Jeremías 50 - Biblia Enxet

Babilonia aptéyam

¹ Amya'a ekxeyenma nak Babilonia, caldeos apchókxa, Wesse' egegkok axta aplegasso, apchásenneykekxo axta m'a Dios appeywa aplegasso Jeremías:

² “Kóllegés sa' se'e, kólya'assásegwom sa' nepyeseksa apyókxoho énxet'ák. Kóllegés sa' yaqwayam kólya'asagkoho'; nágkólpós xama enxoho. Kólteme sa' se'e: ‘¡Apteyekmek Babilonia! ¡Aqsok eyesmésamaxche tamhákxak ma'a dios Bel, megkay'ásegkok ektáhakxa élmenaye m'a dios Marduc! ¡Aqsok élasmésamaxche tamhákxak ma'a aqsok kéleykmássesso apagkok, tén han ma'a aqsok apkeláyókxa élmowancha'a amya'a nak, kelmenakawók agko'!’

³ Hakte nexcheyha apkeleñamak apkelxegakmo apketamakmo m'a yaqwayam sa' etnessásekxak yókxexma meykexa énxet ma'a apchókxa nak. Méko sa' xama énxet exnekxak ma'a tén han aqsok kélnaqtósso, hakte yenyahagkok sa' apyókxoho énxet.”

Israelitas apkelchexyeyam makham

⁴ Aptáhak Wesse' egegkok se'e: “Ellekxagwenták sa' elchexyamok énxet'ák Israel tén han Judá xa ekhem nak, hektamok ko'o, sektáha nak Dios Wesse' apagkok.

⁵ Etegyaha sa' amya'a ekpayhókxa ámay ma'a Sión, tén sa' elpéwhok ma'a, sa' etnehek apkelpeywa s'e: ‘Agyo'ókxak Wesse' egegkok, agyepetchegwakxak yetlo nenlane ekhémo mók nélpaqhetchesamaxkoho megkamassegwayam, megkalwagqámomáxche nak chá'a xama enxoho.’

⁶ “Máxa axta nepkések apkelxegányam la'a m'a énxet'ák ahagkok, ekmasól'a apkelmeykha m'a ektáha nak apkeláneykha, apchahayól'a aqsa elxeganmok ma'a egkexe nak. Apyaqmagkáseykegkek axta chá'a apkelmahéyak mók egkexe, weykmók axta élwagqámeykegko m'a apxanák nak.

⁷ Apkeltahanya'awók axta agkok chá'a m'a apkelenmexma nak, elnápok axta chá'a etawagkok, axta etnehek chá'a elpaqmétek se'e: ‘Manlánegkok negko'o aqsok ekmaso, hakte apkeláneykegkek melya'assáxma nápaqtók Wesse' egegkok ma'a, apkelmésso nak chá'a ekyókxoho aqsok, melya'ásseykmo axta chá'a m'a apyapmeyk nano'.’

⁸ “¡Kólántép Babilonia, caldeos apchókxa nak! ¡Kólántép, aptémól'a apnaqleykha nepkések exog apmonye' apnaqtósso!

⁹ Hakte wának sa' ko'o kaxhok mók apketámeyam Babilonia m'a énxet'ák apkelyennaqte apxámokma apkeleñama nak nexcheyha. Eléwekxak sa' yaqwayam yempakha', emok sa' nahan. Kempakhakma yapmeyk apmopwancha'a elnapakpok ma'a, apmoplensa'a yágke m'a apkelyát'a enxoho.

¹⁰ Elyementók sa' aqsok apagkok caldeos, elyementamagkok sa' aqsok apagkok ekwokmoho élleklámegko apkelméyak. Ko'o sekxeyenma xa, sektáha nak Wesse'.

Babilonia aptéyam

¹¹ “Kéxegke caldeos, kélyementaméyak axta aqsok apagkok énxet'ák ahagkok, ¡kalpayhekxa kélwáxok, kólnéwha! ¡Kólnextegmakha néten, ektémól'a weyke étkok ma'a neyseksa pa'at! ¡Kólwehesha aptémól'a elpáwha yátnáxeg!

¹² Mékoho sa' eyke katnekxak ma'a kélókxa nak, emegqeyk sa' ma'a tegma apwányam kélpalleykemxa axta. Axayók agko' sa' etnekxak nepyeseksa m'a apheykegkaxa nak pók aptémakxa énxet'ák meyke xama aqsok, ekyamayéxma, tén han ekmaso.

¹³ Hakte ataqnók sa' ko'o, meyke énxet apheykha kañe' sa' atnéssesek, meyke agko' aqsok sa' atnessásekxa'. Elyegweyk sa' chá'a apyókxoho apkelyeykhágwayam enxoho chá'a m'a, apkelwet'a enxoho ektémakxa kéllegassáseykegkoho.

¹⁴ “¡Kóllánekxa kélchaqneykha kélmeykha nak yágke, kólwakhegwom Babilonia! ¡Kólyáta' ekyókxoho yágke aktek kélagkok, hakte apkeláneykegkek melya'assáxma nahaqtók ko'o m'a, sektáha nak Wesse'!

¹⁵ ¡Kólwónches kempakhakma m'a ekyókxoho nepyáwa nak! ¡Apmeyásekpek kaxwók ma'a Babilonia! ¡Apkelyaqnenágkek ma'a tegma netna'awo nak, kélyaqnegkeságkek ma'a kélhaxtegkesso nak nepyáwa! ¡Cháxa sekyaqmagkáseykekxa ko'o sélteméssessamakxa xa: kólyaqmagkásekxa apteméssessamakxa! ¡Kóltemésses apteméssessamakxa axta kéxegke m'a!

¹⁶ Nágkólém xama enxoho Babilonia m'a yaqwayam nak eknekxak aqsok aktek, essenhan yaqwayam nak enakxek aqsok ekyexna. Apkelwet'ak sa' agkok kempakhakma apmassésseyam nak aqsok, eltaqhohok sa' makham apkelókxa m'a apkeleñama nak mók apkelókxa, elmeyekxak sa' chá'a xama xama m'a xapop apagkok nak.

Énxet'ák Israel apkelchexyeyam

¹⁷ “Máxa nepkések apkelxegányam la'a m'a énxet'ák Israel, ekmenxeneykhal'a méwa. Wesse' apwányam Asiria axta apto apmonye', keñe axta natámen Nabucodonosor wesse' apwányam nak Babilonia, apkeltakxékencha'a apexchakkok.

¹⁸ Cháxa keñamak sektáha nak ko'o sekpeywa, sektáha nak Wesse' ekha sekyennaqte, Dios apagkok nak Israel: Añássesagkohok sa' ko'o m'a wesse' apwányam Babilonia, ekweykekxoho m'a apchókxa nak, ekhawo sekteméssessamakxa axta m'a wesse' apwányam Asiria.

¹⁹ Wának sa' elmeyenták makham énxet'ák Israel ma'a xapop apagkok nak, máxa nepkések sa' etnahagkok elwetak pa'at ekxámokma m'a Carmelo, tén han ma'a Basán, tén han ma'a élámhakxa nak meteymog élwenaqte m'a yókxexma Efraín tén han ma'a Galaad.

²⁰ Ektáhak ko'o sekpeywa s'e, sektáha nak Wesse': Megkóteyaxcheyk sa' apkelsexnánémap tén han melya'assáxma énxet'ák Israel, tén han Judá xa ekhem nak, hakte mayaqmagkásekxeyk sa' ko'o apkeltémakxa axta m'a énxet'ák seyhayo nak elweynchamha makham.

Babilonia apmassegwayam

²¹ “¡Kólchetamák yókxexma Merataim, tén han ma'a apheykha nak Pecod! ¡Kólemhák, kólsawhoho kólmasséssók! ¡Kóllána ekyókxoho m'a séltémókxa nak kóllána'! Ko'o sekxeyenma xa, sektáha nak Wesse'.”

²² Legáxcheyk éxtegyawà ekyennaqte kempakhakma m'a apchókxa nak, tekkek ekyawe agko' kélmassésseyam aqsok.

²³ ¡Paqxeyk ma'a Babilonia, ekho nak sawo ekyentaxno kéltekpageykha chá'a apyókxoho énxet'ák keso náxop, nekha'a étkók tamhákxa'! ¡Apkelyegwakkek pók aptémakxa énxet'ák apkelwet'a ektáhakxa m'a Babilonia!

²⁴ Babilonia, xép apagko' axta appekkenma kelhanma, métégkok han ekmákxo. Apmákpe', hakte apkenmexeykekxeyk ma'a Wesse' egegkok.

²⁵ Apmeykásekxeyk átog Wesse' egegkok ma'a apxátamakxa nak chá'a apkelmeykha apkenchesso kempakhakma, apkelhaxyawássekxeyk apkelmeykha, hakte aplóke', yetneyk han aqsok yaqwayam elának Wesse' ekha nak apyennaqte neyseksa m'a caldeos apchókxa.

²⁶ ¡Kólchetámegma kéleñama ekyókxoho yókxexma! ¡Kólmeykessesák atña'ák ma'a apxátamakxa nak hótáhap apaktek! ¡Kólánchesekxa énxet'ák, kólmasséssem! ¡Nágkólém xama enxoho!

²⁷ ¡Kólnáhap apyókxoho m'a sẽlpextétamo apagkok nak, kólnaqlakxa yaqwánxa nak etekyók! ¡Apyósekak eyke eykhel'a! ¡Wokmek ekhem yaqwánxa kóllegássesagkoho'!

²⁸ (Apkelwákxeyk Sión ma'a énxet'ák apkelxegányam nak apkeleñama Babilonia, apkeltenneyncha'a ektáhakxa apyaqmagkáseykekxa Dios Wesse' egagkok apkeltémakxa m'a énxet'ák Babilonia, eñama apteméssessamakxa axta m'a tegma appagkanamap nak.)

²⁹ “¡Kólwónmakha apyókxoho apkelmeykha nak chá'a yágke, yaqwayam sa' ektamagkok ma'a Babilonia! ¡Kólpakxenák sa' ma'a nepyáwa nak tegma apwányam, yaqwayam sa' megyenyehek exyenmok xama énxet enxoho! ¡Kólhésho mók ma'a apteméssessamakxa axta! ¡Kóltemésses ma'a apteméssessamakxa axta! Hakte cheymáxkók axta chá'a appeywa sexéneykencha'a ekmaso ko'o, ko'o sektáha nak Wesse' Dios Appagkanamap ma'a Israel.

³⁰ Cháxa keñamak peya sa' etekyók wokma'ák apagkok ma'a ámay nak, etekyók sa' apyókxoho kempakhakma yapmeyk apagkok xa ekhem nak. Ko'o sekxeyenma xa, sektáha nak Wesse'.”

³¹ Aptáhak Wesse' ekha apyennaqte s'e: “Apchókxa eyeymáxkoho nak, énmexchek ko'o exche'; wokmek yaqwánxa añássesagkoho'.

³² Apchókxa eyeymáxkoho nak, etlapmok sa' xép, eyaqnenek sa' nahan, méko sa' han kaxneyásekxak néten. Alwatnések sa' apyókxoho tegma apkelyawe apagkok, kamasséssók sa' ekyókxoho aqsok ekhéyak nak nepyáwa xa táxa nak.”

³³ Aptáhak Wesse' ekha apyennaqte s'e: “Kélnaqtawáseygkók ma'a énxet'ák Israel tén han Judá. Apkelmeyk ma'a apkelenmexma nak, memakók han ekxeykxa'.

³⁴ Apmeyhek eyke m'a apkelántekkesso nak, apwesey nak Wesse' ekha apyennaqte. Sa' etaqmelchessásekxak apheykha m'a, esógmak sa' meyke ektáhakxa negha m'a apchókxa, keñe sa' ekmaso apheykha m'a apheykha nak Babilonia.”

³⁵ Aptáhak Wesse' egegkok se'e: “¡Kólaqha Babilonia, yetlo m'a apheykha nak kañe'! ¡Tén han ma'a apkelámha apmonye'e apagkok, yetlo m'a apkelmopwancha'a nak aqsok!

³⁶ ¡Kólnáhap ma'a kelyohóxma'a apagkok: élyeyháxma sa' etnahagkok!

³⁷ ¡Kólnáhap ma'a sẽlpextétamo apagkok: elpexyennók sa' apkelaye! ¡Kólnáhap yátnáxeg apagkok, kólekkexches ma'a yátnáxeg apkelyenyawasso apagkok! ¡Kólnáhap ma'a sẽlpextétamo apagkok kélyánmagkasso nak chá'a ekyánmaga apkempakhe: máxa kelán'a sa' etnahagkokxa'! ¡Kólmasséssem ma'a aqsok éltaqmalma apagkok: kólmenyexchesák aqsok apagkok!

³⁸ ¡Kóltawásesha wátsam apagkok: kalyameygkok sa'! Hakte Babilonia ekteme xama apchókxa ekheykegkaxa kéleykmássesso élmaso agko', cháxa élyeykessama nak exma xa.

³⁹ “Cháxa keñamak peya sa' katnehek axanák yágqames, tén han semheg nawha'ák ma'a Babilonia, sa' ellawha nahan chá'a xápen ma'a. Mexnekxók sa' chá'a xama énxet enxoho m'a, cham'a egmonye' sa'.

⁴⁰ Exnágwakxohok sa' ma'a ektémakxa axta Sodoma tén han Gomorra, tén han ma'a tegma apkelyawe aphéyak axta m'a neyáwa, cham'a kélmassésseykmo axta. Méko sa' kaxnekxak kaxwók ma'a, méko sa' ma'a yaqwatakxoho enxoho aphayam. Ko'o sekxeyenma xa, sektáha nak Wesse'.

⁴¹ “Apkelánegkókxeyk aptamhágkaxa apmako elxegmak énxet'ák apxámokma apkelyennaqte yetlo apkelxegexma'a kelwesse'e apkelwányam apxámokma apheykencha'a nak ma'a makhawók agko' nak nexcheyha.

⁴² Yágke apkelmeykha tén han sawhéwa; Apkellamchek apagkók nahan ma'a, megkayóshek elanok aqsok, máxa wátsam ekwányam éxtegyawà m'a apkelwónchesso nak, yátnáxeg apkap'ák apkelxegakmok. Appenchásegkek aptamhágkaxa yaqwayam yempakhak ma'a Babilonia.

⁴³ Apkelyelqákpek axta aqsa nahan apleg'a amya'a m'a wesse' apwányam Babilonia eñama apkeye, aplegágkók axta ekyentaxno apwáxok, tén han ekmáske, máxa axta aptáhak ma'a kelán'a ekmáheyól'a katnehek naqláwa.

⁴⁴ “Katlakkasek sa' ko'o axegma', ektémól'a yámakméwa katyapok ma'a naxma ekyentaxno neyáwa Jordán, ekmahéyak la'a chá'a m'a yókxexma ekhakxa nak pa'at axnagcha'ák, sa' ko'o amenxenek énxet'ák Babilonia m'a, wának sa' ko'o etnehek apkeláneykha apchókxa m'a énxet sélyéseykha nak ko'o. Hakte ¿yaqsa awanchek ko'o hexnésaxkoho'? ¿Yaqsa awanchek ko'o hélyekkónaxche'? ¿Yaqsa keláneykha nepkések apwanchek hénmexekxak ko'o?

⁴⁵ Kóleyxho séláneykekxa nak ko'o sektáhakxa sekmakókxa atnéssesek ma'a Babilonia, ko'o sektáha nak Wesse', sekmakókxa nak han ko'o atnéssesek ma'a apchókxa nak caldeos: Kawomhok sa' kélyementaméyak ma'a apketchek ketcheyetse nak, kóltawasha sa' nahan ma'a yókxexma apagkok ektaqmalma nak.

⁴⁶ Kaxtegyók sa' ekyennaqte agko' apteyekmo sa' ma'a Babilonia, kayawheykha sa' xapop, kañexkohok sa' élpayheykha apatña'ák ma'a mók apkelókxa nak.”