Job 14 - Biblia Enxet

¹ Yaqwátawok negha negko'o s'e náxop nak, xámok agko' ektémakxa ekyentaxno negha, nélyelqáxko', eyeynamo m'a sekxók axta nempalleykmo.

² Máxa m'a ektémól'a pánaqte exnók kaxwe élánteyapmal'a, keñe kalyameygkok; neghawók ma'a ektémól'a pessesse kaxog keñe kamassegwók.

³ ¿Keya apkeláneykencha'a nak chá'a exchep xa aptéma nak énxet, tén han apmáheyo nak chá'a ékpelkohok aptémakxa?

⁴ Yawanchek kamópekxak ma'a aqsok ekmanyása nak.

⁵ Xeyep chá'a apxeyenma ekwánxa ekhem apweynchámeykha énxet, appekkenchessegkek han néxa apweynchámeykha megkamopwána eyeykha',

⁶ elwatés apkeláneykha, wánxa etne apkelya'assóxma'; ¡yoho aqsa eweynchamha aptémól'a m'a énxet ekha nak aptamheykha kélyánmagkasso!

⁷ Kélyaqténchek agkok xama yámet, yetneyk makham yaqwayam kaltektépekxa', megkameykehek chá'a kaxwe ekteyapma áwa'.

⁸ Apák eykhe katnehek ma'a kepmenák nak, kakpelchexchek eykhe kañe' xapop ma'a awhak nak,

⁹ yássessek agkok yegmen, axnagko' katnekxa'; kalxog aktegák, ektémól'a aqsok kaxwe kélcheneykekxa'.

¹⁰ Keñe énxet apketsapa enxoho, emassegwók; méko nahan kay'asagkohok apmahágkaxa.

¹¹ Awanchek chá'a keymek yegmen ma'a wátsam ekwányam, kalyameygkok chá'a m'a wátsam étkók nak;

¹² metyepek sa' kañe' takhaxpop énxet ekhakxa nak makham néten, mexatakhék sa' ma'a apteyenmakxa nak.

¹³ ¡Émenyeyk nak la'a ko'o hekpóssók ma'a apkelmaheykegkaxa nak apkeletsapma ekwokmoho ekmassa aplo, epekkenek han ekhem yaqwánxa kaxénwók apwáxok ko'o!

¹⁴ ¿Exátekhágwoya makham énxet ma'a apketsapa enxoho? Aleyxek sa' aqsa ekyókxoho ekhem ektémakxa nak chá'a sektamheykha, ekwokmoho ekmassegwokmo ektémakxa seklegeykegkoho.

¹⁵ Hewónmakha sa' xép, keñe sa' ko'o wátegmowagkok; kataqmalmakha sa' apwáxok hélano', hakte xép apteme sélane.

¹⁶ Éláneyha sa' agkok chá'a sekmahágkaxa enxoho keñe sa' melyetsetagkek ma'a may'assáxma nak;

¹⁷ emasseksek sa' ma'a aqsok magwaqhémo nak, yáxñásekxak sa' ma'a aqsok ekmaso sélane.

¹⁸ Kawomhok nahan élyaqnenéyak ma'a meteymog élekhahéyak élwenaqte nak, tén han kayaqmagkasek mók ekheykegkaxa m'a meteymog.

¹⁹ Cha'a apteméssessamakxa exchep apkelhaxanma nak énxet ma'a ektémakxal'a yegmen eksawhomal'a meteymog, tén han ekmámeye élpexyawáseyak la'a yagkamex náxop.

²⁰ Mékoho chá'a etnessásekxa', etekkesek chá'a m'a xapop apagkok nak, yáphaksek chá'a yetlo apyaqmagkassesso apyókxa'.

²¹ Ekha kéláyo agkok aptamhágkok ma'a apketchek nak, mey'asagkehek ma'a; asagkek agkok nahan ektamhágkaxa, megkóllegaksek han;

²² wánxa aqsa ey'asagkohok ma'a ektémakxa nak eklegeykegkoho ekmáske apyókxa', tén han ma'a eklegeykegkoho apwáxok.