Jeremías 4 - Biblia Enxet

Énxet'ák kélpaqhetchesso kéltémo elyaqmagkasek apkelwáxok

¹ Aptáhak Wesse' egegkok se'e: “Israel, peyk sa' agkok kólchexyók, ko'o sa' hélyo'óta'. Kélchexakkek sa' agkok ma'a aqsok kéleykmássesso kélagkok élmasagcha'a agko' nak, tén han mehelyenyawa enxoho ko'o,

² kélwanchek sa' hélmések kélpeywa yetlo kélxeyenma sekwesey, ekmámnaqsoho agko', tén han ektaqmalma tén han ekpéwomo. Sekwesey sa' chá'a elmaha elmaxnéssesek aqsok éltaqmalma apnámakkok ma'a pók aptémakxa énxet'ák, tén han ektaqmalma apkelxénamap.”

³ Aptáhak Wesse' egegkok apkeláneya énxet'ák Judá tén han Jerusalén se'e: “Kólchenekxa aqsok aktek ma'a xapop megkólcheneykekxexa nak aqsok; nágkólchenekxa kaxwók aqsok aktek ma'a neyseksa am'ák.

⁴ Énxet'ák Judá tén han Jerusalén, kólyenyekha nekha kélyempehek, hélya'asagkoho han ko'o sekteme Wesse', kólpekken kélwáxok ma'a ekhémo mók nélpaqhetchásamáxkoho nak; katyapok katnehek seklo ektémól'a táxa eyáléwe, eyáléweykhal'a meyke ekmowána kaspanchesek, eñama kéltémakxa ekmaso.

Judá apchókxa ekxénamaxche kataxnaxche'

⁵ “Kóllegés Jerusalén tén han Judá s'e. Kólpáwes kélaqkahasso kóltennaksek ekyókxoho apchókxa, nágkólésagkoho kóltéhek kélpeywa s'e: ¡Kólchexyem! ¡Agaqnekxak sa'! ¡Ólmeyekxak sa' ma'a tegma apkelyawe ekyennaqte nak kélhaxtegkáséyak nepyáwa'!’

⁶ Kólye'és néten bandera kólenmexcheshok ma'a ekpayho nak Sión; ¡kóltegyaha kélyexanmomakxa, nágkólchaqnágwom aqsa! Hakte nexcheyha sa' ko'o kañék asógmak ekyawe agko' nenlegeykegkoho ekmaso, tén han sẽlmassésseyam nak.

⁷ Tekkek yámakméwa m'a ekyáqtamakxa nak, xegakmek ma'a ekmassésseykmoho nak pók aptémakxa énxet'ák; tekkek ma'a eyókxa nak, peyk kamasséssak kélókxa, yaqwayam kamasséssessók ma'a apchókxa tén han katnéssásekxak yókxexma meykexa énxet, tén han nápakha'a apketkók ma'a tegma apkelyawe kélagkok nak.

⁸ Kólántaxnekxa apáwa sẽlwáxaqxamo nak, kóllekxagwaha, kólápentegmakha kóllegagkohok ekmáske, hakte mehegkexeyk negko'o m'a Wesse' egegkok aplo.”

⁹ Aptáhak Wesse' egegkok se'e: “Wokmek sa' agkok xa ekhem nak, elpexyennók sa' apkelaye m'a kelwesse'e apkelwányam, tén han ma'a apkelámha apmonye'e nak, eláwhok apagko' sa' ma'a apkelmaxnéssesso nak énxet'ák ahagkok, elyegweyk sa' ma'a apkellegasso nak sekpeywa.”

¹⁰ Keñe ko'o sektáha s'e: “¡Wesse'! ¿Yaqsa ektáha apkelyexancháseyncha'a nak énxet'ák Jerusalén? Apkeltennassegkek axta exchep elmések meyke ektáhakxa apheykha, keñe kaxwo', kélyepetchessásegko apyespa'ák sawo.”

¹¹ Wokmek sa' agkok xa ekhem nak, sa' katnehek amya'a elxénakpok énxet'ák Jerusalén se'e: “Éxchahayam ekmexanma wátekhápak énxet'ák ahagkok eñama nak meykexa énxet. Háwe m'a éxchahayam megkeynnaqtél'a, kélmowánal'a kólchempaksek apyempe'ék apák hótáhap apaktek;

¹² kayhók agko' sa' katnehek éxchahayam peya nak ko'o wáphaksek, megkaxók sa' xa ekwánxa nak, axének sa' ko'o kaxwók yaqwánxa katnehek xa énxet'ák nak.”

Israel apwakhegwayam apkelenmexma

¹³ Kóllano, máxa yaphope élxegayam aptamhágkok apkelxegakmo m'a kélenmexma, máxa éxchahayam ekyennaqte agko' la'a m'a yátnáxeg apkelyenyawasso apagkok apkenchesso nak kempakhakma, apmelyeyha'awók apagko' han apkenyehéyak ma'a yátnáxeg apkelchánte, apyeykhásseykmok ma'a ekweykenxal'a ekyennaqte émpé m'a náta élyawe. ¡Negko'o laye, peyk agmassegwók!

¹⁴ Jerusalén, yáxñásekxa apwáxok aqsok ekmaso, keñe sa' ewagkasakpok teyp. ¡Elwatés ekxéneykha apwáxok aqsok ekmaso!

¹⁵ Wokmók Dan tén han egkexe Efraín ma'a amya'a ekmaso, ektéma nak se'e:

¹⁶ “Kóltennasák sa' pók aptémakxa énxet'ák, tén han Jerusalén apkelxegakmo apkelenmexma apkeleñama m'a apchókxa makhawók agko' nak apkelwónchesakmo apmako yempakhak ma'a tegma apkelyawe nak Judá.

¹⁷ Ewakhegwak sa' ma'a Judá, aptémól'a ewakhekxak yókxexma m'a énxet'ák apkeltaqmelchesso nak yókxexma, hakte apkenmexeykekxeyk ma'a Wesse' egegkok. Ko'o sekxeyenma xa, sektáha nak Wesse'.

¹⁸ “Aptémakxa tén han aqsok ekmaso apkelane keñamak ektáha exchep xa; aptémakxa ekmaso meyásak xa ekmáske nak, tén han eklegassásegkoho apwáxok.”

Jeremías élekxagweykha apwáxok eñama énxet'ák apagkok

¹⁹ ¡Éttelegwáseyha ko'o seklegeykegkoho ekmáske! ¡Tayha egkenyek ekyennaqte agko'! ¡Pekhekak ewáxok, mowanchek sekmako awanmak aqsa! Ekleg'ak ko'o kélpáwasso xama kélaqkahasso, tén han kélwónchesso kempakhakma.

²⁰ Wa'akteyk aqsa chá'a amya'a ekmaso; ekmaso tamhákxak ma'a ekyókxoho apkelókxa. Kélmasséssekmek ekmanyehe agko' ma'a sélpakxenéyak nak, éltawassáseyha agko' ma'a sekpakxanma nak.

²¹ ¡Yaqsa sa' kexa ekhem katnégwók néxa sekwete m'a bandera kélchexanma nak néten, tén han seklege ekpáwà m'a kélaqkahasso nak!

²² “Élyeyháxma m'a énxet'ák ahagkok, mehey'ásegkok nahan —axta aptáhak Wesse' egegkok—. Kélketchek melya'áseyak aqsok, megkalchetámeykha nak apkelwáxok. Apwancha'ak elanagkok ma'a aqsok ekmaso, keñe mopwancha'ak elanagkok ma'a aqsok ektaqmela.”

Jeremías apwete kélmassésseyam aqsok peya nak katnehek

²³ Élanawók axta ko'o xapop, méko axta xama aqsok, magya'áseyak ektémakxa axta nahan; énmexawók axta néten, méko axta élsassóxma.

²⁴ Énmexawók axta m'a élámhakxa nak meteymog élekhahéyak, kelpexyennegkek axta; kelyawheykha axta ekyókxoho m'a egkexe nak.

²⁵ Eksawheyha axta exma, méko axta kaxwók xama énxet enxoho, kelchampa'ak axta élxeganakmo ekyókxoho náta.

²⁶ Eksawheykha axta exma, ekwet'ak axta ektamhákxo meyke xama aqsok ma'a kélcheneykekxexa nak pánaqte exnók, tén han aptamhákxo nápakha'a apketkók apyókxoho m'a tegma apkelyawe nak. Wesse' egegkok aplo ekmaso keñamak ekteméssesso ekyókxoho xa.

²⁷ Aptáhak Wesse' egegkok se'e: “Ekmaso sa' kóltemessásekxak ekyókxoho xapop, mamasséssemek sa' eyke ekyókxoho.

²⁸ Kasawhekxohok sa' ekyaqhapmóxma náxop, keñe sa' néten kayaqtések exma. Ekxénchek ko'o xa, megkaqhek sa' nahan ewáxok, ekpenchessek yaqwayam alána', malwátéssemek sa' nahan.

²⁹ Apkelántekkek apkenyahágko apyókxoho énxet'ák apmonye'e apkelleg'a apkelwóncheseyam ma'a apkelchánte nak yátnáxeg, tén han ma'a apkelmeykha nak yágke; apkelyexánegwokmek ma'a émpagqaxa nak, tén han ma'a meteymog áxwa nak. Apkeltaqmópegkek apyókxoho m'a tegma apkelyawe, méko kaxwók xama énxet apheykekxa m'a.

³⁰ Tegma apwányam, aptamhákxo nak nápakha'a apketkók, ¿yaqsa ektáha aptaxnékxo nak apáwa hómáyok? ¿yaqsa ektáha apwakhésakpo nak aqsok étkók éltaqmalma sawo ekyátekto élmomnáwa? ¿yaqsa ektáha apkelpeysegkesa nak apaqta'ák? Kaqhok etaqmelchesakpok elnáxamha, aptaqnawágwokmek kaxwók xép ma'a apkelásekhayókxa nak, peyk yaqhek kaxwo'.

³¹ Ekleg'ak ko'o ekpayheykha kélátog kéllegeykegkoho ekmáske, ektémól'a xama kelán'a kaxwe ekmáheyól'a kótak étche kategkesek apkemha apmonye' étche; Sión ekpayheykha átog ma'a, élya'asa nak néten amék, ektáha ekpaqmeta s'e: ¡Ko'o laye! ¡Peyk heyaqhek ma'a tekyawa yapmeyk nak!”