Isaías 46 - Biblia Enxet

¹ Haxeyk ma'a dios Bel, yaqnenchek náxop ma'a dios Nebo. Yámelyeheykok chá'a élpatmeykha m'a aqsok kéleykmássesso, ekyentaxno élpata chá'a m'a aqsok kélnaqtósso élyampayo nak.

² Kelháxahágkek ma'a aqsok kéláyókxa nak, kelyaqnenágkek nahan meyke ekmowána kalwagkasaxchek teyp, kélnaqlákxeyk ma'a megkatnahakxa nak éleñamakxa.

³ “Jacob aptawán'ák neptámen, kóleyxho sekpeywa, kélyókxoho kéleymomáxche nak Israel énxet'ák apagkok: Élpatmeykha axta ko'o kéxegke kélheykegkaxa axta kélchána awáxok; élqeyneykha axta,

⁴ atnéssesek sa' nahan chá'a ekwokmoho kéltáha kélwányamo' xa ektáha nak; kamópak sa' eyke kélpátek, apasmok sa' eyke aqsa chá'a. Éláneyak axta ko'o kéxegke, malwátéssemek sa' sélqeyneykha; apasmok sa', alwagkasek sa' teyp.

⁵ “¿Yaqsa kélwanchek hélhéshok ko'o kéxegke? ¿Yaqsa kaxének kélwáxok axhok ko'o héllano'?

⁶ Yetneyk énxet apkelhaxyawasso nak chá'a ekxámokma sawo ekyátekto élmomnáwa m'a nahápa apagkok tén han apkelyetsátéyak nak chá'a kélyetsátéyak ma'a sawo ekmope élmomnáwa; keñe yáneyha chá'a xama apkelane nak chá'a sawo yának elanaksek xama aqsok apcháyókxa yaqwayam eltekxók aptapnák amonye' tén han elpeykesho'.

⁷ Epatmekxak chá'a, keñe eswok; etnegkessók chá'a néten ma'a yaqwánxa enxoho etnegkesha, keytek nahan ma'a meyke éltaqhaheykha. Elpáxamha eykhe ekyennaqte eltamhok kapasmok megkátegmowagkek eyke, megkawagkasek nahan teyp ma'a ektémakxa nak aplegeykegkoho ekyentaxno.

⁸ “Énxet'ák megkólya'assáxma, kaxénwakxoho kélwáxok se'e, nágkólteme eyaqhémo kaxénmakha kélwáxok aqsok, kóltaqmelchesho élchetámeykha kélwáxok;

⁹ kaxénwakxoho kélwáxok ma'a ektémakxa axta nentámen cham'a nanók agko' axta. Ko'o sekteme Dios, méko pók; ko'o Dios, méko pók sekhawo ko'o.

¹⁰ Ekxeyenmeyk axta ko'o yaqwánxa katnehek ektemegwánxa néxa m'a sekxók eyeynókxa axta; ekxeyenmeyk axta yaqwánxa katnehek egmonye' m'a sekxók megkatnamakxa axta makham. Axta ektemék ko'o s'e: Kalanaxchek sa' ma'a aqsok sekmáheyo nak alána'; alának sa' ko'o ekyókxoho m'a sekxeyenma nak alána'.

¹¹ Ekwóneyha ko'o xama énxet apkeñama nak teyapmakxa ekhem, makhawók sa' yenyeyk exegma', ektémól'a m'a náta ekyawe ekteykekxohol'a mók ápetek elánegwak sa' ekyókxoho m'a aqsok sekmáheyo nak alána'. Sa' atnehek alának aqsok ma'a sektáhakxa axta sekxeyenma, cham'a yaqwánxa axta atnehek, alának sa' nahan.

¹² Énxet'ák, élyennaqte nak kélwáxok, kóleyxho sekpeywa, élxeyenma nak chá'a kélwáxok megkólwagkasaxcheyk teyp.

¹³ Eyágketchessa'ak ko'o m'a sektamheykha segwagkassamo nak teyp; yahamók agko' ko'o kawak ma'a nélwagkásamáxche teyp ahagkok nak, megkeytnók makhawo'. Awagkasek sa' ko'o teyp ma'a Sión agkések sa' Israel ma'a ektémakxa nak seyeymáxkoho.