Jeremías 2 - Biblia Enxet

Israel apyamasma Dios

¹ Epaqhetchessek axta ko'o Wesse' egegkok. Aptáhak axta seyáneya s'e:

² “Exeg sa' elpaqhetchessók ma'a énxet'ák Jerusalén; énnaqtés sa' appeywa, yaqwayam sa' kataqmelek apkelháxenmo: ‘¡Keso aptáhakxa nak appeywa Wesse' egegkok se'e! Xénwákxók ko'o ewáxok ektémakxa axta étkok, meheyenyaweykencha'a axta chá'a, cham'a sektémakxa axta etáwa', seyásekhayo axta chá'a, sétleykencha'a axta chá'a m'a yókxexma meykexa nak énxet, xapop megkólcheneykekxexa nak aqsok aktek.’

³ Élpagkanchessegkek axta ko'o m'a énxet'ák Israel, axta aptamhéyak aqsok séneykekxa éltaqmalma m'a. Asagkek axta agkok chá'a apteméssesakxa xama énxet, añássesagkohok axta chá'a ko'o wahak apkellegeykegkoho ekmaso. Ko'o sekxeyenma xa, sektáha nak Wesse' kélagkok.”

⁴ Kóleyxho Wesse' egegkok appeywa, Jacob aptawán'ák neptámen, tén han kélyókxoho Israel aphawóxama.

⁵ Aptáhak apkeláneya kéxegke Wesse' egegkok se'e: “¿Yaqsa axta aqsok ekmaso apkelweteya séláneya ko'o kélyapmeyk nano' seyamasma? Apkelyetleykekxeyk axta m'a aqsok kéláyókxa ekteme nak mékoho, mékoho apagko' axta han apkelteméssásamákpekxak ma'a.

⁶ Axta kalyetnakhayók apkelwáxok hektamok ko'o, ektáha axta sélántekkesso m'a Egipto, ektáha axta seknaqleykha m'a yókxexma meykexa nak énxet, ekyamáyekxa nak xapop, ekxámokmakxa nak maxcha'a élmattawóneg, yókxexma meykexa nak yegmen, ekxámokmakxa nak aqsok eyeymáxche', yókxexma meykexa nak ekha, meyke nak ekyeykhágwayam ma'a.

⁷ Eknaqleykenteyk axta ko'o s'e ektaqmelakxa nak xapop, yaqwayam enxoho kóltawagkok aqsok ekyexna eñama nak xa xapop nak, tén han ma'a aqsok éltaqmalma éleñama nak xa. Kélxegeykmek axta kéxegke, keñe kéletsagkassa'a xapop ahagkok, éltaqnawassáseykekxeyk axta s'e apchókxa nak, ektáha nak ko'o ahagkok ahagko'.

⁸ Mehektamsók ko'o m'a apkelmaxnéssesso énxet'ák ahagkok, mehey'ásegkok ko'o m'a énxet'ák apkelxekmósso nak segánamakxa énxet'ák ahagkok, élmexeykekxeyk ko'o m'a apkelámha apmonye'e nak, keñe m'a apkellegasso nak sekpeywa, apkelxeyenma chá'a m'a Baal ekwesey, apkelyetleykekxeyk ma'a aqsok kéleykmássesso ekteme nak mékoho.

Énxet'ák Israel apkelyekpelchamákpoho

⁹ “Cháxa keñamak sektáha nak ko'o sekpeywa s'e, sektáha nak Wesse': Alxénchásekxohok sa' ko'o kéltémakxa, kéxegke yetlo kéltawán'ák.

¹⁰ Kólmeyekxa sa' ma'a neyáwa wátsam ekwányam nak Chipre ekpayho nak taxnegwánxa ekhem, kóllano sa'; kóláphés sa' nápakha kélápháseykha m'a Quedar, yaqwayam sa' etaqmelcheshok apkelányo, temegkek kexaha nahan ekhawo nak xa aqsok nak.

¹¹ ¿Yetneya xama apheykegkaxa énxet melya'áseyak nak Dios apyaqmagkasso mók ma'a aqsok apkeláyókxa? ¡Ekteme nak eykhe aqsok kéláyókxa élmowancha'a amya'a! Keñe ko'o seyamasma m'a énxet'ák ahagkok, sekteme nak seyeymáxkoho, apkelyetleykekxo m'a aqsok kéleykmássesso ekteme nak mékoho.

¹² ¡Néten, keygwe naqtók xa aqsok nak! ¡Kalpexyennem eyeye! Ko'o sekxeyenma xa, sektáha nak Wesse'.

¹³ “Apkeláneykegkek ánet melya'assáxma m'a énxet'ák ahagkok: eyamasmeyk ko'o, sektáha nak ekteyapmakxa yegmen ekyennaqtéssamo nak egnények, apkelánéyak apagko' aptamheykegkok ma'a apkelyátamakxa nak yegmen, yámelchet élyagqaxe megkeytno nak yegmen ma'a kañe'.

Ekyaqmageykekxa apkeltémakxa Israel eñama apkelyamasma apkelyetleykha Dios

¹⁴ “Háwe kélásenneykha naqsa m'a énxet'ák Israel; axta epalleykmok yaqwayam etnahagkok kélásenneykha naqsa. ¿Yaqsa eyke ektéma kélyementamoma nak aqsok apagkok?

¹⁵ ¿Yaqsa eyke ektéma kélchetámeykmo nak ektémól'a yámakméwa, yetlo kélpáxegkáseykha ekyennaqte? Ekmaso kéltemessásekxak ma'a apchókxa; kélwatneyáseykekxók nahan ma'a tegma apkelyawe apagkok, méko nahan xama énxet enxoho apheykekxa m'a.

¹⁶ Apkelmópessessamók apkelyaqténchesso áwa' kélyetseksa'ák ma'a énxet'ák Menfis, tén han ma'a énxet'ák Tafnes.

¹⁷ Temegkek kéxegke xa ektáha nak eñama sélyamasma ko'o, sektáha nak Dios Wesse' kélagkok, sekpékessáseyak nak chá'a ámay kélagkok.

¹⁸ ¿Yaqsa kagkések kéxegke kólmeyekxak Egipto kólyahagwakxak yegmen ma'a wátsam Nilo? ¿Yaqsa kagkések kéxegke kólmeyekxak Asiria kólyahagwakxak yegmen ma'a wátsam Éufrates?

¹⁹ Kéltémakxa ekmaso kélagko' sa' kéxegke kallegassásegkokxa', kélyamasma kélyetleykha Dios sa' kalsexnena'. Kalchetam sa' kélwáxok keñe sa' kólya'ásegwók asagkek ko'o hélyenyók, tén han askehe', tén han mehélakawo enxoho, ko'o sektáha nak Dios Wesse' kélagkok. Ko'o sekxeyenma xa, sektáha nak Wesse' ekha sekyennaqte.

Israel apkenmexeykekxa Dios

²⁰ “Nanók agko' ko'o kéxegke sélenmexeykekxa', megkalyaqwámeykegkok hélyahakxoho.’ Axta kéltemék chá'a kélpaqméteykencha'a s'e: ‘Mogmenyeyk negko'o exchep agyetlawha.’ Kélláneykegkek axta kéxegke kéltémakxa megkólmasexta'a m'a néten egkexe nak tén han ma'a kóneg nak yenta'a élyentaxno pessesse agkok.

²¹ Máxa anmen yámet éltaqmalma axta ko'o ekteméssessók kéxegke séneykekxo, ektémól'a m'a anmen yámet aktek éltaqmalmal'a. ¡Kélesógweykmók kélagko' axta eyke kéxegke, massegkek axta ko'o sélyekpelche!

²² Kólchektek eykhe han kélyempe'ék kólyaqpasagkok yegmen, kólmaha chá'a ekyókxoho keltexnéyak ekwánxa enxoho kélmako kólmaha, keytek eyke aqsa chá'a ekpésyam megkólya'assáxma nahaqtók ko'o. Ko'o sekxeyenma xa, sektáha nak Wesse'.

²³ Megkólwanchek kéxegke kóltéhek kélpeywa s'e: ‘Mólpeysegkesamaxchek negko'o, mólpeykessamók han ma'a aqsok kéláyókxa élmowancha'a amya'a nak.’ Kóllano kéltémakxa axta m'a yókxexma ekyapwátegweykenxa nak xapop, kóllano ekyókxoho aqsok kélláneyak axta, kéxegke kélhémo nak yányátnáxeg apkelwána apyennaqtél'a apxega, apweynchámeykhal'a ekyókxoho yókxexma;

²⁴ yámelyeheykok kelwána ekmeymente, kélyenyeykekxal'a néten egkexe, ekseykhal'a awéhek kategyaha kennawo'. Kelanak agkok kennawo', méko kawának kamagkok. Ketamchek agkok han chá'a m'a kennawo nak, megkayampeyk chá'a: kóteyekxak chá'a m'a ekwákxo enxoho ekhem éláneykxa kelwána.

²⁵ “¡Énxet'ák Israel, nágkólnaqtawasha kélmagkok kólnaqtémha meyke kélatchesso kélmagkok, nágkólho kalyameyk kélyespa'ák! Keñe axta kéltéma makham se'e: ‘Ma', mogwanche'; nélásekhayók negko'o m'a apkeleñama nak mók nekha, ólyetlakxak sa' negko'o m'a.’

Payhawók kóllegássesagkohok Israel

²⁶ “Sa' etnahagkok elmegqeyk énxet'ák Israel, tén han énxet'ák, tén han kelwesse'e apkelwányam, tén han apkelámha apmonye'e, tén han apkelmaxnéssesso Dios énxet'ák apagkok tén han apkellegasso nak Dios appeywa m'a aptémól'a énxet apmenyexma emegqeyk kólwetagkohok apmenyexakxa;

²⁷ hakte axta aptemék chá'a apkenagkama yámet se'e: ‘Xeye' ekteme táta ahagkok’, tén axta meteymog aptéma chá'a apkelanagkama s'e: ‘Xeye' ekteme méme ahagkok.’ Keñe axta ko'o seyheykekxo apkap'ák, axta hélányo'. Tén axta apkelwet'a enxoho chá'a ekmaso apheykha, etnehek chá'a heyának se'e: ‘¡Hẽlwagkasseta negko'o teyp!’

²⁸ Énxet'ák Judá, ¿háxko ekheykegkaxa m'a aqsok kéláyókxa kélláneyak axta? ¡Xámok agko' kéxegke aqsok kéláyókxa, hawók ma'a tegma apkelyawe kélagkok nak! ¡Tásek sa' kalxegmak ma'a, awanchek sa' kexaha kalwagkasek teyp eyáhapwa'a sa' ekmaso kélheykha!

²⁹ ¿Yaqsa ektéma sélxéneykencha'a nak chá'a ko'o? Kélyókxoho élenmexeykekxak ko'o kéxegke. Ko'o sekxeyenma xa, sektáha nak Wesse'.

³⁰ Chaqhémok ko'o séllegassáseykegkoho m'a kélketchek nak kéxegke, mopmenyék elya'ásegwók ma'a séltémókxa nak etnahagkok. Kélhawók kéxegke m'a, yámakméwa éllo, kélnápeykekxeyk ma'a énxet'ák kélagkok apkellegasso nak sekpeywa.

³¹ (Kéxegke nahan, kaxwe nak kélektegeykekxa makham, kóltaqmelchesho kélháxenmo Wesse' egegkok appeywa.) Israel, ¿yókxexma meykexa énxet kélagkok ya axta ko'o kéxegke?, ¿xapop ekyaqtéssamakxa exma ya axta ko'o? Énxet'ák ahagkok, ¿yaqsa ektéma kéltéma nak chá'a kélpeywa s'e? ‘Nenteme egagko' negko'o kaxwók nentamheykegkok; wánxa kaxwók negye'eykekxa exchep’.

³² ¿Kalwánaqmohoya chá'a xama kelán'a aqsok étkók agkok élmomnáwa, tén han élmeykha axta chá'a élnáxameykha m'a élyamhopma? Keñe énxet'ák ahagkok, nanók ekmasse élxéneykha apkelwáxok ko'o.

³³ “¡Kélya'ásegkok kélagko' nak la'a kéxegke ámay yaqwayam kóltegyaha kélásekhayókxa! ¡Kélxekmósso aqsok ekmaso kélnámakkok kéxegke!

³⁴ Apkeltexneymákpek kélnaqta éma apagkok ma'a énxet'ák meyke nak aqsok apagkok, tén han ma'a meyke nak apkeltémakxa, énxet'ák megkólweteya axta chá'a kéxegke elanagkok xama enxoho m'a aqsok ekmaso agko'.

³⁵ Naqsók eykhe chá'a kéltéma kélpeywa kélyókxoho s'e: ‘Méko negko'o néltémakxa. Massék negko'o sẽltaqnaweygko m'a Dios.’ Alyekpelkohok sa' ko'o kaxwók kéxegke, hakte kélxeyenmeyk chá'a megkóllánéyak megkólya'assáxma.

³⁶ ¿Yaqsa ektáha kélpekhésa nak kólyaqmagkasek pók kélxegexma'a? Elyexanchesha sa' eyke nahan kéxegke m'a énxet'ák Egipto, ektéma axta m'a énxet'ák Asiria.

³⁷ Kóltaqhohok sa' makham kéxegke kéleñama Egipto, yetlo ekyawe agko' kélmegqakto, hakte élyetnakhássek ko'o m'a kélásenneykekxo nak chá'a kéxegke, méko sa' kataksek kéxegke kélteme kélxegexma'a m'a.”