Isaías 57 - Biblia Enxet

¹ Apkeletsekkek agkok ma'a énxet meyke nak apkeltémakxa méko keytnakhaksohok awáxok; apmassegwokmek agkok nahan ma'a énxet éltaqmalma nak apkeltémakxa, méko kay'asagkohok apkeletsapa apkelmallana m'a aqsok ekmaso

² tén han ekyetna kaxwók ma'a meyke ektáhakxa apkelwáxok. Apkelyetlamchek axta ámay ekpéwomo keñe kaxwók apkellókasa apkelyampe m'a kañe' takhaxpop apagkok.

Apkeltaqnómap apkelpeykessamo nak chá'a kéleykmássesso

³ Kólchaqnágwatámho s'e, kéxegke, kéltamhéyak nak chá'a kelyohóxma, kélteme nak énxet aptawáseykha élyamhopma aptawán'ák neptámen tén han kelán'a ekyaqmagkáseyak pók énxet ekpathetéyak ekma chá'a ekyánmaga:

⁴ ¿Yaqsa kélasmésa kéxegke? ¿Yaqsa kélántekkessáseyncha'a kélaqta'ák kélwanyawo? ¿Yaqsa kélántekkessáseyncha'a kélaxkok? Mólya'assáxma étchek kéxegke, énxet'ák apkelmopwancha'a amya'a;

⁵ kélláneykegkek chá'a kéltémakxa ekmaso megkólmasexta'a m'a kóneg nak yenta'a robles tén han ma'a ekyókxoho yenta'a élyawe élyentaxno nak pessesse agkok, kélnapmeyk nahan chá'a sakcha'a kélméssama aqsok kéleykmássesso m'a nekhaw'ék yegmen ényé nak, élpatyapeykegkaxa nak ma'a meteymog.

⁶ “Énxet'ák Israel, kélmenyeyk kéxegke kólpeykeshok ma'a meteymog éláxñeyo éleñama nak neyseksa yegmen ényé, hakte yetneyk xama kélhamakxa kéltaqmelchessesso kéxegke m'a. Kólexpaqheykha chá'a vino kélmésso naqsa kélagkok ma'a, kólmések chá'a m'a aqsok aktek nentómo nak ekyexna. ¿Kapayhekxaya sa' ko'o ewáxok natámen sekwete ekyókxoho xa aqsok nak?

⁷ Kélnegkeneykegkek néten egkexe netnók ma'a kélyetnamakxa néten nak, cha'a kélmeyeykekxexa nahan chá'a kóllánegwakxak aqsok ektekyawa kélmésso m'a.

⁸ Kélnegkeneykegkek teyp átog kélagkok ma'a kéleykmássesso kélagkok élmasagcha'a nak. Massegkek ekxeyenma kélwáxok ko'o, kélhaxyawáseykegkek kélnaqta, kélheykegkek ma'a kélyetnamakxa néten ekyawe nak; kélpaqhetchásamáxkók chá'a m'a kélmáheyo nak chá'a kólpathetagkok, kóllanok chá'a m'a aqsok kéláyókxa nak.

⁹ “Kólnaqtémagkokxohok axta chá'a kólsakxések pexmok égmenek ma'a dios Mélec tén han ekxámokma agko' ma'a sokmátsa; kéláphassegkek axta nahan chá'a apseykha amya'a ekweykmoho m'a makhawók agko' nak, kélwagkassamók axta chá'a m'a apkelmaheykegkaxa nak chá'a apkeletsapma.

¹⁰ Kélyampayak axta eñama ekxámokma kélxega, axta eyke kólya'áseykegkok ekteme eyaqhémo xa ekyókxoho nak. Yetneyk axta eyke m'a ekpasmo nak chá'a, axta keñamak kélweteykekxo chá'a kélyennaqte.

¹¹ “¿Yaqsa xa aqsok kéláyókxa kéláya nak chá'a kéxegke tén han kéláyo nak chá'a, yaqwayam enxoho hélyensók ko'o sélyetleykha tén han kamassegwomhok agko' ekxeyenma kélwáxok ko'o? Ekwanmagkamchek axta aqsa ko'o mehéláyo axta, máxa malweteya axta ektemék.

¹² Axének sa' eyke ko'o kaxwók kéltémakxa kéxegke, kélanagkamchek chá'a kéxegke kataqmalmak kéltémakxa.

¹³ Kélpáxamáha sa' agkok kóltegyaha ekpasmo, megkapasmehek sa' ma'a kéleykmássesso kélagkok nak, megkalwagkasek sa' teyp. Éxchahayam sa' kalsók ekyókxoho xa; xama ekwátekhapma sa' kamasséssók. Keñe sa' ma'a ektáha nak chá'a ko'o seyáyo exek sa' chá'a m'a apchókxa, exek sa' chá'a m'a egkexe ekpagkanamaxchexa ahagkok nak.”

Énxet'ák Israel kéllegassáseykegkoho tén han kéltaqmelcháseykekxa makham

¹⁴ Keñe sa' kañexchek katnehek kalpaqmetaxchek se'e: “Kóllána sa' xama ámay éláxñeyo agko', kólyetnakhés sa' ma'a aqsok élhaxtaméyak nak chá'a ámay yaqwayam sa' elyeykhak ma'a énxet'ák ahagkok.”

¹⁵ Hakte aptáhak appeywa Meyke nak Ekhémo s'e, memassegwayam nak apwesey nak aptaqmalma: “Ekhegkek ko'o m'a netno' nak, ekpagkanamaxchexa nak, ekhegkek eyke nahan nepyeseksa m'a énxet'ák apkelyelqamákpoho nak tén han ma'a apkellegeykegkoho nak ekyentaxno apkelwáxok, yaqwayam enxoho alwasqakkásekxohok chá'a tén han agkeyásekxak chá'a apkelyennaqte.

¹⁶ Malxénchásekxók sa' chá'a ko'o kaxwók apkeltémakxa m'a énxet'ák ahagkok maltaqnaweygkek sa' nahan chá'a yókxoho ekhem; hakte elyelqakpok katnehek nahaqtók ko'o m'a énxet'ák ektáha axta sélane.

¹⁷ Énxet'ák Israel melya'assáxma axta eyke keñamak seklama ko'o yaqwatakxoho, éllegassáseykegkók axta ko'o m'a, éxakhamchek axta nahan; énmexeykekxeyk axta eyke ko'o m'a, apkelyeheykekxók axta m'a ektémakxa axta ekmámenyého apkelwáxok elanagkok.

¹⁸ Ekweteyak ko'o apkeltémakxa m'a, altaqmelchásekxak sa' eyke, agkések sa' yaqwayam ellókasagkok apkelyampe tén han ektaqmalma agko' apheykha. Alpeykessásekxak sa' ko'o apkelwáxok ma'a élyaqhápeykha nak chá'a apkelwáxok.

¹⁹ Sa' atnehek alának apyókxoho s'e: ‘¡Tásek sa' katnehek kélheykha kélheykha nak makhawo', tásek sa' katnehek kélheykha kélheykha nak keto'! ¡Altaqmelchásekxak sa' ko'o m'a énxet'ák ahagkok!’

²⁰ Máxa eyke wátsam ekwányam ekyéhál'a yegmen ma'a énxet'ák élmasagcha'a nak apkeltémakxa megkamowánal'a kalánekxak ekyetno, élnextegkessamól'a yelpa' m'a élyaqyahayam agkok tén han ekmanyása.

²¹ Méko ektaqmalma apheykha m'a énxet'ák élmasagcha'a nak apkeltémakxa.” Dios apxeyenma xa.