Jeremías 47 - Biblia Enxet

Filisteos apkelxénamap yaqwánxa katnehek

¹ Keso amya'a apkeltennasa axta Wesse' egegkok Dios appeywa aplegasso Jeremías apkelxéna m'a filisteos, mektámegkaxa axta makham faraón ma'a Gaza:

² “Ektáhak ko'o sekpeywa s'e, sektáha nak Wesse': Nexcheyha keñamak ekwa'a ekho yegmen ekyawe, ektémól'a wátsam katyapok yegmen; sawhékxók eyapma m'a apchókxa, tén han ma'a ekyókxoho aqsok ekhéyak nak kañe', cham'a tegma apkelyawe nak, tén han apheykha nak ma'a kañe'. Apkelwehéseyha m'a apyókxoho énxet'ák apheykha nak kañe', kelpayheyha apatña'ák apkellegágkoho ekmáske.

³ Apkelyelqákpek nahan apyapmeyk apkelleg'a yátnáxeg apmagkok apkeléwayam, tén han éxtegyawasso xóp yátnáxeg apkelyenyawasso, tén han élaqtáwayam ma'a amagkok nak, apkexakkek aqsa apketchek.

⁴ Hakte wokmek ekhem yaqwánxa kólmasséssók ma'a filisteos, tén han kólyementemekxak Tiro, tén han Sidón ma'a apkeleymomap nak makham ma'a ektáha nak chá'a appasmo.” Naqso', emasséssók sa' Wesse' egegkok ma'a filisteos, apkelánteyapma axta m'a egkexe Creta, apkelmeyáyekmo s'e.

⁵ Apkelmópésawók apkelyese m'a énxet'ák Gaza, apkelwanmeyágkek ma'a énxet'ák Ascalón. Kéxegke kéleymomáxche nak kélqántawo' nanók énxet'ák kélwenaqte, ¿háxko sa' ekwánxa ekhem kammok kélpexyekháseykha kélyempe'ék magkenatchesso éllapwámeyak?

⁶ ¡Wesse' egegkok sókwenaqte apagkok! ¿Háxko sa' ekwánxa ekhem kalwataksek ekyetneykha ekyógkexma? ¡Kataxnekxa makham axagkok, kawanmeyekxa', wánxa katne!

⁷ ¿Háxko eyke katnehek kalwataksek? Wesse' egegkok apkeltémo katnehek, apkeltémo kaktamagkok ma'a Ascalón, tén han ma'a apyókxoho énxet'ák apheykha nak neyáwa' wátsam ekwányam.