Isaías 49 - Biblia Enxet

Wesse' egegkok apkeláneykha

¹ Kóleyxho sekpeywa, kéxegke, kélheykha nak apkelókxa neyáwa wátsam ekwányam, kóltaqmelchesho kélháxenmo sekpeywa, kélheykha nak makhawók agko': Ewóneykha axta ko'o Wesse' egegkok matyeykemxa axta makham keso náxop; apxeyenmeyk axta sekwesey m'a sekyetnamakxa axta makham kañe' méme awáxok.

² Sókwenaqte ekmahamta agko' axta aptemessáseykekxak ahaxkok, eyáhakkassegkek axta apmék setaqmelchessama, etnessáseykekxeyk axta yágke ahamtek ekmahamta agko' naw'a keñe seyaqxegkessama m'a kañe' apxata nak chá'a yágke aktek apagkok.

³ Aptáhak axta seyáneya s'e: “Israel, xép apteme séláneykha, xép sa' kañék axekmósek seyeymáxkoho m'a énxet'ák.”

⁴ Keñe axta ko'o ektéma élchetamso ewáxok se'e: “Chaqhémok sektamheykencha'a, eksawhomakyek sekyennaqte meyke sekwete xama aqsok.” Naqso' eyke aptaqmelchessama Wesse' egegkok ma'a ekyókxoho aqsok sélane nak chá'a, yetneyk ekyaqmageykekxa sektamheykha m'a aphakxa nak Dios ahagkok.

⁵ Ekxawáyak ko'o ekha séláyo nápaqtók Dios Wesse' ahagkok, hakte cha'a apteme sénnaqtésso m'a. Aptáhak Wesse' egegkok se'e, ektáha axta sélane sekyetnamakxa kañe' méme awáxok yaqwayam atnehek apkeláneykha, yaqwayam enxoho wának elchexyók makham ma'a énxet'ák Israel, cham'a Jacob énxet'ák apagkok nak, yaqwayam enxoho elyepetchegwaták makham:

⁶ “Mopwanchek xép etnehek séláneykha wánxa apkelánekxésso apheykha m'a Jacob énxet'ák apagkok tén han yaqwayam enaqlanták makham ma'a énxet'ák Israel apkeleymomap nak meletsapma; atnéssesek sa' nahan ko'o exchep élseyéxma apagkok ma'a apyókxoho pók aptémakxa énxet'ák, yaqwayam sa' eswok nélwagkásamáxche teyp ahagkok ma'a makhawók agko' nak keso náxop.”

⁷ Aptáhak Wesse' egegkok apcháneya énxet kélwanyémo kélagko' axta chá'a s'e, cham'a Dios Aptaqmalma nak Israel, segwagkassamo nak teyp, aptaqnagkamo apagko' axta chá'a m'a pók énxet'ák nak, aptéma axta chá'a apchásenneykha naqsa m'a kelwesse'e apkello nak: “Apwet'ak sa' agkok chá'a exchep ma'a kelwesse'e apkelwányam nak tén han ma'a pók kelwesse'e nak, elchempekxak sa' chá'a néten eltekxeyagkok aptapnák xóp apmonye' exchep hakte ko'o axta sélyéseykha exchep sektáha nak Wesse' Dios Sektaqmalma m'a Israel, alánhok chá'a ko'o m'a sekxeyenma nak alána'.”

Jerusalén apxénamáp kóllánekxa'

⁸ Aptáhak Wesse' egegkok se'e: “Wokmek yaqwánxa axekmósek seyásekhayo, eyátegmowágkokxeyk nahan; wokmek ekhem nélwagkásamáxchexa teyp, ekpasmeyk nahan. Ektaqmelchessegkek ko'o exchep yaqwayam sa' elánekxak makham ekhémo mók sélpaqhetchásamáxkoho m'a énxet'ák, yaqwayam sa' elánekxak makham ma'a apchókxa, tén han etnehek apagkok ma'a xapop kélsawhomo axta aqsok ekhéyak ma'a kañe',

⁹ yaqwayam sa' etnehek elának apkelmomap nak se'e: ‘Kólántép’, yaqwayam sa' etnehek elának apheykha nak ekyáqtésakxaxma s'e: ‘Kólántép élsakókxaxma.’ Kólwetak sa' chá'a pa'at ekyókxoho m'a nekhaw'ék ámay, kaxek sa' chá'a ektéyak kélnaqtósso ekyókxoho m'a egkexe meykexa nak chá'a xama aqsok.

¹⁰ “Megkalnáphek sa' chá'a meyk megkalnáphek sa' nahan chá'a ekhem, kamaskok sa' nahan élpekhésa m'a ekmexanmaxma mayáhat, hakte élásekhayók ko'o m'a, eknaqleykha nahan chá'a, anaqlakxak sa' nahan ma'a élánteyapmakxa nak yegmen.

¹¹ Alának sa' ko'o xama ámay ma'a neyseksa nak meteymog élekhahéyak, meyke élyapwátéyak sa' atnéssesek.”

¹² ¡Kólenmexho! Makhawók apkeleñamak ma'a: nápakha apkeleñamak ma'a nexcheyha, keñe nahan nápakha m'a taxnegwánxa ekhem nak, keñe nahan nápakha m'a yókxexma Asuán.

¹³ ¡Néten, kalpáxamha kapayhekxak awáxok! ¡Xapop, kayánchesho agko' ekpayheykekxa awáxok! ¡Meteymog élekhahéyak, kólpáxamha ekyennaqte kólessawasha! Hakte apkelpeykessásekxeyk makham apkelwáxok Wesse' egegkok ma'a énxet'ák apagkok, apkelásekhákxók makham ma'a apkellegeykegkoho nak ekyentaxno apkelwáxok.

¹⁴ “Keñe m'a Sión ektáha s'e: ‘Eyamasmeyk ko'o m'a Wesse' egegkok, massegkek ko'o ekxeyenma apwáxok ma'a Dios ahagkok.’

¹⁵ ¿Kalwagqámhoya chá'a étche xama kelán'a, ektáha nak chá'a étche agko'? ¿Kalwatéssamhoya nahan chá'a eyásekhayo? Kalwagqámak sa' eykhe chá'a m'a mehelwagqámhek sa' eyke ko'o exche'.

¹⁶ Élqahassegkek ko'o exche' awáxok emék, yókxoho ekhem sekwete m'a kélhaxta nak neyáwa'.

¹⁷ Yahamók apya'awa m'a apkeláneykekxa nak, kaxnók ma'a ektáha axta aptegkesso; apkelántekkek kaxwók ma'a ektáha axta apketsagkasso.

¹⁸ Kalyeheykha, kasawheykha exma neyáwa', kalano ektáhakxa apwakhegwa'akto apyókxoho énxet, tén han ektáhakxa apkelye'eykekta exche'. “Naqsók ko'o sekxéna, sektáha nak Wesse' peya elxohok aqsok étkók élmomnáwa xa apyókxoho nak yaqwayam sa' kawakhésaxchek xeye', ektémól'a kélnáxegkáseykha m'a xama kelán'a ekmáheyól'a kalyamhápok.

¹⁹ Apchókxa ekmaso axta exche' kéltemessáseykekxa, kélmassésseykmek axta, kélsawhomók axta aqsok ekhéyak ma'a kañe'; ketsék sa' eyke kaxwók katnehek ma'a xapop agkok yaqwayam sa' exmakha m'a énxet'ák agkok. Makhawók eyke kaxwók apkelmahágkok ma'a ektáha axta apketsagkasso.

²⁰ Keñe sa' ma'a étchek élxeyenma axta apkelxegáneykmo, sa' etnehek yának se'e: ‘Ketsék agko' se'e apchókxa nak, manxohók negko'o; hentegyesha sa' yókxexma yaqwayam aghakha.’

²¹ Keñe sa' xeye' katnehek awáxok se'e: ‘¿Yaqsa axta setasso ko'o xa étchek nak? Méko axta ko'o étchek, mowanchek nahan óta'; élyentameykekxeyk axta ko'o megkatnahakxa seyókxa, ektaqmópeykegkek axta, ¿Yaqsa séktegkessesso ko'o xa? Exakkók axta ko'o ektaqmópeykegkok, ¿háxko eyke apkeleñamakxa xa?’”

²² Aptáhak Wesse' egegkok se'e: “Ay'ássesek sa' ko'o néten émek ma'a pók aptémakxa nak chá'a énxet'ák; apekkenchessek sa' xama aqsok magkenatchesso yaqwayam sa' elqeynenták enaqlantagkasek ma'a étchek apkelennay'a nak, tén han ma'a kelwán'ák nak.

²³ Sa' katnehek ekteme yapmeyk ma'a kelwesse'e apkelwányam nak keñe sa' ektaqmelchesso chá'a m'a kelwesse'e kelwán'ák nak. Eltekxeyagkok sa' chá'a aptapnák xóp amonye' exche', ekwokmoho apkeltekxeya nápaqta'a xóp ekweykekxoho m'a kelwesse'e kelwán'ák nak, awanhók agko' sa' katnehek apcháyo. Keñe sa' kay'asagkohok ko'o sekteme Wesse', kay'asagkohok sa' nahan memegqáyhek chá'a m'a ektáha nak ko'o mehey'ásseyam.”

²⁴ ¿Kélwancheya kólyementók aqsok apkelma axta neyseksa kempakhakma m'a xama énxet apyennaqte? ¿Apwancheya nahan xama énxet apmomap exyánegkesek ma'a wesse' aplo nak?

²⁵ Apxénchek Wesse' egegkok kélwanchek kólyementók: “Kólyementemekxak sa' apkelma axta m'a énxet apyennaqte nak, kólyementemekxak sa' aqsok ekxámokma axta apkelma m'a wesse' aplo nak. Ko'o sa' alátegmoweyxchek chá'a m'a apmáheyo nak chá'a elátegmoweykpok; ko'o ahagko' sa' nahan alwagkasek teyp ma'a étchek nak xeye'.

²⁶ Wának sa' ko'o etawagkokxak aphápetek apancha'awók ma'a apsawhéssamo axta aqsok kélagkok, wának sa' kalnápekxak ma'a éma apagkok apagko' nak ektémól'a énagkok ma'a vino. Keñe sa' elya'asagkohok apyókxoho énxet ektáha ko'o sekwagkasso teyp, ko'o sektáha nak Wesse'; elya'asagkohok sa' sektáha sekmallahanchesso aqsok ekyentaxno, ko'o sektáha nak Jacob Wesse' apagkok ekha sekyennaqte.”