Jeremías 51 - Biblia Enxet

Babilonia kélmassésseyam

¹ Aptáhak Wesse' egegkok se'e: “Wahak sa' ko'o éxchahayam ekyennaqte agko' ekmassésseykmohol'a aqsok ma'a Babilonia, tén han caldeos.

² Máxa hótáhap apaktek kélchempasso sa' ko'o wának etnéssesek apkelenmexma m'a Babilonia; meyke énxet apheykha sa' wának etnéssásekxak ma'a kañe' xapop apagkok nak. Wokmek sa' agkok ekhem ekmaso, máxa sa' kañék kélchetámeyam.

³ ¡Kóllánekxa yágke kélagkok kélmeykha nak chá'a yágke! ¡Kóláhakkásekxa kélnénya'ák ma'a kéláhakkasso nak chá'a! ¡Nágkalapyósho kóllanok ma'a wokma'ák nak Babilonia; kólmasséssem sa' apyókxoho m'a sẽlpextétamo apagkok!

⁴ Exnagkok sa' aphopák énxet'ák ma'a ámay nak, cham'a ekyókxoho nak caldeos apchókxa,

⁵ apkeláneykegkek eykhe melya'assáxma nahaqtók ko'o m'a énxet'ák Israel tén han Judá, apsawheyáseykekxók melya'assáxma m'a apchókxa, makke akxakhák ko'o makham, sektáha nak Wesse' ekha sekyennaqte, Dios Appagkanamap nak Israel.

⁶ “¡Kólántép Babilonia! ¡Kólwagkasaxche teyp kélewagko enxoho! ¡Nágkóltamho kóletsapok eñama apkeláneyak melya'assáxma m'a énxet'ák Babilonia! Wokmek kaxwók sekyaqmagkáseykekxexa mók apkeltémakxa, axnéshok sa' mók ma'a ektémakxa nak chá'a aqsok apkeláneyak.

⁷ Aphémók axta Babilonia sekmeykencha'a m'a egheykok sawo ekyátekto ekmomnáwa nak, élnáhakkassama axta chá'a anmen apyókxoho énxet'ák apheykha nak keso náxop. Apyenágkek axta agkok chá'a apyókxoho énxet'ák xa vino nak, kalyeykesek axta chá'a exma.

⁸ Axta eyke kawenaqtémok apteyekmo m'a Babilonia aptamheykekxo nápakha'a apketkók. ¡Kóllekxagwaha kóllanok ma'a! Kólsantagkas pánaqte yaqwayam kóltexnássesagkok apkelyense, lapmaxcheyk sa' kaltaqmelchessessók.”

⁹ Néltexnágkek negko'o pánaqte m'a Babilonia, makke etaqmelwokmok. Etnehek apagkok xa, nók ólántépok se'e, enxama sa' chá'a ólmeyekxak ma'a negókxa, hakte weykmók apkelane aqsok ekmaso agko' ma'a néten, weykmók ma'a yaphope nak.

¹⁰ Entaqmelchessáseykxeyk axta negheykha m'a Wesse' egegkok. Kólchexyem, óltennágwakxak Sión ma'a aqsok apkelane axta Dios Wesse' egagkok.

¹¹ Peyk emasséssók Wesse' egegkok ma'a Babilonia, apnaqxétekhássásegkek han apkelwáxok ma'a kelwesse'e apkelwányam nak Media. Cháxa yaqwayam eyaqmagkásekxak Wesse' egegkok apteméssessamakxa axta m'a tegma appagkanamap apagkok. ¡Kóllánekxa yágke aktek kélagkok! ¡Kólmák sa' kéláhakkásamáxche!

¹² ¡Kólya'és néten magkenatchesso yaqwayam kólchetamagkok ma'a kélhaxtegkesso nak Babilonia! ¡Kólxámasák apkeltaqmelchesso tegma! ¡Kólnegkenák apkelhaxneykha! ¡Kólnegkenák kelhanma! Hakte apkeláneykekxeyk axta aptáhakxa Wesse' egegkok yaqweykenxa etnéssesek apkeltennassama axta m'a Babilonia, apkelanak nahan.

¹³ Xép Babilonia, apyetnama nak neyáwa wátsam élyawe, apteme nak ekxámokma aqsok apagkok, ¡wokmek kaxwók néxa apha, ekmassegwánxa apwetamap!

¹⁴ Aptáhak apxéna ekmámnaqsoho Wesse' ekha nak apyennaqte s'e: “¡Wáhakkassak sa' ko'o exchep apkelenmexma, aptémól'a sawa', elátsaha sa' nepyeseksa exchep elmallánek ma'a!”

Dios kélmeneykmássesso

¹⁵ Yetlo apmopwána axta apkelaneyk Wesse' egegkok xapop; yetlo apya'áseykegkoho axta appekkenmak nélwanmégkaxa; yetlo apmopwána aqsok axta appeykessók ma'a néten.

¹⁶ Appeywa ekyennaqte chá'a epáwaksek awáxok yegmen ekyetnama nak néten, etekkesek chá'a yaphope éleñama m'a néxa xapop nak; etekkesek chá'a apkelyenma neyseksa ekmámeye; etekkesek chá'a éxchahayam eñama m'a appekkenmakxa nak.

¹⁷ Élyeyháxma apyókxoho énxet tén han melya'áseyak aqsok. Kelyexancháseykha chá'a aqsok kéleykmássesso m'a ektáha nak chá'a apkelane: kéleykmássesso sẽlyexancháseykha m'a, tén han meyke élennama;

¹⁸ aqsok mékoho, tén han kélya'asseykmoho, emasséssók sa' Wesse' egegkok ma'a ekwokmo sa' ekhem sẽlyekpelchássessamókxa'.

¹⁹ ¡Megkaxnawok agko' Jacob nak Dios apagkok xa, apkelane nak ekyókxoho aqsok élánteyapma nak! Axta apkelyéseykha énxet'ák Israel ma'a yaqwayam etnehek apagkok apagko'. Wesse' ekha apyennaqte: cháxa apwesey xa.

Babilonia apchásenneykekxa nak chá'a Wesse' egegkok ellegássesagkohok énxet'ák

²⁰ “¡Babilonia, xép apteme sawo ekyentaxno ahagkok, sekmeykha nak chá'a sénchesso kempakhakma! Xép chá'a wásenneykxak alyaqtennagkok ma'a pók aptémakxa énxet'ák, tén han amasséssók ma'a ekyókxoho apkelókxa.

²¹ Xép chá'a wásenneykxak alyaqtennagkok ma'a yátnáxeg, tén han ma'a apheykha apkap'ák, tén han ma'a yátnáxeg apkelyenyawasso yetlo m'a apkelxegkesso nak chá'a.

²² Xép chá'a wásenneykxak alyaqtennagkok ma'a énxet'ák, tén han kelán'ák, apkelwányam, tén han wokma'ák, wokma'ák apketkók tén han kelán'ák étkók.

²³ Xép chá'a wásenneykxak alyaqtennagkok ma'a keláneykha nepkések, yetlo apnaqtósso, tén han ma'a apkeltamheykha nak namyep, yetlo m'a weyke kélméssamól'a chá'a éltamheykha, tén han apkeltaqmelchesso nak apkelókxa, yetlo apkeláneykha.

Babilonia kéllegassáseykegkoho

²⁴ “Kélnápaqta'awók sa' kéxegke ayaqmagkásekxak apkeltémakxa m'a énxet'ák Babilonia, tén han ma'a caldeos, ekpayhawo nak chá'a atnéssesek, eñama ekmaso apteméssessamakxa axta m'a Sión. Ko'o sekxeyenma xa, sektáha nak Wesse'.

²⁵ Énmexchek ko'o exche' meteymog ekwenaqte ekmassesseykmoho nak aqsok, ekmasseseykmo nak aqsok ekyókxoho keso náxop. Ko'o sekxeyenma xa, sektáha nak Wesse'. Añássesagkohok sa' ko'o exche', eyttelegwásenták sa' eñama m'a néten meteymog élwenaqte nak, egkexe ekmeyesma sa' atnéssásekxa'.

²⁶ Méko sa' xama enxoho nekha'a étkók élpaqxo ektaqmalma kólmaha yaqwayam elanakpok tegma. Meyke xama aqsok meyke néxa sa' katnekxa'. Ko'o sekxeyenma xa, sektáha nak Wesse'.

²⁷ “¡Kólchexen néten aqsok ma'a apchókxa nak magkenatchesso yaqwayam kólchetamagkok! ¡Kólpáwés kélaqkahasso, kólána' elanagkokxak aptamhágkaxa apyókxoho énxet'ák, yaqwayam ektamagkok ma'a Babilonia! ¡Kólenmexches sa' ma'a apkelókxa nak Ararat, Miní, tén han ma'a Asquenaz! ¡Kólyésha xama sẽlpextétamo apkemha apmonye' kempakhakma! ¡Kólána elxog yátnáxeg apkelchánte, aptémól'a sawa' apkello!

²⁸ Kóllánekxés aptamhágkaxa apyókxoho énxet'ák yaqwayam ektamagkok; kóllánekxés nahan aptamhágkaxa m'a kelwesse'e apkelwányam nak Media, yetlo apkeltaqmelchesso nak chá'a apkelókxa, tén han apkeláneykha, tén han ma'a ekyókxoho apkelókxa aptamheykegkaxa nak chá'a kelwesse'e apkelwányam.”

²⁹ Yawheyha xapop, pexyennegkek nahan, hakte apkelanak Wesse' egegkok ma'a ekxeyenma axta apwáxok elána', apmáheyo etnéssásekxak Babilonia meyke xama aqsok ekmaso agko'.

³⁰ Apkelwáteságkek apkempakhe m'a sẽlpextétamo Babilonia, apkelhákxeyk ma'a tegma apkelyennaqte apagkok nak; massék apkelyennaqte, máxa kelán'ák aptamhágkokxa'. Apkelántaxneykpek ma'a tegma apkelyawe apagkok nak, kélwatneyásekxeyk ma'a apxanák.

³¹ Apyaqmagákpek pók apkelseykha nak chá'a amya'a apkeltennássekxo chá'a wesse' apwányam Babilonia apmákpo apyókxoho m'a tegma apwányam apagkok.

³² Apkelmeyk axta apkelenmexma m'a wátsam apkelyekheykekxexa axta chá'a énxet'ák, apkelwatneyk axta han ma'a tegma apkelyennaqte nak, apkelyegwakkók apagko' axta m'a sẽlpextétamo.

³³ Hakte aptáhak Wesse' ekha apyennaqte Dios apagkok nak Israel se'e: “¡Aphawók Babilonia m'a kélchexakkassamakxa nak chá'a apyempe'ék hótáhap apaktek, kaxwók sa' kammok ekhem eknakxamáxchexa apaktek!”

^34-35 Aptáhak Jerusalén se'e, tegma apwányam Sión nak: “Nekha'a étkók axta ko'o etnéssáseykekxak Nabucodonosor wesse' apwányam nak Babilonia, emasséseykmek axta; máxa axta etnessáseykekxak ma'a sokpayhe meykel'a aqsok awáxok. Máxa yegmen askok ekyawe axta aptemék senaqsapma, ekyetno nak wátsam ekwányam; apyaqkáneykmek axta aptama ekleklamókxa nak apwáxok ekyetno sekyókxa, keñe m'a nekha nak apkexakhama. ¡Kólyaqmagkásekxak sa' setnéssessamakxa axta ko'o m'a Babilonia! ¡Kólyaqmagkásekxa sa' ektémakxa axta sẽlnapma negko'o m'a caldeos!”

Dios apmésso appeywa Israel

³⁶ Aptáhak Wesse' egegkok se'e: “Alánekxések sa' ko'o exchep amya'a kélteméssessamakxa, ayaqmagkassásekxak sa' ko'o apteméssessamakxa exchep ma'a apkelenmexma. Eymaksek sa' ko'o m'a wátsam, tén han ma'a élánteyapmakxa nak yegmen Babilonia,

³⁷ peya nak etnekxak ektaháneykekxa mók meteymog, élleykegkaxa semheg nawha'ák, meyke énxet apha, elyegwakkasek sa' chá'a apyókxoho énxet, yeyk sa' nahan chá'a.

³⁸ Máxa yámakméwa sa' etnahagkok elyexwéwha m'a apyókxoho nak, elesñeykha sa', ektémól'a m'a étkók nak.

³⁹ Kelmexneyk sa' agkok apyempe'ék, alagkok sa' ko'o apyenéyak, apyenéyak yaqwayam sa' kalyeykesek exma, tén han kamaskok kalya'ássesagkok aqsok. Keñe sa' enaqtének meyke néxa, menaqxétekhagkek sa'. Ko'o sekxeyenma xa, sektáha nak Wesse'.

⁴⁰ Keñe sa' anaqlakxak ma'a aptekyómakxa, ektémól'a nepkések apketkók kólnaqlakxak, tén han yát'ay, tén han ma'a nepkések apkelennay'a.”

Babilonia aptéyam

⁴¹ ¡Apteyekmek ma'a Babilonia, apxénamap nak ekyókxoho yókxexma, apmákpe'! ¡Apkelyegwakkek apkelwet'a ektáhakxa m'a apyókxoho énxet'ák!

⁴² Chapchek yegmen eñama wátsam ekwányam ma'a Babilonia, chapchek ma'a élyaqyahayam agkok élyawe nak.

⁴³ Yókxexma ekmaso agko' aptamhákxak ma'a tegma apkelyawe apagkok nak, meyke xama aqsok, ekyamayéxma xapop, ekyaqhapmo exma, meykexa xama énxet apha, meykexal'a han kayeykhágwók.

⁴⁴ “Añássesagkohok sa' ma'a dios Bel nak Babilonia, ayekxássesek sa' ma'a aqsok élmenaqsapma axta, melyo'ótamók sa' nahan kaxwók ma'a pók aptémakxa énxet'ák. ¡Kelyaqnenágkek kaxwók ma'a kélhaxtegkesso nak Babilonia!

⁴⁵ Énxet'ák ahagkok, kólántép xa, ¡kólwagkasaxche teyp kólenyahagkok, amonye' seklómo ahagko'!

⁴⁶ Nágkólyegwe', nágkóle kéllegeykha nak amya'a ektépeykha m'a apchókxa. Ekyókxoho apyeyam sa' chá'a katyapmakha mók ektémakxa amya'a, katyapmakha sa' amya'a negyennaqteyáseykha egyempehek ma'a apchókxa, tén han apkelenmexamap ma'a apkeltaqmelchesso nak chá'a apkelókxa.

⁴⁷ Kammok sa' ekhem yaqwánxa allegássesagkohok ko'o m'a kéleykmássesso nak Babilonia. Mékoho sa' katnekxak ekyókxoho apchókxa, eksawheykekxoho kélhapák.

⁴⁸ Kapayhekxak sa' awáxok apteyekmo sa' Babilonia m'a néten, tén han xapop, tén han ma'a ekyókxoho aqsok élánteyapma nak, apkelxegakmo sa' apkeleñama nexcheyha m'a apmassésseyam nak. Ko'o sekxeyenma xa, sektáha nak Wesse'.

⁴⁹ Naqso', etyamok sa' ma'a Babilonia, eñama apkelnapma énxet'ák ma'a kañe' Israel, tén han ma'a ekyókxoho apkelókxa nak keso náxop.”

Amya'a apkelxawéyak judíos apheykha nak Babilonia

⁵⁰ Kéxegke kélegketamaxche axta, kólenyahák meyke kélchaqnágwayam, kélwokmek sa' agkok ma'a makhawo nak, kaxén sa' kélwáxok ma'a Wesse' egegkok, nágkalwánaqma aqsa m'a Jerusalén.

⁵¹ Kéltáhak kéxegke kélpeywa s'e: “Nélmegqakkek negko'o nenleg'a ektáhakxa sẽlwanyeykha. Nélmegqakkók egagkók negko'o hakte weykmók apkelántaxnama énxet apkeleñama mók nekha m'a kañe' ekpagkanamaxchexa agko' nak ma'a tegma appagkanamap.”

⁵² Akke aptáhak Wesse' egegkok se'e: “Xegakmek yaqwánxa sa' ko'o allegássesagkohok ma'a kéleykmássesso nak Babilonia, elápentegmakha sa' kélyensáseyák ma'a ekyókxoho apchókxa nak.

⁵³ Yántek sa' eykhe Babilonia m'a néten, yaqwayam epekkenwók netnók agko' ma'a apxagkok apyennaqte nak, aláphaksek sa' eyke han ko'o apkelenmexma m'a, yaqwayam emasséssók. Ko'o sekxeyenma xa, sektáha nak Wesse'.”

Babilonia kélmassésseyam

⁵⁴ Babilonia keñamak élpayheykha kélatña'ák, caldeos apchókxa keñamak ekyennaqte agko' ekyennama exma.

⁵⁵ Wesse' egegkok ma'a apmasséssekmo nak Babilonia, apwanmeyásekxo nak ekyennama exma. Máxa yegmen élyaqyahayam ekyennaqte ekpáwà awáxok sa' etnehek ektamagkok ma'a apkelenmexma, yetlo ekyawe agko' éxtegyawà.

⁵⁶ Apkelxegakmek yaqwayam emasséssók Babilonia; apkelmeyk kaxwók ma'a kempakhakma yapmeyk apagkok, apkelekkexchessek yágke apagkok. Hakte Wesse' egegkok, apteme xama Dios, apyaqmagkáseykekxohol'a chá'a aptémakxa xama énxet ekpayhawo nak chá'a etnéssesek.

⁵⁷ Aptáhak Wesse' Apwányam, Wesse' ekha nak apyennaqte s'e: “Annáhakkasek sa' ko'o anmen ma'a apkelámha apmonye'e nak Babilonia, tén han ma'a apkelmopwancha'a nak aqsok, tén han ma'a apkeltaqmelchesso nak apkelókxa yetlo apkeláneykha, tén han sẽlpextétamo apagkok, keñe sa' enaqtének meyke néxa, menaqxétekhagkek sa'.

⁵⁸ Ektáhak ko'o sekpeywa s'e, sektáha nak Wesse' ekha sekyennaqte: Kólyaqnegkesek sa' ekyókxoho m'a kélhaxtegkesso ekyawe nak ekpayhakxa m'a Babilonia, kólwatnekxak sa' ma'a átog apagkok élyawe nak. Kaqhok sa' chá'a eltemeykha énxet'ák, hakte táxa sa' kalwatnések chá'a m'a apkelwasqápeykekxoho nak apkelánéyak.”

Jeremías appeywa kélso Babilonia

⁵⁹ Apméssek axta apkeltamhókxa etnehek Dios appeywa aplegasso Jeremías ma'a Seraías, Nerías axta apketche, Maaseías axta aptáwen, ektéma axta cuatro apyeyam apteme apkeláneykha apchókxa m'a Sedequías, wesse' apwányam axta m'a Judá. Apyetlókek axta nahan Seraías wesse' apwányam Sedequías apmahágko m'a Babilonia, hakte axta apteme chá'a apkelánéseykekxa yaqwánxa exek ma'a wesse' apwányam.

⁶⁰ Aptáxéssegkek axta Jeremías appeywa weykcha'áhak apxeyenma m'a ekyókxoho aqsok ekmaso yaqweykenxa katnehek kélhe m'a Babilonia, cham'a ekyókxoho ektémakxa axta ektáxésamaxche ekxénamaxche m'a.

⁶¹ Aptáhak axta apcháneya Seraías se'e: “Apwokmek sa' agkok Babilonia, etaqmelchesho sa' apkelyetsete ekyókxoho s'e amya'a nak.

⁶² Keñe sa' etnehek se'e: ‘Wesse', apxeyenmeyk axta exchep emasséssók se'e apchókxa nak, yaqwayam enxoho méko kaxwók kaxek se'e, cham'a énxet essenhan aqsok kélnaqtósso, hakte yókxexma meykexa énxet meyke néxa sa' etnéssásekxa'.’

⁶³ Appenchessek sa' agkok apkelyetsete s'e weykcha'áhak nak, ethet sa' xama meteymog, tén sa' eyenyók kañe' wátsam Éufrates,

⁶⁴ tén sa' etnehek se'e: ‘Sa' etnehek ewéwagkok Babilonia xa, mopwanchek sa' exnekxak néten neyseksa m'a aqsok ekmaso peya nak yahak Wesse' egegkok.’” Cháxa néxa appeywa Jeremías xa.