Isaías 52 - Biblia Enxet

Jerusalén apxénamap kólwagkasek teyp

¹ Sión, exatakha', énnákxoho; Jerusalén, tegma apwányam aptaqmalma, elántaxnekxa apkelnaqta apkeltaqmalma apagko' nak, hakte melántexek sa' chá'a kaxwók kañe' apwáxok ma'a énxet'ák melya'áseyak nak Dios, tén han ma'a élmanyása nak apyempe'ék.

² Jerusalén, etnemekxa néten, epaxnexchaha apyempehek xapop ánek, exa néten taháno ekyawe ektaqmalma. Sión, apyetchesamakpoho nak kelán'a étkok ekmomaxche, elek kaxwók apyespok xa kéltete nak aqsok ekyentaxno.

³ Aptáhak Wesse' egegkok se'e: “Méko axta ketse' enxoho ekyánmaga sekxawe ko'o kélnaqleykekxoho axta kéxegke yaqwayam kólteméssesek kélásenneykha naqsa; méko sa' nahan ketse' enxoho ko'o ayenyók ekyánmaga sélwagkasso teyp se'e kaxwo nak.

⁴ Axta apkelmeheykegkok sekxók énxet'ák ahagkok ma'a Egipto, apkelheykmek axta m'a, axta eyke aptamheykegkok ma'a aptémól'a énxet apkeleñama nak mók apkelókxa; tén axta natámen apnaqtawáseykegkoho énxet'ák Asiria meykexho aqsok ekmaso apkelánéyak.

⁵ Keñe kaxwo', ¿Yaqsa sekwet'a? Meykexho aqsok ekmaso apkelánéyak kélnaqlákxak énxet'ák ahagkok ma'a Babilonia. Apkeleykpók apkelpaqméteyncha'a ekyennaqte m'a ektáha nak apkelma, megkeytyapweykmok selókáséyak.

⁶ Kammok sa' eyke ekhem yaqwánxa elyekpelchágwók tén han elya'ásegwók énxet'ák ahagkok sektéma ko'o sélanagkama s'e: ko'o Wesse' kélagkok.”

⁷ ¡Táse' nak la'a agwetak ewak néten egkexe m'a apseykha nak amya'a ektaqmela, apseykha nak ma'a amya'a meyke ektáhakxa egwáxok, apxeyenma nak ma'a ektémakxa sẽlmallahanchesso aqsok ekmaso apteme nak yának Sión se'e: “Wesse' apwányam ma'a Dios apagkok nak xép!”

⁸ ¡Kóleyxho! Apkelpaqmetchek ekyennaqte agko' ma'a énxet'ák kélagkok apkeleyxcháseykha nak chá'a, apsawhekpók apkelpáxameyncha'a yetlo élpayheykekxa apkelwáxok, hakte apkelwet'ak apaqta'ák apagko' ektáhakxa apweykta makham Wesse' egegkok ma'a Sión.

⁹ ¡Kólwehesha ekyennaqte agko' kólátsaha, kélheykha nak Jerusalén tegma apwányam kéltawáseykha nak, hakte apkelásekhákxók Wesse' egegkok ma'a énxet'ák apagkok, apwagkassek teyp ma'a Jerusalén!

¹⁰ Apxekmóssek apmopwána Wesse' egegkok nápaqta'awók ma'a apyókxoho pók aptémakxa énxet'ák. Kólya'asagkohok sa' ekyókxoho keso náxop sẽlwagkasa teyp ma'a Dios egagkok.

¹¹ ¡Kólántép kaxwók Babilonia, kólántép, nágkólpaknegwomho kaxwók xama aqsok ekmanyása, kólántép kaxwók Babilonia! ¡Kólmópesaxkoho kaxwo' kélseykha nak chá'a m'a aqsok kélmeykegkaxa apagkok nak ma'a Wesse' egegkok!

¹² Megkólpekhesha sa' eyke kólántépok, megkólenyahagkek sa' nahan, hakte elanha sa' ma'a Wesse' Israel Dios apagkok nak.

Wesse' egegkok apkeláneykha aplegeykegkoho tén han apmallane

¹³ Tásek sa' katnehek ekteyapma aqsok apkelane m'a séláneykha, kéláyo sa' kóltéhek, kólhéssók sa' ma'a netnók agko' nak.

¹⁴ Cháxa ektáhakxa nak apxámokma énxet élpelakkasa apkelwete xa, apkelwet'a ektáhakxa m'a nápat ekyaqmagkasa mók ektémakxa, ekmassa ekhawo m'a ektémakxal'a nápat énxet,

¹⁵ sa' katnehek nahan kalpelakkasek elwetak ma'a apyókxoho pók aptémakxa nak chá'a énxet'ák; apkelwet'ak sa' agkok ma'a kelwesse'e apkelwányam nak, elwanmeyagkok sa' aqsa, hakte elwetak sa' ma'a aqsok megkóltennassama axta, elyekpelkohok sa' ma'a mellegaya axta kaxénaxche'.