Isaías 5 - Biblia Enxet

Judá kélyetcháseykekxoho kélcheneykekxexa anmen yámet

¹ Anneykmássesek sa' ko'o émók seyásekhayo, negmeneykmasso, apkelánesso axta m'a anmen yámet apkeneykekxa. Yetneyk ko'o xama émók apkeneykekxa anmen yámet ma'a xapop megkeyssamakxa nak katyapok aqsok kélcheneykekxa.

² Appeyncheykmek axta xapop, apkelhaxyawassegkek axta nahan meteymog apcháxñessama, keñe apkeneykekxo m'a anmen yámet axchakkok éltaqmalma agko' nak. Apxátekhassegkek axta nahan xama tegma apwenaqte netnók ma'a neyseksa nak apkeneykekxexa, apkeláneyak axta nahan ma'a apkelyaqhapmakxa anmen yámet ekyexna. Apkelhaxanmeyk axta nahan keyxek anmen yámet ekmátsa nak ekyexna m'a émók nak, keñe ekyexnama m'a anmen yámet ekmáske nak ekyexna.

³ Kaxwo', kéxegke kélheykha nak Jerusalén, énxet'ák kéleñama nak Judá, kólxén, ¿yaqsa eñama xa? ¿anmen yámet séneykekxaya essenhan ko'o?

⁴ ¿Yetnéya makham ko'o mók aqsok eyeyméxko atnéssesek ma'a anmen yámet séneykekxa? ¿Yetnéya makham mók aqsok eyeyméxko matnéssesa? Élhaxanmeyk axta ko'o keyxek ekmátsa ekyexna m'a, ¿yaqsa eyke ektéma ekyexnama nak ekmáske ekyexna?

⁵ Altennaksek sa' ko'o kéxegke ekxénakxa nak ewáxok atnéssesek ma'a anmen yámet séneykekxa: alhexyawássesek sa' ko'o m'a kélhaxtegkesso nak neyáwa, yaqwayam sa' kólmasséssók; alpáxqatchesek sa' ma'a meteymog kélhaxta nak neyáwa, yaqwayam sa' kalteyammaxche';

⁶ ektaqmópeyak sa' atnessásekxa'. Megkólyaqténchesagkek sa' nahan chá'a m'a axchakkok, megkólápetchesek sa' nahan chá'a m'a pa'at, kápekxak sa' ma'a am'ák tén han ma'a ekmompánaqma nak. Wának sa' nahan ko'o megkáphássesek ekmámeye m'a yaphope, yaqwayam sa' megkayássese'.

⁷ Israel apchókxa m'a apkeneykekxexa nak anmen yámet apagkok ma'a Wesse' ekha nak apyennaqte tén han ma'a Judá, cham'a apkeneykekxa apmopmenyého apagko' nak. Apkelhaxanmeyk axta katnehek kélyeheykekxoho segánamakxa apagkok Wesse' egegkok ma'a, wánxa axta eyke aqsa apweteya chá'a ekyetnama m'a nentekyawa; apkelhaxanmeyk axta katnehek ma'a ekpéwomo nak nentémakxa, wánxa axta eyke aqsa aplegaya chá'a m'a ekpayheykha nak egátog nenlegeykegkoho ekmáske.

Élmasagcha'a apkeltémakxa yaqwayam kóllegássesagkoho'

⁸ ¡Kéxegke laye, kélxámáséyak nak kélmà kélxanák, kélxámáséyak nak yókxexma kélagkok, ekweykmoho megkóleygkesa ketsék ma'a kélnámakkok, tén han kélheykha nak ma'a kañe', kélanagko nak kóltáhak wánxa kélxakcha'awók kélagkok ma'a apchókxa!

⁹ Naqsók ko'o aptáha appeywa seyáneya Wesse' ekha nak apyennaqte s'e: “Apxámok sa' tegma kólmasséssók; cham'a apkelyawe nak tén han ma'a apkeltaqmalma nak, méko sa' kaxnekxak xama m'a.

¹⁰ Xama mahamo étkok sa' kaxwók katyapok anmen yámet égmenek ma'a trescientos metros nak ekwenaqte kélcheneykekxa m'a anmen yámet. Keñe sa' xama yágkentamáhak ekláneyo hótáhap ma'a diez yágkentamáhak élláneykegkoho nak kélyemlasso m'a hótáhap apaktek.”

¹¹ ¡Kéxegke laye, kélnaqxétekheykegkoho nak axto'ók agko' kólyenagkok anmen yaqwayam kalnápok, kélwagkassamo nak axta'a megkallágwayam ma'a vino!

¹² Keytek chá'a kélháxenmo arpa apkelpáwá, tén han ma'a pók aptémakxa nak chá'a yát'axpog, tén han kéltekpaga nak chá'a tén han ma'a yámámok kélpáwasso nak. Awanhek nahan chá'a katnehek vino kéllane m'a ektámáxche ekyawe, keñe megkaxeyenma chá'a kélwáxok ma'a aqsok apkelane nak chá'a m'a Wesse' egegkok, megkólya'ásegkok ma'a aqsok apkelane nak.

¹³ Kólnaqlakxak sa' megkatnahakxa nak apkelókxa m'a énxet'ák ahagkok, eñama megkalyaqwáméyak elya'asagkoho'. Eletsapok sa' meyk tén han hem át'ák ma'a apyókxoho énxet, ekweykekxoho m'a apkelámha apmonye'e apagkok.

¹⁴ Mayhak ekyawe agko' átog ma'a takhaxpop, máxa m'a xama aqsok nawhak eklól'a kamayhek, yaqwayam kalmenaqsapok ma'a énxet'ák ekweykekxoho m'a apkelámha apmonye'e apagkok, cham'a énxet'ák ekmátsa nak chá'a eneywagkok yetlo apyennegkessóxma.

¹⁵ Kóneg sa' kóltemessásekxak apyókxoho m'a énxet'ák; elháxahagkok sa' apkelmegqakto m'a énxet'ák apkeleymákpoho nak.

¹⁶ Exekmósek sa' apteme apwányam apagko' Dios ekha nak apyennaqte m'a apkelana sa' apkelyekpelchémo; exekmósek sa' apteme aptaqmalma apkelyekpelchássásawo sa' ma'a Dios apteme nak Appagkanamap.

¹⁷ Kólmasséssók sa' ma'a tegma apkelyawe, etawagkok sa' pa'at nepkések tén han yát'ay ma'a nepyeseksa nak tegma aphopák appalleyam.

¹⁸ ¡Kéxegke laye, kélseykha nak chá'a kéltémakxa élmasagcha'a yetlo kélmowána amya'a, kélyenyawáseykha nak chá'a megkólya'assáxma, ektémól'a kólyenyawaksek ma'a yátnáxeg apyenyawasso!

¹⁹ Kéxegke kélteme nak chá'a kólpaqmétek se'e: “Tásek sa' elának heykxe Dios ma'a aptamheykha apmáheyo nak elána', yaqwayam sa' agweta'; tásek sa' epekhaksohok elának Dios Appagkanamap nak Israel ma'a ekxeyenma nak apwáxok elána', yaqwayam sa' agya'asagkoho'.”

²⁰ ¡Kéxegke laye, kélxeyenma nak ektaqmalma m'a ekmaso nak, tén han kélxeyenma nak ekmaso m'a ektaqmalma nak; kéltemessáseykekxoho nak han élseyéxma m'a ekyaqtessóxma, keñe ekyáqtessóxma m'a élseyéxma nak; kéltemessáseykekxo nak han ekmátsa m'a ekmáske nak, keñe ekmátsa kéltemessáseykekxo m'a ekmáske nak!

²¹ ¡Kéxegke laye, kélanagko nak kóltáhak ekha kélmowancha'a kéltemessásamáxche nak ekha kélya'áseyak aqsok!

²² ¡Kéxegke laye, meyke nak kaxhok kólyenagkok ma'a vino, meyke nak kayeykhássamhok kélmowancha'a kélencheheykekxa mók ma'a anmen segaqhamo nak!

²³ Kéxegke, kélmà nak selyaqye kólánéxchek kólxének meyke aptémakxa m'a énxet apsexnánémap nak, keñe megkóllanók ma'a énxet meyke nak aptémakxa.

²⁴ Sa' kóltéhek kéxegkáxa kólmassegwók ma'a ektémól'a táxa kalwatnek ma'a pa'at apák, tén han ektémól'a táxa eyáléwe kalwatnek ma'a yámet áwa' apák élyamayél'a, ektémól'a m'a aqsok kélcheneykekxa ektepelchamáxchel'a m'a kepmenák, ekmassegwayam la'a aqsa m'a exnamok ektémól'a m'a xóp ekpánmal'a. Hakte kéltaqnagkamchek ma'a Wesse' ekha nak apyennaqte nélxekmowásamáxche apagkok, tén han ma'a apkeltémókxa nak chá'a kóltéhek, cham'a Dios Appagkanamap nak ma'a Israel.

²⁵ Cháxa keñamak apkeltaqnaweygko nak Wesse' egegkok ma'a énxet'ák apagkok, apkellegassásegkók nahan. Kelyawheyha m'a egkexe nak, máxa aqsok apák kélchexakhál'a táhak ekhéyak kélhapák ma'a ámay awáxok. Makke kamassak makham aplo m'a Wesse' egegkok; xénchek makham apwáxok ellegássesagkoho'.

²⁶ Apya'ássek néten bandera m'a Wesse' egegkok, apkelmóhéssek nahan apkelwóneyncha'a m'a énxet'ák apheykha nak makhawo'; apkeltamhók elxegmak ma'a énxet'ák apheykha nak makhawók agko' keso náxop. Kaxwók sa' nahan elwak ma'a, ekmanyehe agko' sa' elwa';

²⁷ méko nahan xama enxoho apyelqamákpoho nepyeseksa m'a, tén han ma'a apyampayo nak, méko nahan ma'a apyenmeykha enxoho, méko nahan xama enxoho ménnaqtéssamo aptete nepxet ma'a aptétamap nak, tén han élyetyapma enxoho chá'a axát'ák ma'a apkeltéto apmagkok.

²⁸ Ahamtakcha'ak agko' nahan ma'a yágke aktek apagkok, tásek nahan apkeleykesso apnaqtete táma ekyókxoho m'a yágke apagkok. Máxa nahan meteymog élyennaqte agko' la'a awáxok apmagkok ma'a yátnáxeg apkelchánte, máxa nahan samaxche élyennaqte élyéha amagkok ma'a yátnáxeg apkelyenyawasso apagkok nak;

²⁹ máxa nahan méwa ekyexwéweykha m'a apkelwehéseykha nak, ektémól'a keyxwéwha kamok ekyógkexma, keñe kaswok, méko nahan keymentemekxa'.

³⁰ Wokmek sa' agkok ekhem ekxénáxchexa yenmexek Israel xa énxet'ák nak kalpáwha sa' apwáxok, máxa sa' etnahagkok ma'a ektémól'a wátsam ekwányam kapáwak awáxok; apkelanawók sa' agkok xapop xama énxet, étak sa' katnekxak ekyaqtessóxma tén han ekhánaqte m'a ekhem eñama ekyentaxno agko' ma'a yaphope ekpésyam.