Jeremías 15 - Biblia Enxet

Énxet'ák kéltennasso kóllegássesagkoho'

¹ Aptáhak axta ko'o seyáneya Wesse' egegkok se'e: “Elwaták sa' eykhe Moisés tén han Samuel se'e sekhakxa nak ko'o, megkalepyóshek sa' eyke ko'o alanok xa énxet'ák nak. Yána sa' elántépok se'e sekhakxa nak, tén han elxog.

² Apkelmaxneyáha sa' agkok háxko elmahagkok, eltennés sa' sektáha ko'o sekpeywa s'e: “Énxet apkelxénamap nak eletsapok negmasse ekmaso, negmasse ekmaso sa' kalnápok; énxet apkelxénamap nak eletsapok kempakhakma, kempakhakma sa' eletsapok; énxet apkelxénamap nak eletsapok meyk élnapma, meyk élnapma sa' eletsapok; énxet apkelxénamap nak kólnaqlakxak megkatnahakxa apkelókxa, kólnaqlakxak sa' megkatnahakxa apkelókxa'.’

³ “Ektáhak ko'o sekpeywa s'e, sektáha nak Wesse': Wahak sa' ko'o cuatro ektémakxa apkellegeykegkoho: etekyók sa' kempakhakma, semheg sa' kalyenyawasha, máma sa' etawagkok aphápetek, tén han aqsok nawha'ák éllo.

⁴ Wának sa' elpexyennók apkelaye elanok apyókxoho énxet'ák apheykha nak ekyókxoho keso náxop yaqwánxa sa' ko'o atnéssesek ma'a, eñama apteméssessamakxa axta Jerusalén ma'a Manasés, wesse' apwányam axta m'a Judá, Ezequías axta apketche.

⁵ “¿Yaqsa sa' kapyóshok kalanok xép Jerusalén? ¿Yaqsa sa' kaqhek awáxok xép kalano'? ¿Yaqsa sa' keytnakhaksohok awáxok ektémakxa exchep?

⁶ Eyamasmeyk xép, massegkek sélányo. Ko'o sekxeyenma xa, sektáha nak Wesse'. Cháxa keñamak séleklágweykmo nak séláneykha aqsa, ekya'ássek néten émek peya añássesagkoho', keñe sekmasséssekmo.

⁷ Éxpánchessessek énxet'ák apagkok ektémól'a pa'at apák, élántekkessek tegma apkelyawe nak se'e apchókxa; meyke apketchek ektemessásak énxet'ák ahagkok, ekmasséssekme', hakte mopmenyeyk elwátésagkok ma'a apkeltémakxa ekmaso.

⁸ Ekxámásekxeyk nahan nepyeseksa m'a kelán'a tampe, yeykhásseykmók ma'a ekweykenxa nak ekxámokma yagkamex ekhéyak neyáwa wátsam ekwányam. Yetseksók ekhem agko' axta ko'o élnápak ma'a chána yetlo étchek wokma'ák nak makham; ekpelakkassessek axta seyhe éltamheykha awáxok, tén han élaye.

⁹ Élyennákxoho axta chá'a keletsapak ma'a kelán'ák apxámokma nak étchek, kelántaxneykxeyk axta chá'a élennama; ekyáqtéssóxma axta chá'a tamhákxak élányo m'a ekhem, kelmegqakkek axta, keleyósek axta awáxok. Kéleyméxcheyk sa' agkok chá'a kélnápakha megkóletsapma, wának sa' chá'a elnápok ma'a kélenmexma nak. Ekméssek ko'o sekpeywa, sektáha nak Wesse' apagkok.”

Jeremías appaqméteykha

¹⁰ ¡Méme, ko'o laye, ektáha axta setegkesso wánxa aqsa yaqwayam hélyamatchesha tén han alátegmoweyxchek chá'a apyókxoho énxet'ák! Mamassáseykha chá'a ko'o selyaqye ahagkok xama énxet, mehelmassáseykha nahan chá'a ko'óxa, apyókxoho énxet'ák aqsa chá'a apkeltémók hetnégwomhok exma ekmaso.

¹¹ Wesse', asagkek sa' agkok chá'a sekyetleykha exchep, katnehek sa' chá'a m'a aptémakxa nak chá'a apkeltémo hetnegwomhok exma ekmaso, malmaxnéssesa enxoho chá'a ko'o m'a sélenmexma nak, eyesagko enxoho chá'a ektáhakxa, tén han apkellegágkoho enxoho chá'a élyentaxno apkelwáxok.

Dios aplegasso ellegássesagkohok énxet'ák Israel

¹² “¿Yaqsa awanchek kantaksek ma'a sawo eñama nak nexcheyha tén han sawo ekyexwase?

¹³ Énxet'ák Israel, almések sa' ko'o kéxegke kélenmexma, ekyókxoho aqsok kélagkok tén han aqsok élmomnáwa kélagkok, tén han ma'a ekyókxoho aqsok ekhéyak nak kañe' xapop kélagkok, yaqwayam enxoho kólsakxak eñama m'a ekyókxoho kéltémakxa nak megkólya'assáxma.

¹⁴ Apkelásenneykha naqsa sa' ko'o atnéssesek kéxegke kélenmexma m'a yókxexma megkólya'ásegkaxa nak, hakte eklókek ahagko' ko'o, máxa táxa eyáléwe sa' katnehek kamasséssók.”

Jeremías apkelmaxnagko Wesse' egegkok

¹⁵ Wesse', xép apya'áseykegkoho nak ekyókxoho aqsok, ¡kaxénwakxoho apwáxok ko'o, hepásegwata'! ¡Heyaqmagkassásekxa ko'o mók setnéssessamakxa m'a énxet'ák setwáseykegkoho nak chá'a! Nágyoho aqsa ko'o heyaqhek xa énxet'ák nak, eñama m'a ektémakxa nak xép mepekhésamap; xeyep keñamak sélyamatcháseykencha'a chá'a.

¹⁶ Epaqhetchessek axta agkok chá'a exchep, ataqmelcheshok axta chá'a ko'o sekháxenmo; hakte cha'a ekteme ko'o sepeykessáseykekxa chá'a ewáxok ma'a, tén han segkésso ekmátsa ewáxok, hakte ko'o apagkok xép Wesse' Dios ekha nak apyennaqte.

¹⁷ Mapaxqeykha chá'a ko'o m'a énxet'ák élxéneykha nak chá'a apkelwáxok wánxa elátsaha; exakkók axta ko'o ekweynchámeykha eyeynamo m'a sekxók axta semoma exchep, hakte aplókassegkek axta ko'o exchep ewáxok.

¹⁸ ¿Yaqsa ektéma megkamassegweykmo nak ko'o seklegeykegkoho ekmáske? ¿Yaqsa ektéma megkataqmelweykmo nak ko'o sekyense, neyseksa eykhe séllánésso? Máxa aptamheykekxak xép sélányo m'a ekhól'a yegmen élyenma agwetak makhawo.

Wesse' egegkok apchátegmowéyak

¹⁹ Tén axta Wesse' egegkok aptáha seyátegmowágkokxo s'e: “Ey'aweykteyk sa' agkok ko'o makham xép, amok sa' makham takha', etnekxak sa' makham séláneykha. Apkelwátessek sa' agkok appaqméteykha naqsa, apxéna enxoho aqsa wánxa m'a ekpasmomo nak chá'a énxet, xeyep sa' exének chá'a sekpeywa. Eyke payhawók elyo'ótak xép ma'a énxet'ák nak, háwe sa' xép yaqwayam ey'ókxa'.

²⁰ Máxa sawo ekyexwase kélhaxtegkessól'a tegma apwányam sa' ko'o atnéssesek xép nepyeseksa xa énxet'ák nak, megkólaqtassól'a. Yempakhakpok sa' eykhe, mexók sa' eyke, hakte ko'o sekxegexma exchep, yaqwayam awagkasek teyp, tén han amallahanchesek. Ekméssek ko'o sekpeywa, sektáha nak Wesse' apagkok.

²¹ Magwohok sa' emok ma'a énxet'ák élmasagcha'a nak apkeltémakxa, ¡awagkasek sa' teyp neyseksa apmáheyo emok ma'a énxet'ák apkelyennaqteyáseykha nak chá'a apyempe'ék!”