Jeremías 6 - Biblia Enxet

Jerusalén kélwakhegwayam

¹ ¡Benjamín énxet'ák apagkok, kóltegyaha kélyexanmomakxa! ¡Kólántép Jerusalén! Kólpáwés kélaqkahasso m'a Tecoa, kólya'és néten xama aqsok magkenatchesso m'a Bet-haquérem, hakte nexcheyha peyk kañék kaxegmak ma'a nentekyawa tén han nenlegeykegkoho ekmaso agko'.

² Kaxwók sa' kólmasséssók ma'a Sión ektaqmalma nak,

³ apkelmeyeykekxexa nak chá'a m'a keláneykha nepkések yetlo apnaqtósso; apkelpakxeneykegko nak chá'a m'a neyáwa nak, apkeleykegko nak chá'a pa'at apnaqtósso nepkések ma'a neyáwa apmakókxa enxoho chá'a elagkok.

⁴ Aptáhak apkelpaqmeta apkelenmexma s'e: “¡Kóllánekxa sa' kéltáhakxa, yaqwayam ólnapaxchek ma'a! ¡Kólchexyem, agketamagkok sa' yetseksók ekhem agko'! ¡Hay!, taxnakmek eyke nahan peyk kayaqtések.

⁵ ¡Axta'a sa' agketamagkok, agmasséssessók sa' ma'a tegma apkelwenaqte apagkok!”

⁶ Aptáhak Wesse' egegkok ekha nak apyennaqte s'e: “¡Kólyaqtén sa' yenta'a, kóllána sa' kélyetlamakxa néten, yaqwayam sa' kólchetamagkok ma'a Jerusalén! Apxénamakpek kóllegássesagkohok xa tegma apwányam nak, hakte sawheykekxók apnaqtawáseykegkoho apnámakkok énxet'ák ma'a kañe' nak.

⁷ Jerusalén keñamak ekteyapma m'a nentémakxa ekmaso, máxa m'a ektémól'a máxek katyapok yegmen. Negyenaqteyáseykha egyempehek aqsa chá'a legamaxchek ma'a, tén han negketámeyak egmók, nélyensásamáxche aqsa chá'a wetamaxcheyk ma'a, tén han nenlegeykegkoho ekmáske.

⁸ Kastégho sa', Jerusalén, sa' agkok kastégak, ayenyók sa' eñama megkaleklo ewáxok, yókxexma meyke xama aqsok sa' atnessásekxa', meyke énxet apheykha kañe' sa' atnessásekxa'.”

Nenlegeykegkoho ekxénamaxche kawa'

⁹ Aptáhak Wesse' egegkok ekha nak apyennaqte s'e: “Kólchetámekxohok sa' israelitas apkeleymomap nak, ektémól'a kólchetámekxohok kañe' áwa' ekyexna m'a anmen yámet ekwokmoho megkeymexko xama m'a ekyexna.”

¹⁰ Ektáhak axta ko'o seyátegmowágkokxo s'e: “¿Yaqsa sa' ko'o heyeyxhok sélpaqhetchesa enxoho, tén han séltennasa enxoho xa amya'a nak? Wesse', apkelapmeyk apeyk'ák ma'a, mopmenyeyk nahan eleyxho'; ey'ássamhok nahan ma'a appeywa nak xép, megkalchek apkelwáxok.

¹¹ Wesse', lanawók ko'óxa ewáxok xeyep aplo; mowanchek kaxwók sekmako amágwakxa'.” Aptáhak axta ko'o seyáneya Wesse' egegkok se'e: “Eyenyenta nepyeseksa m'a wokma'ák apkelweynchámeykha nak ámay, nepyeseksa nak ma'a wokma'ák apyaqyeyáseykha nak apkelweynchámeykha. Elmakpok sa' ma'a énxet'ák yetlo apnaqteyegka'a, tén han ma'a apkelwányamók apagko' nak.

¹² Pók énxet'ák sa' elmekxak ma'a apxanák nak, tén han yókxexma apagkok tén han ma'a apnaqteyegka'a nak. Hakte ay'aksek sa' ko'o néten émek, yaqwayam allegássesagkohok ektáha nak apheykha s'e apchókxa nak. Ko'o sekxeyenma xa, sektáha nak Wesse'.

¹³ “Apyókxoho kelxéneykha chá'a apkelwáxok ma'a aqsok élmenyexamaxche nak; cham'a ekyawe nak kéláyo, tén han ma'a meyke nak kéláyo, apyókxoho nahan aptamhéyak apkelmopwancha'a amya'a m'a apkellegasso nak sekpeywa, ekweykekxoho m'a apkelmaxnéssesso nak chá'a énxet'ák ahagkok.

¹⁴ Etnéssesek aqsa chá'a apkelánésso apkelyense m'a énxet'ák ahagkok; exének chá'a ektaqmela, asagkek eykhe katnehek.

¹⁵ ¡Kéméxcheyk eykhe elmegqágwók apkelánegko enxoho chá'a xa ektéma nak aqsok sektaqnagkamo nak ko'o! Melmegqágwakxeyk eyke, ¡melya'ásegkok ma'a ektémakxa negmegqakto! Éllegassásegkók sa' agkok ko'o m'a, elpelapmok sa', elyaqnenagkok sa' ektéma nak chá'a m'a nápakha nak. Ekxénchek ko'o xa, sektáha nak Wesse'.”

Énxet'ák Israel élyennaqte apkelwáxok

¹⁶ Aptáhak Wesse' egegkok apkeláneya énxet'ák apagkok se'e: “Kólchaqnágwom hana ámay, kóllano sa', kóltegyaha sa' amya'a m'a nanók ámay axta, háxko ekyetnamakxa m'a ámay ektaqmalma nak; kólyetlakxa sa' ma'a, keñe sa' kólwetekxak kéllókasso kélyampe.” “Axta eyke aptáhak apkelpaqmeta s'e: Ma', magmakók negko'o ólyetlakxak ma'a.”

¹⁷ Apnegkenchek axta Wesse' egegkok énxet'ák apkelhaxneykha, tén axta aptáha apkeláneya énxet'ák se'e: “Kólleyxmakha sa' kélaqkahasso magkenatchesso kéltennasso yaqwánxa katnehek.” Keñe axta énxet'ák aptáha s'e: “Magmakók negko'o ageyxho'.”

¹⁸ Cháxa keñamak aptáha nak Wesse' egegkok se'e: “Kóleyxho, pók aptémakxa énxet'ák, kólya'asagkoho yaqwánxa katnehek ma'a énxet'ák ahagkok.

¹⁹ Énxet'ák kélheykha nak keso náxop, kóleyxho: Wáphássesek sa' ko'o aqsok ekmaso s'e énxet'ák nak, ekyaqmageykekxa élxéneykha chá'a apkelwáxok elanagkok aqsok ekmaso; hakte melyaheykekxak ma'a sekpeywa nak, aptaqnagkamchek aqsa m'a segánamakxa ahagkok nak.

²⁰ ¿Yaqsa ektáha sélsántegkesa nak ko'o kéxegke aqsok ánek ekmátsa nak ekpaqneyam éten agkok éleñama nak Sabá, tén han yámet ekmátsa nak ekpaqneyam éleñama nak ma'a apkelókxa makhawók agko'? Megkalchek ko'o ewáxok ma'a aqsok kélwatno nak, tén han ma'a mók aqsok kélnaqtósso kélnapma nak.”

²¹ Cháxa keñamak aptáha nak Wesse' egegkok se'e: “Wának sa' ko'o elpelapmok se'e énxet'ák nak tén han elyaqnenagkok. Esawhakpohok sa' eletsapok apyókxoho, cham'a apyapmeyk, apketchek tén han ma'a apnámakkok nak.”

Israel apkelenmexma apkelxegáyam ekpayho nak nexcheyha

²² Aptáhak Wesse' egegkok se'e: “Apkelánekxeyk aptamhágkaxa peya elxegmak énxet'ák apkelyennaqte, apheykha nak ma'a apkelókxa makhawók agko', ekpayho nak nexcheyha.

²³ Apkelmákxeyk ma'a yágke tén han sókwenaqte apagkok; apkellómók apagko' nahan ma'a, megkayóshek elanok ma'a aqsok; máxa wátsam ekwányam ekpáwà awáxok ma'a apkelwónchesso nak, apkelxegakmek yátnáxeg apkelchánte. Appenchásegkek aptamhágkaxa yaqwayam yempakhak ma'a Sión.”

²⁴ Aptáhak apkelpaqmeta énxet'ák Jerusalén se'e: “Nenleg'ak negko'o amya'a, ẽlyélaqtéssek han negaye; néllegagkók élyentaxno egwáxok tén han ekmáske, máxa m'a kelán'a ekmáheyól'a katnehek naqláwa.

²⁵ ¡Nágkólántép yókxexma, nágkólmohok ma'a ámay nak! ¡Yetlo apkelmeykha m'a nélenmexma nak; ¡sawhékxók élmeneymaxche ekyókxoho yókxexma!”

²⁶ ¡Énxet'ák ahagkok, kólántaxnekxa apáwa sẽlwáxaqxamo nak, magkenatchesso kéllegagkoho ekmáske; kólpexyawha neyseksa táhap, kallapwomák, nágkóleysagkoho kóllekxagwaha, ektémól'a yetsapok xama kélketche apteme nak wánxa xama apagko'; hakte kaxwo' sa' elwak ma'a apmáheyo nak hegmasséssók!

²⁷ Aptáhak ko'o seyáneya Wesse' egegkok se'e: “Xeyep sa' agkések yaqwayam elyepkeynek énxet'ák ahagkok. Elano sa', yaqwayam sa' elanok háxko apkeltémakxa.”

²⁸ Wesse', apyókxoho apteme élyennaqte apkelwáxok ma'a; énxet'ák aptekkessáseykha naqsa apkelwesey apnámakkok, tén han élmaso apkeltémakxa; máxa sawo élyexwase m'a, tén han sawo ekyentaxno.

²⁹ Kélwátekhakkassek agkok ekyennaqte m'a kélwátekhakkassamól'a chá'a táxa, kapeykásekxak chá'a táxa m'a yámenmaga aktek nak. Kaqhok eyke kólaxñassásekxak apyempe'ék ma'a, hakte mesawhakpek ma'a élmasagcha'a nak apkeltémakxa.

³⁰ Eltamhakpok sa' “sawo élmope élmomnáwa kélchexakha”, hakte xép apkexakha xa, Wesse'.