Isaías 47 - Biblia Enxet

Babilonia aptéyam

¹ “Kelán'a étkok Babilonia meyke nak makham atáwa', katyep, kaxa néten yagkamex; katyep néten ektaháno ekyawe, kelán'a étkok Caldea, kaxa náxop, hakte kamaskok sa' kaltamhaxchek kaxwók xeye' ektaqmalma tén han ektaqmalma émpehek.

² Kama meteymog ektekxekxo nak chá'a aqsok aktek katekxek hótáhap apaktek, kalek eyapma nak nát apáwa apkexyawe, kayaqsásekxa ekyekma kanegken yáxña'akxoho ayay'ák, kayeykhekxa náxop ma'a neyseksa wátsam;

³ kóllanok sa' agkok ekyókxa meyke apáwa, kólwetaksek sa' ma'a ekmasmakxa nak chá'a kólwetaksek. Ayaqmagkásekxak sa' ko'o mók ektémakxa, méko sa' kawának henókasha.”

⁴ Aptáhak appeywa, segmallahanchessamo nak chá'a aqsok ekyentaxno s'e, Dios Aptaqmalma nak ma'a Israel, apwesey nak Wesse' ekha apyennaqte:

⁵ “Caldea kelán'a étkok, kawanma aqsa kaxek, katex ekyáqtésakxaxma, hakte kamaskok sa' kaltamhaxchek xeye' ‘wesse' ekwányam ekyókxoho apheykegkaxa énxet'ák’.

⁶ Ekméssegkek axta ko'o yaqwayam elmegqék énxet'ák ahagkok ahagko' ma'a séltaqnaweykegko axta énxet'ák ahagkok, tén axta séltémo kalmok xeye'. Axta kalmopyósak élányo exche' m'a, kelhayak axta aqsok ekyentaxno agko' ma'a apkelwányamo nak.

⁷ Axta temék chá'a ekpeywa s'e: ‘Atnehek sa' chá'a wesse' meyke néxa'; keñe megkalchetagkáseykencha'a exche' awáxok ektémakxa xa aqsok nak, megkaxeyenmak nahan awáxok yaqweykenxa katnéssesek.

⁸ Keyxho kaxwók se'e, kelán'a, ekmámenyého nak aqsok éltaqmalma, ekhama nak chá'a néten ektaháno ekyawe ektaqmalma yetlo meyke ektamheykha awáxok, ekteme nak chá'a awáxok se'e: ‘Ko'o aqsa, méko émók sekhawo; matnehek sa' chá'a ko'o tampe', matnehek sa' nahan chá'a meyke étchek.’

⁹ Katlakkasek sa' eyke káhapwak xama ekhem agko' xeye' xa aqsok nak: Tampe' sa' katnehek, tén han meyke étchek, megkeyxek sa' ekxámokma m'a ekmowána, tén han ektémakxa nak ekxámokma agko' ma'a ekmowána katekkesek aqsok.

¹⁰ Chásenneykekxeyk axta exche' m'a ektémakxa ekmaso, axta entemék chá'a awáxok se'e: ‘Méko sét'a.’ Kelyexancháseykha axta chá'a exche' m'a ektémakxa ekya'áséyak aqsok tén han ekyekpelchémo. Axta entemék chá'a awáxok se'e: ‘Ko'o aqsa, méko émók sekhawo.’

¹¹ Káhapwak sa' eyke exche' m'a eklegeykegkoho ekmaso, yawanchek sa' kaleyxchesek ma'a ekmowána nak; kaweywenták sa' takháxet xeye' aqsok ekmaso megkamowána nak kamagkok; cham'a xama aqsok ekmaso megkaxeyenma nak awáxok katlakkasek aqsa káhapwak xeye'.

¹² Kalenxanmagkoho aqsa ektémakxa ekha ekmowána tén han ekxámokma ekmowána ekteme yohóxma eyeynamo axta élane m'a sekxók ektémakxa axta étkok, lapmaxcheyk sa' kapasmok, lapmaxcheyk sa' yeyk ma'a énxet'ák.

¹³ Apxámok apagko' axta nahan xeye' m'a appaqhetcháséyak nak chá'a, leklágweykmek axta appaqhetcháseykha. ¡Kanaqlógmak sa' kaxwók ma'a énxet'ák agkok apkelya'áseyak nak ektémakxa m'a aqsok élápogwátéyak nak néten, apkelya'áseykegkoho nak elanok aptémakxa m'a yaw'a, apkeltennasso nak chá'a yaqwánxa katnehek egmonye' yókxoho pelten, kána sa' ewagkasek teyp!

¹⁴ Aphawók eyke pa'at apák xa: kalwatnohok ma'a táxa, mopwanchek elwagkasakpok teyp neyseksa m'a táxa eyáléwe. Hakte háwe táxa átex agkok ma'a, yaqwayam enxoho kaxtek tén han kaxek nápaqta'awo'.

¹⁵ Cháxa ektémakxa kelyohóxma agkok nak xeye' xa, élpaqhetchásamáxkoho axta chá'a eyeynamo m'a sekxók ektémakxa axta étkok. Apkelweynchámeykha aqsa m'a, apkelmaheykegkek chá'a m'a apkelmaheykegkaxa nak chá'a, méko kawagkasek teyp xeye'.