'a katnehek ekteyapma ekyókxoho aqsok apkelanakxa enxoho; kaltátchesek sa' chá'a élseyéxma m'a apmahágkaxa enxoho.

²⁹ Hakte mékoho chá'a etnessásekxak Dios ma'a apcheymákpoho nak, ewagkasek chá'a teyp ma'a meyke nak eyeymáxkoho apwáxok.

³⁰ Sa' emallahanchesek xép ma'a aptáha enxoho meyke aptémakxa, méko enxoho aqsok ekmaso apkelane.