Job 20 - Biblia Enxet

Sofar

^1-2 Mehey'assásegkok sektáhakxa, appekhéssek ewáxok; cháxa keñamak sekmako nak wátegmowagkok.

³ Megkalchak ewáxok sekleg'a sexéneykha ekmaso, ekya'ásegkók eyke yaqwánxa atnehek wátegmowagkok.

⁴ Apya'ásegkok eyke exchep ektéma chá'a xa ektáha nak, eyeynmo m'a sekxók axta apteyapma énxet keso náxop:

⁵ yaqwátawók chá'a katnehek ekpayheykekxa apwáxok ma'a ekmaso nak aptémakxa; yaqwatakxoho m'a apchátseykha nak.

⁶ Megkeyxek apteme apwenaqte apagko', ekhawo nak ma'a néten, kawomhok eykhe apqátek ma'a yaphope,

⁷ máxa aqsok ekteyáseykha sa' eyke etnehek emassegwók, melya'asagkehek sa' nahan apmahágkaxa m'a apkelxegexma'a.

⁸ Máxa negwanmagko sa' etnehek emassegwók, ektémól'a aqsok negwetél'a axta'a, megkólwetekxók sa' chá'a.

⁹ Melwetekxók sa' chá'a m'a aptamheykencha'awo axta chá'a apkelxegexma'a, tén han apkelweteya axta.

¹⁰ Elmeyásekxak sa' han apketchek aqsok apkelmenyexchesso axta m'a meyke nak aqsok apagkok.

¹¹ Ekyennákxoho apyempehek sa' étnók kañe' takhaxpop, tén han aptáhakxoho apketkok.

¹² Atsók agko' chá'a elanok ma'a aqsok ekmaso, epetsesmakha chá'a ektémól'a antók aqsok ekmátsa;

¹³ enegkenek chá'a ekmátsa apwáxok, etaqmelcheshok chá'a éttelegwasha apwáxok,

¹⁴ keñe ekhagwokmo enxoho kañe' apwáxok, katnekxak yéwa pánaqte agkok segaqhamól'a.

¹⁵ Eyekxagkok chá'a m'a aqsok ekxámokma apkelmenaqsapma axta; elhaxyawássesek chá'a Dios ma'a kañe' apwokmo nak.

¹⁶ Apyamchek ma'a yéwa pánaqte agkok nak, kaqhek sa' han xa pánaqte nak.

¹⁷ Métyehek sa' ma'a weyke nagkeygmenek ekyawe nak, tén han yányawhéna' apyegmenek, ényahama nak ektémól'a kanyehek yegmen.

¹⁸ Ekxeykxak sa' makham ma'a ekyókxoho ekyánmaga apwete axta; melmaha sa' ma'a aqsok apagkok nak, metwehek sa' han.

¹⁹ Apnaqtawáseykegkok ma'a meyke nak aqsok apagkok, apkexeykekxeyk aqsa meyke appasmo; apkelmomchek ma'a tegma megkatnahakxoho apkelane.

²⁰ Megkatnégweykmok néxa ekmámenyého apwáxok aqsok, méko aqsok apcháyam apmopmenyého;

²¹ ekyókxoho aqsok axta chá'a elmok. Cháxa keñamak peya sa' megkawegqók ekpayheykekxa apwáxok.

²² Xámok agko' sa' eykhe katnehek aqsok apagkok, megkapayhekxeyk sa' eyke chá'a apwáxok; kápekxak sa' ma'a ektémakxa nak ekmaso apkeltémakxa m'a élmasagcha'a nak apkeltémakxa.

²³ Apkelenxanakmek sa' agkok elanaksek apwokmo, Dios sa' yahak aplo: yáhakkasseták sa' aplo.

²⁴ Kegketchek sa' agkok ma'a sókwenaqte, yágke sa' kathanyekxa' élánamáxche nak sawo ekyexwase.

²⁵ Kamallánek sa' kayaqxák ma'a yágke, keyphagwakxak sa' naw'a aphekhek nak. Awanhek sa' katnehek apkeye;

²⁶ kápok sa' ekyáqtessóxma. Kamasséssók sa' ma'a táxa eyáléweykekxa agko' nak, ekweykekxoho m'a ekyókxoho ekheykha nak apxagkok.

²⁷ Néten sa' katnehek ekpekkencháseykekxa yáxña'akxoho m'a aptémakxa mey'assáxma, kampekxak sa' néten xapop yaqwayam kaxének aptémakxa'.

²⁸ Cháhapwa'ak sa' agkok ma'a Dios aplo, kamassegwók sa' ekyókxoho aqsok apagkok.

²⁹ Cháxa appagkanchessama nak Dios etnéssesek ma'a ekmaso nak aptémakxa; cháxa apmáheyókxa nak etnéssesek xa.