Isaías 54 - Biblia Enxet

Dios segásekhayo megkamassegwayam

¹ Kelán'a megkate étche meyke nak chá'a étchek; kalpáxamha kapayhekxak awáxok; nágkeysagkoho kanneykmaksek negmeneykmasso yetlo ekmátsa awáxok, xeye' kelán'a, megkatné nak chá'a naqláwa xama enxoho, hakte aptáhak Wesse' egegkok se'e: “Xámók sa' katnehek étchek ma'a kelán'a ektaqmópeyak nak chá'a megkaxók sa' ma'a kelán'a apha nak chá'a atáwa'.”

² Kayánchásekxoho sa' ekpakxanma, kapeykásekxa sa' néten ekpakxanma ekhamakxa nak chá'a kóneg meyke ektamheykha awáxok; kalwenaqteyásekxoho sa' ma'a táma' eknaqtete nak chá'a, kalyennaqtésho sa' nahan élatchesso xapop ma'a yámet apagkok eknaqtete nak chá'a,

³ hakte kasawhekxohok sa' xeye' m'a ekyókxoho yókxexma; elmok sa' ekxámokma agko' apkelókxa m'a atawán'ák natámen nak xeye', exnakha sa' nahan ma'a tegma apkelyawe meykexa nak énxet se'e kaxwo' nak.

⁴ Nágke' aqsa, megkasmésaxcheyk sa'; megkólya'ássemek sa' nahan, méko sa' nahan xama aqsok enxoho kamegqaksek. Kalwánaqmak sa' ma'a ektémakxa axta ekmegqakto, cham'a ektémakxa axta étkok, megkaxénwakxók sa' chá'a kaxwók awáxok ma'a ektémakxa axta ekmegqasso ektamheykekxa axakko', meyke atáwa',

⁵ hakte sa' emok etnehek aptáwa' m'a ektáha axta apkelane. Wesse' ekha apyennaqte apwesey m'a; cha'a apwagkasso teyp xeye' m'a Dios Aptaqmalma nak Israel, apteme nak Dios ekyókxoho keso náxop.

⁶ Hémók axta exche' m'a xama kéltáwa' étkok agko' la'a ektaqmópeyak apyamasma atáwa', ekyentaxnamól'a awáxok, apwóneykha axta eyke makham ma'a Dios agkok nak, axta aptáhak apcháneya s'e:

⁷ “Yaqwatakxoho axta ekyamasmak xeye', yetlo ekyawe seyásekhayo sa' eyke eypetchekxak makham.

⁸ Yaqwatakxoho seklo axta ko'o ektemék sekxeganegkessama exche', megkamassegwayam seyásekhayo eyke keñamak eyósegwokmo makham sélano exche'.” Axta aptáhak ma'a Wesse' agkok, ektáha axta apwagkasso teyp.

⁹ “Ektáhak ko'o kaxwók sekxéna exche' peya mataqnókehe' tén han maxének kaxwók añássesagkoho', sektémakxa axta seyanagkama m'a Noé séltémo axta megkápekxók chá'a kaxwók yegmen ekyawe keso náxop, cham'a natámen axta eyapma yegmen ekyawe.

¹⁰ Kayaqmagkasek sa' eykhe mók élámhakxa m'a meteymog élekhahéyak nak, kalyaqnenagkok sa' eykhe nahan ma'a egkexe nak, megkayaqmagkasek eyke mók ma'a ektémakxa nak ko'o seyásekhayo exche', megkaltaqheykha nahan ma'a sekhéssamo axta mók sélpaqhetchásamáxkoho meyke ektáhakxa egwáxok nak.” Axta aptáhak ma'a Wesse', ektáha axta eyósegwayam apkelányo exche'.

Jerusalén aphaxnagkok

¹¹ “¡Tegma apwányam apmopyósa nak ektémakxa, ektegkesso nak éxchahayam ekyennaqte, meyke nak yaqwayam kapeykessásekxak apwáxok! Anegkenchesagkok sa' ko'o exchep meteymog apagkok ma'a néten nak meteymog ekpésyam élyenma, keñe sa' apowhak ekyennaqtéssamakxa nak ma'a meteymog élyápaqmate;

¹² keñe sa' meteymog élyexwase alanaksek ma'a tegma apkelwenaqte apagkok nak, keñe sa' atña'ák apagkok alanaksek ma'a meteymog élyápaqmate élpaxqamáxchel'a hó pa'at, keñe sa' meteymog éltaqmalma alanaksek ekyókxoho m'a kélhaxta nak nepyáwa'.

¹³ Alxekmósek sa' ko'o apyókxoho m'a énxet'ák apagkok; awanhók agko' sa' katnehek ektaqmalma apheykha m'a apyókxoho nak.

¹⁴ Keynnaqtések sa' xeyep ma'a ekpéwomo nak nentémakxa, kamaskok sa' kóltawasagkoho', kamaskok sa' nahan apkelmenaye, kamaskok sa' nahan kapekhaksek apwáxok ma'a apyegwakto nak.

¹⁵ Apketamokmek sa' agkok chá'a énxet háwe sa' ko'o eñama séltémo, emenxenek sa' chá'a exchep ma'a apketámeyam nak chá'a.

¹⁶ “Elano, éláneyak axta ko'o m'a apkelane nak chá'a sawo apkelwatcháseykegkoho nak chá'a m'a táxa átex agkok, apkelane nak chá'a m'a mók ektémakxa kélmeykha kélanchesso kempakhakma; éláneyak axta nahan ma'a énxet tekyawa yáp yaqwayam enxoho etwasha ekyókxoho aqsok;

¹⁷ méko axta eyke éláneya xama enxoho m'a kélmeykha ekmowána enxoho kamasséssók xép. Elwanmeyásekxak sa' apyókxoho m'a ektáha nak apxéneykha. Keso sekméssamo nak chá'a ko'o ektáha nak sétleykha s'e: negwayam teyp.” Wesse' egegkok xa ektáha nak apxeyenma.