Job 19 - Biblia Enxet

Job

^1-2 ¿Háxko ekwánxa kólwátessók séllegassáseykegkoho ewáxok, tén han sélyenheykha kélpeywa?

³ Megkamassegweykmok sexéneykha ekmaso; ¿yagkólmegkaqtók sélteméssessama xa ektáha nak?

⁴ Naqsók sa' agkok ko'o sektáha seksexnánémaxche', ko'o sa' aqsa han heyápekxak xa sektémakxa nak.

⁵ Kélanagkamcheya kéxegke kataqmelak kéltémakxa', kaxnók ko'o, nahaqtók ko'o élxénak sekteme seksexnánémaxche'.

⁶ Kólya'asagkoho aptáha ko'o señassáseykegkoho m'a Dios, cham'a apkeltémo han hemok ko'o m'a kelhanma nak.

⁷ Ektáhak agkok ko'o sélpáxaméncha'a s'e: “¡Peyk amátog!” méko heyátegmowagkok; éltamhók agkok nahan hélpasmok, méko han hélánekxések amya'a.

⁸ Apchápeykxeyk ámay ahagkok Dios yaqwayam enxoho ko'o mayeykhe'; ekyáqtessóxma aptemessásekxak ma'a ámay ahagkok nak.

⁹ Élyementamákxeyk ma'a aqsok ahagkok; émentamákxeyk nahan ma'a ektémakxa axta sekteme ekha séláyo.

¹⁰ Máxa keñamak sektámeyam ekwokmoho semasséssekmo; ¡máxa yámet kélpátekkesso aptemessásak ma'a sélhaxanma nak!

¹¹ Etaqnagkamók apagko' ko'o m'a, máxa sénmexma aptemék.

¹² Eyhayak ko'o m'a sẽlpextétamo apagkok; apkelpakxeneykegkek nepyáwa exagkok sewakhaya, apkelánegkokxeyk han aptamhágkaxa yaqwayam hektámegmak ko'o.

¹³ Dios apkeltémo ko'o heyenyók ma'a élyáxeg'a tén han énámakkok, tén han hetnéssesek máxa séñama mók nekha.

^14-15 Eyenyókek ko'o m'a énámakkok ahagko' nak, tén han sélxegexma'a; massék élxéna apkelwáxok ko'o m'a apheykha nak exagkok. Máxa séñama mók nekha etnéssessók ma'a séláneykha kelwán'ák nak; massék sey'ásegkoho.

¹⁶ Ekwóneyha agkok chá'a xama seyásenneykha, meheyátegmowagkehe', megkeyxek séltémo hey'óta', mehey'óte'.

¹⁷ Ekyepetchegwákxók agkok etáwa', hetaqnók chá'a; weykmók ko'o megkaleklo agko' apwáxok hélanok ma'a étchek.

¹⁸ Weykmók nahan sewanyémo m'a sakcha'a; keytlawhok chá'a sexéneykha ekmaso sekxatakha'a enxoho.

¹⁹ Etaqnagkamchek ma'a sélxegexma'a ahancha'awo' nak; énmexeykekxeyk ma'a sélásekhayókxa nak chá'a ko'o.

²⁰ Kelánteyepmeyk exchakkok, xegkessamók maweynchamha chá'a.

²¹ Kéxegke sélxegexma'a nak, kapyósho héllanok ko'o, eñassáseykegkók ko'o m'a Dios apmopwána nak.

²² ¿Yaqsa ektéma sélyaqmáseykencha'a nak ko'o kéxegke, aptémól'a m'a Dios? ¿Yaqsa ektáha megkólwátesagko nak séllegassáseykegkoho?

²³ ¡Émenye' nak la'a etaxaksek sekpeywa xama énxet, keñe epekkenekxak aptáxésso xama weykcha'áhak!

²⁴ ¡Émenye' nak la'a elqahaksek xama énxet yáma énmaga aktek ekpayhe emha m'a táxésso élánamáxche nak sawo, essenhan meteymog, yaqwayam enxoho megkamassegwome'!

²⁵ Ekya'ásegkók ko'o apha m'a Semasma, yaqwayam heyátegmakkasagkok amya'a keso náxop.

²⁶ Kapallamok sa' eykhe émpehek, ko'o ahagko' sa' eyke ótak ma'a Dios.

²⁷ Ahaqta'ák ahagko' sa' óta', ko'o ahagko' sa', háwe m'a pók énxet. Ekyelqáxcheyk ko'o

²⁸ sekleg'a kéltáha kélpeywa s'e: “¿Háxko antéhek negko'o agyaqmasha? Apkelane apagko' ma'a aqsok ekmaso.”

²⁹ Eyke kóláwho m'a sókwenaqte, apmeykencha'awo nak chá'a Dios eñássesagkohok aqsok ekmaso. Kólya'asagkoho apha xama segyekpelchémo.