Jeremías 31 - Biblia Enxet

Israelitas apkelchexyeyam makham apkelókxa

¹ Aptáhak Wesse' egegkok se'e: “Hetnehek sa' ko'o Dios apagkok apyókxoho pók aptémakxa nak énxet'ák Israel xa ekhem nak, keñe sa' ko'o atnehek énxet'ák ahagkok.”

² Aptáhak Wesse' egegkok se'e: “Ekxekmóssegkek axta ko'o ektaqmeleykha ewáxok énxet'ák metekyawa axta, cham'a yókxexma meykexa nak énxet. Xama axta aptegyeykencha'a yaqweykenxa ellókasek apyampe m'a Israel,

³ makhawók axta ko'o ekxekmowásamáxkoho. Megkamassegweykmok ko'o makham sélásekhayo; cháxa keñamak sélenxáneykmoho nak ko'o ektaqmeleykha ewáxok sélányo.

⁴ Israel, axátekhásekxak sa' ko'o makham xép. Éxyamok sa' makham yetlo appáwasso kélaqtáwasso enéwha ekmátsa agko'.

⁵ Eknekxak sa' makham anmen yámet ma'a néten egkexe nak Samaria, etawagkok sa' nahan ekyexna anmen yámet ma'a ektáha nak apkeneykekxa.

⁶ Hakte kammok sa' ekhem yaqwayam etnehek elyennaqtéshok apkelpeywa apkelhaxneykha nak chá'a m'a néten egkexe nak Efraín: ‘Kólchexyem, ólmeyekxak Sión, aphakxa nak Dios Wesse' egegkok.’”

⁷ Aptáhak Wesse' egegkok se'e: “Kólmeneykmásses ekmátsa tén han élpayheykekxa kélwáxok ma'a Jacob énxet'ák apagkok, aptamhéyak nak apkelámha apmonye' nepyeseksa m'a apyókxoho énxet'ák. Kóleyxchesho kélmeneykmasso, sa' kóltéhek se'e: ‘Apkelwagkassek teyp énxet'ák apagkok Wesse' egegkok, apkeleymomap axta m'a Israel.’

⁸ Wának sa' ko'o elchexyók makham apkeleñama m'a apkelókxa ekpayho nak nexcheyha, wánchásekxak sa' makham ekweykmoho m'a néxa xapop nak. Elyetlanták sa' nahan elchexyók ma'a meyke nak apaqta'ák, tén han ma'a ekmaso nak apkelxega, tén han kelán'a lós'awo', tén han ma'a naqláw'ák nak; ¡elchexyók sa' apxámokma apagko'!

⁹ Elmaxneyagkok sa' elchexyók yetlo apkellekxagweykenta'. Anaqlakxak sa' ko'o m'a ényahamakxa nak yegmen, cham'a ámay meykexa nak élyapwáteyak, yaqwayam sa' melpelapmehe'. Hakte ko'o apyáp ma'a Israel, keñe hatte átnaha apketkok ma'a Efraín.

¹⁰ “Énxet'ák, kélheykha nak ekyókxoho apkelókxa, kóleyxho Wesse' egegkok appeywa, kólteme sa' nahan kóllegaksek apheykha nak makhawók agko' neyáwa wátsam ekwányam se'e: ‘Apkexpánchessegkek axta Wesse' egegkok ma'a énxet'ák Israel, yánchásekxak sa' eyke makham, keñe sa' elanha, etnehek ma'a aptémól'a keláneykha nepkések elanha m'a apnaqtósso nepkések.’

¹¹ Hakte apkelmeykekxeyk Wesse' egegkok ma'a Jacob énxet'ák apagkok, apkexakkáseykekxeyk ma'a énxet'ák apkelyennaqte apagko' axta.

¹² “Elchexyók sa', elmeneykmásseták sa' kalpaykhekxak apkelwáxok ma'a egkexe nak Sión, kalpeykessásekxak sa' apkelwáxok ma'a aqsok éltaqmalma apkelmésso nak Wesse' egegkok: cham'a hótáhap apaktek, vino tén han pexmok égmenek, nepkések tén han weyke. Elxohok sa' ma'a aqsok kélcheneykekxa' ektaqmalmal'a kélexpaqhéyak yegmen, kamaskok sa' elyelqakpok.

¹³ Kaneywagkok sa' yetlo élpayheykekxa awáxok kelán'a étkók, tén han wokma'ák, ekweykekxoho apkelwányamo nak. Altaqmelchessásekxak sa' awáxok: élpayheykekxa awáxok sa' ayaqmagkassesek ma'a éllekxagweykha, ayeykhássessamhok sa' ko'o sekmésso élpayheykekxa awáxok, megkaxók sa' ma'a ekweykenxa nak éllekxagweykha.

¹⁴ Alagkok sa' ko'o nento éltaqmalma agko' ma'a apkelmaxnéssesso nak énxet'ák ahagkok, keñe sa' énxet'ák ahagkok kayeykhágwomhok ma'a aqsok ahagkok ekxámokma nak. Ko'o sekxeyenma xa, sektáha nak Wesse'.”

¹⁵ Aptáhak Wesse' egegkok se'e: “Legáxcheyk ekpayheykha kélátog ma'a Ramá, kéllekxagweykha yetlo ekyentaxno agko' kélwáxok. Raquel ma'a, élekxagweyncha'a nak, eñama aptekyawa étchek, yámenyeyk nahan kóltaqmelchessásekxak awáxok, hakte apkeletsekkek étchek.”

¹⁶ Akke aptáhak apcháneya Wesse' egegkok se'e: “Raquel, kalwatés ekwóno; kalek aqtek égmenek, hakte kaxek sa' ekyaqmageykekxa xa ektémakxa nak ekyentaxnamo awáxok: elchexyók sa' makham étchek apkeleñama m'a apkelókxa nak apkelenmexma. Ko'o sekxeyenma xa, sektáha nak Wesse'.

¹⁷ Yetneyk xama aqsok yaqwayam kaleyxek xeye' amonye': elwaták sa' makham étchek ma'a apkelókxa nak. Ko'o sekxeyenma xa, sektáha nak Wesse'.

¹⁸ Ekleg'ak ko'o Efraín énxet'ák apagkok aptáha apkelpaqméteyncha'a apkellekxagweyncha'a yetlo élyentaxnamo apkelwáxok se'e: ‘Negko'o axta nenteme neghémo weyke yágkelwána meyke kéltámésso, ẽltámeseykegkek eyke negko'o exchep; yána agyo'ókxak makham negko'o exchep, hakte xép apteme Wesse', Dios egagkok.

¹⁹ Ekyamasmeyk axta ko'o exchep, chaqhak eyke kaxwók ewáxok ma'a sektémakxa; ekya'ásegwákxók ekyetna may'assáxma, ektekpagáha egkenyek; ekmegqágweykxók ahagko', may'ásegkok sektáhakxa eñama m'a may'assáxma sélane axta sektémakxa wokma'ák.’

²⁰ “Hatte seyásekhayo ko'o m'a Efraín énxet'ák apagkok; hatte sekmámenyého ahagko'. Apaqhetchesek eykhe chá'a ekyennaqte, mehelwánaqmeyk eyke chá'a; megkeynnayhek han chá'a ewáxok alano', apyósek apagko' nahan chá'a alano'. Ko'o sekxeyenma xa, sektáha nak Wesse'.

²¹ “Énxet'ák Israel, kólqahasák sa' ámay yaqwayam sa' kólwetekxak chá'a ekmanyehe agko'; kóltaqmelchesho sa' kéllányo m'a ámay kélyetlamakxa axta. ¡Énxet'ák Israel, kólchexyem kólmeyenta makham ma'a tegma apkelyawe kélagkok axta!

²² ¿Háxko sa' ekwánxa katnégwók néxa kélweynchámeykha aqsa ektémól'a kélketche kelwána ekxegányam la'a? Élanak ko'o axnagkok aqsok keso náxop, ko'o sektáha nak Wesse': xama kelán'a ektaqmeleykha ekpeywa kalának xama énxet.”

Énxet'ák Israel yaqwayam kataqmelekxak makham apheykha egmonye'

²³ Aptáhak Wesse' ekha apyennaqte, Dios apagkok nak Israel se'e: “Ekyaqmagkassessek sa' agkok ko'o mók ektémakxa nak apheykha m'a énxet'ák Judá, apkelhákxo sa' makham ma'a xapop apagkok nak, tén han ma'a tegma apkelyawe apagkok nak. Sa' etnehek makham apkelpeywa s'e: ‘¡Etaqmelchesek sa' Wesse' egegkok se'e egkexe ekpagkanamaxche nak, ekyetnamakxa nak ekpéwomo nentémakxa!

²⁴ Exmakha sa' énxet'ák Judá, yetlo tegma apkelyawe apagkok ma'a, tén han ma'a apkeltamheykha nak chá'a namyep, tén han ma'a apkeláneykha nak chá'a nepkések.

²⁵ Hakte alagkok sa' ko'o aptéyak tén han apyenéyak ekyawe agko' yegmen ma'a apkelyampayo nak, tén han meyke nak apkelyennaqte.”

²⁶ Ekxatakha'ak axta, élyaháha axta nahan. Peykesákxeyk axta ewáxok ektáhakxa sekwanmagko.

²⁷ Aptáhak Wesse' egegkok se'e: “Kammok sa' ekhem yaqwánxa axámásekxak ko'o énxet tén han aqsok kélnaqtósso m'a Israel tén han ma'a Judá.

²⁸ Sa' atnehek alanha yaqwayam anaqxétekhasagkokxak tén han aknekxak aqsok aktek ma'a, sekteméssessamakxa axta chá'a séláneykencha'a yaqwayam alántekkesek, tén han alyaqnegkesagkok náxop, tén han amasséssók, tén han alteméssessamhok exma ekmaso. Ko'o sekxeyenma xa, sektáha nak Wesse'.

²⁹ “Cháxa ekhem nak, kamaskok sa' katnehek kalpaqmetaxchek se'e: ‘Apteykegkek anmen yámet ekyexna ekmáske m'a apyapmeyk, keñe m'a apketchek nak eksawhoma chá'a m'a apma'ák.’

³⁰ Hakte kasawhaxchek sa' nahan chá'a apma'ák ma'a apto enxoho chá'a anmen yámet ekmáske. Eletsapok sa' chá'a eñama melya'assáxma apagkok apagko'.”

³¹ Aptáhak Wesse' egegkok se'e: “Kammok sa' ekhem yaqwánxa alánekxak makham axnagkok sélpaqhetchásamáxkoho m'a énxet'ák Israel, tén han ma'a Judá.

³² Cháxa ekhémo mók nélpaqhetchesamaxche nak, megkaxók sa' ma'a sélánéssama axta m'a apyapmeyk nano', sélmoma axta apmék sélántekkessama m'a Egipto; hakte axta eláneykegkok ma'a ekhémo mók nélpaqhetchásamáxkoho ahagkok, sektáhakxoho eykhe ko'o apagkok. Ko'o sekxeyenma xa, sektáha nak Wesse'.

³³ Keso yaqwánxa sa' katnehek ekhémo mók nélpaqhetchásamáxkoho peya nak ko'o alanaksek énxet'ák Israel ma'a ekhem sa': Apekkenchesek sa' segánamakxa ahagkok apkelwáxok, anaqtáxéssesagkok sa' nahan ma'a élchetámeykegkaxa nak apkelwáxok. Ko'o sa' hetnehek Dios apagkok, keñe sa' ko'o atnehek énxet'ák ahagkok ma'a. Ko'o sekxeyenma xa, sektáha nak Wesse'.

³⁴ Kamaskok sa' kaxwók elxekmósek pók, tén han apkelxegexma, tén han ma'a apnámakkok apancha'awo nak, yaqwayam enxoho hey'asagkohok ko'o, hakte hey'asagkohok sa' ko'o apyókxoho énxet, cham'a ekyawe nak kéláyo, ekweykekxoho m'a meyke nak kéláyo. Mayaqmagkásekxeyk sa' ko'o aqsok ekmaso apkelánéyak, megkaxénwakxók sa' chá'a kaxwók ewáxok ma'a melya'assáxma nak. Ko'o sekxeyenma xa, sektáha nak Wesse'.”

³⁵ Aptáhak Wesse' egegkok, apwesey nak Wesse' ekha apyennaqte, appekkenma nak mayáhat yaqwayam kalsaksek exma ekhem, tén han pelten, yaw'a, yaqwayam elsaksek exma axta'a, apkeltémo nak chá'a kalnextog néten yegmen ma'a wátsam ekwányam, tén han kapáwak awáxok ma'a élyaqyahayam agkok nak:

³⁶ “Massegwokmek sa' agkok xama ekhem xa segánamakxa sekpekkenma nak ko'o, kamaskok sa' etnahagkok énxet'ák ahagkok Israel xa ekhem nak. Ko'o sekxeyenma xa, sektáha nak Wesse'.

³⁷ Kélwanchek sa' agkok kélyetsátegko xama ekhem ekwánxa ekyawe m'a néten, tén han kéllanawo enxoho xapop, ekweykekxoho m'a awhak nak, akxák sa' ko'o énxet'ák Israel xa ekhem nak, eñama m'a ekyókxoho aqsok ekmaso apkeláneyak. Ko'o sekxeyenma xa, sektáha nak Wesse'.”

³⁸ Aptáhak Wesse' egegkok se'e: “Kammok sa' ekhem yaqwayam kólxátekhásekxak makham ma'a tegma apwányam ahagkok, eyeynamo m'a tegma netno' nak Hananel, ekweykekxoho m'a ekwesey nak Átog Máséyak.

³⁹ Kapéwhok sa' nahan apxega nápakhaw'ék, ekweykekxoho m'a egkexe Gareb, tén sa' kataqhegwók kamyekxak ma'a ekpayho nak Goá.

⁴⁰ Hélpagkanchesek sa' ko'o ekyókxoho m'a ekyapwátegweykenxa xapop, kélátawanyamakxa nak chá'a apkeletsapma, kélchexakhamakxa nak han chá'a m'a táhap, tén han ma'a ekyókxoho yókxexma ekheykegko nak ma'a ényahamakxa nak yegmen Cedrón, ekweykekxoho m'a máséyak ekwesey nak Átog Yátnáxeg, ekpayho nak teyapmakxa ekhem, megkólyaqnegkesagkek sa' chá'a kaxwók xama enxoho xa ekyókxoho nak, megkólmasséssemek sa' nahan.”