Job 13 - Biblia Enxet

¹ Ekweteyak ko'o ahaqta'ák ahagko' ekyókxoho xa aqsok nak, seklege ahagko' nahan.

² Ekya'ásegkók ko'óxa m'a kélya'áseykegkoho nak kéxegke; ekhawók ko'o kéxegke.

³ Émenyeyk eyke ko'o apaqhetchesek ma'a Dios, émenyeyk alpaqhetchesaxkohok ma'a ekha nak Apyennaqte.

⁴ Kéláhakkassegkek kéxegke kélmowána amya'a m'a aqsok ekmámnaqsoho nak; kéxegke kélteme pánaqte yapmeyk megkalmopwána nak eltaqmelchessók élháxamáxche'.

⁵ ¡Kélwanmakkek agkok kéxegke, máxa kóltéhek ma'a énxet'ák ekha nak apkelya'áseyak!

⁶ Kóltaqmelchesho sa' kélháxenmo, hakte peyk axének ko'o setnamakxa nak.

⁷ ¿Kamyóya chá'a Dios ma'a kélmowána amya'a nak kéxegke? ¿Kapasmoya chá'a m'a kélpeywa ekmowána amya'a nak?

⁸ Kélpasmeykekxeyk kéxegke m'a, máxa kélmasma kélmáheyok kóltéhek ma'a ektémakxa nak.

⁹ ¿Háxko sa' eyke kóltéhek ma'a apkelanawo sa' kéltémakxa m'a Dios? ¿Kélwancheya kólyexanchesha, kélteméssessamól'a m'a énxet xamo' nak?

¹⁰ Kélyexáxkok sa' agkok han kélpasmeykxo kéxegke m'a, elpaqhetchesek sa' ekyennaqte agko' kéxegke m'a.

¹¹ Kalyegwakkashok agko' sa' kéxegke m'a aptémakxa nak apteme apwányam apagko' ma'a Dios, kóleyk sa'.

¹² Máxa xapop ánek ma'a kéltémakxa nak chá'a kélpeywa; mékoho tamheykekxa', máxa yelpa' kélhaxtegkessól'a nepyáwa tegma m'a kélxeyenma nak chá'a.

¹³ ¡Kólwanma kaxwo', peyk ko'o apaqmétek, hetnehek sa' setnahakxa agkok!

¹⁴ Mamyágwakxeyk sa' sekyennaqte, magweygwakxeyk sa' sétsapma.

¹⁵ Heyaqhek sa' eykhe, malwátessemek sa' eyke sektémakxa nak chá'a sekpeywa, yaqwayam altennaksek nápaqtók sekteme meyke sektémakxa'.

¹⁶ Sa' kexa hewagkasek teyp xa magweygweykekxa nak séltennasso nápaqto', hakte metaxnegwomek sa' xama énxet ekmaso aptémakxa m'a aphakxa nak.

¹⁷ Kóltaqmelchesho sa' kélháxenmo, peya nak apékessásekxak kéxegke.

¹⁸ Altennaksek sa' sektáha meyke sektémakxa, ekya'ásegkók ekpayhawo yaqwánxa atnehek.

¹⁹ Yetneyk sa' agkok xama énxet yaqwayam hexének, awanmak sa' aqsa, keñe sa' watsapok.

²⁰ Oh Dios, hegkés sa' ko'o ánet aqsok sélmaxneya nak, tén sa' meyxánegkesek xép:

²¹ Elwatés señassáseykegkoho, ná hégwakkasha chá'a apagko' kaxwo'.

²² Hepaqhetches sa', keñe sa' ko'o wátegmowagkok; essenhan ko'o apaqmétek emonye', keñe exchep heyátegmowágkok.

²³ Héltennés ko'o ektémakxa may'assáxma, tén han aqsok ekmaso sélane. ¿Yaqsa aqsok ekmaso ko'o sélane?

²⁴ ¿Yaqsa ektéma séxánegkessama nak xép? ¿Yaqsa ektéma setnéssessama nak máxa sénmexma?

²⁵ Ekhawók ko'o m'a aqsok áwa' eksól'a éxchahayam, ¿yaqsa ektáha peya nak hemasséssók? Ekhawo ko'o pa'at apák élyamayél'a, ¿yaqsa ektéma seyaqmáseykencha'a nak?

²⁶ Askohok agko' appeywa segkésso sexéncháseykekxoho sektémakxa; eñassáseykegkók eñama may'assáxma sélane axta sektémakxa wokma'ák.

²⁷ Enaqtehetchessegkek emagkok cadenas, apkeláneykha ekyókxoho ektémakxa sekweynchámeykha, apkeláneykha chá'a m'a sekmahágkaxa enxoho.

²⁸ Taqmelcháseykegkók ekmasagko sekyókxa, ektémól'a aqsok ektepelchamáxche', aptémól'a apáwa askok ektól'a.