Isaías 42 - Biblia Enxet

Wesse' egegkok apkeláneykha

¹ “Keso seyásenneykha ko'o s'e, sekpasmoma nak chá'a, sélyéseykha axta, ekleklamo nak ewáxok aptémakxa'. Ekméssegkek ko'o espíritu ahagkok xa yaqwayam enxoho etaqmelchessásekxak apheykha m'a apyókxoho pók aptémakxa nak chá'a énxet'ák.

² Melpáxamha sa', mepaqmétek sa' ekyennaqte agko', meltamhók sa' kañexchek appeywa m'a ámay nak,

³ megyentaksek sa' ma'a yámámok ektaqhé nak mespanchesek sa' nahan ma'a pápa táxa ekmayósa eyápogwate nak. Naqsók sa' etaqmelchessásekxak apheykha énxet'ák ma'a.

⁴ Mellókasek sa' apyampé, meyelqakpek sa' nahan, ekwokmoho aptaqmelchessásekxo apheykha énxet'ák keso náxop. Eleyxmakha sa' chá'a nélxekmowásamáxche' apagkok ma'a énxet'ák apheykha nak neyáwa wátsam ekwányam.”

⁵ Aptáhak apcháneya apkeláneykha Dios se'e, Dios apkelane axta m'a néten tén han appeykesso axta, apkelane axta m'a xapop tén han apkelántekkesso axta aqsok ekhéyak nak ma'a awáxok, apmésso nak apkelyennaqte tén han apkelennama m'a énxet'ák apheykha ma'a kañe':

⁶ “Ekwóneykha axta ko'o exchep, ko'o sektáha nak Wesse', ekmeyk axta apmek, yaqwayam enxoho etnehek apkelwagkasso teyp énxet'ák; éláneyak axta ko'o exchep, hakte émenyeyk axta etnehek magkenatchesso ekhémo mók sélpaqhetchásamáxkoho ko'o m'a énxet'ák, tén han élseyéxma apagkok ma'a pók aptémakxa nak chá'a énxet'ák,

⁷ yaqwayam enxoho elwetásekxaxma m'a meyke nak apaqta'ák tén han elántekkesek kañe' m'a apkelmomap nak, cham'a kañe' apkelweynchámeykegkaxa nak ekyáqtésakxaxma.

⁸ Ko'o sekteme Wesse', cháxa sekwesey ko'o xa, magwohók sa' ko'o kólmések seyeymáxkoho xama enxoho m'a mók aqsok nak tén han kóltéhek kéláyo m'a aqsok kéleykmássesso, ko'o eyke aqsa payhawók chá'a hélpeykesho'.

⁹ Temék ekyókxoho m'a aqsok seklegassama axta katnehek, axnagkok aqsok sa' kaxwók allegaksek; alya'assásegwók sa' ko'o kéxegke amonye' ekwe xa.”

Negmeneykmasso ekpayheykekxa egwáxok eñama Dios aptamheykha

¹⁰ Kólmeneykmásses Wesse' egegkok negmeneykmasso axnagkok; kólpeykesho kélheykha nak makhawók agko' keso náxop, cham'a kélxega nak chá'a neyseksa wátsam ekwányam tén han ma'a aqsok élleykha nak ma'a kañe', tén han ma'a apkelókxa ekhéyak nak neyáwa wátsam ekwányam yetlo m'a énxet'ák apheykha nak ma'a kañe'.

¹¹ Kalpayhekxa kélwáxok kéxegke kélheykha nak meykexa énxet yetlo tegma apkelyawe kélagkok tén han ma'a apkelpakxeneykegkaxa nak Quedar énxet'ák. Kólmeneykmés yetlo ekmátsa kélwáxok kélheykha nak Selá; nágkóleysagkoho kólpáxamha m'a néten egkexe étseksa'ák nak.

¹² Kóltemésses apcheymákpoho m'a Wesse' egegkok, kóllegés kélmeneykmasso m'a apkelókxa ekhéyak nak neyáwa wátsam ekwányam.

¹³ Máxa xama énxet apyennaqte sa' etnehek etyapok ma'a Wesse' egegkok; elnapakpok sa' yetlo apwasqapma aptémól'a m'a kempakhakma yáp; epaqmétek sa' ekyennaqte, elpáxamha sa' yempakha', emenxenek sa' nahan ma'a apkelenmexma.

¹⁴ Aptáhak Wesse' egegkok se'e: “Ahóxek agko' sekwanmeyeykha aqsa, ekwanmagkamchek aqsa, mapaqméteykha xama enxoho; awhesha sa' kaxwo', máxa sa' atnehek ma'a ektémól'a kelán'a káskok awáxok kamáwhok katnehek naqláwa, wápentegmakha sa', atekkesha sa' nahan sénnama.

¹⁵ Amasséssók sa' ko'o m'a meteymog élekhahéyak nak tén han ma'a egkexe náxap'awo nak, alyamaksek sa' ekyókxoho m'a aqsok elyápaqmátéyak nak áwa' m'a néten; ekyamayéxma sa' atnessásekxak ma'a wátsam nak, meyke yegmen sa' nahan atnessásekxak ma'a awáxok ekheykegkaxa nak chá'a yegmen.

¹⁶ Sa' alya'ásekxak anaqlakxak énxet'ák meyke nak apaqta'ák ma'a ámay melya'ásegkaxa nak. Élseyéxma sa' atnessásekxak apmonye'e m'a ekyaqtéssóxma nak, keñe sa' xapop éláxñeyo m'a élyapwáteyak nak chá'a. Alának sa' ko'o ekyókxoho xa aqsok nak.

¹⁷ Eltaqhohok sa' apkelmegqakto m'a apcháyo nak chá'a aqsok kéleykmássesso, tén han apteme nak chá'a yának se'e: ‘Kéxegke kélteme negáyókxa'.’

Énxet'ák Israel ekho meyke apaqta'ák

¹⁸ “Meyke nak kélheyk'ák, kóleyxho; meyke nak kélaqta'ák, kólyeheykha, kóllano.

¹⁹ Méko xama énxet enxoho meyke agko' apaqta'ák tén han meyke agko' apeyk'ák, kaxnók ma'a séláneykha nak ko'o, seyápháseykha nak chá'a. Méko xama énxet enxoho meyke agko' apaqta'ák tén han meyke agko' apeyk'ák, kaxnók ma'a apseykha nak chá'a sekpeywa, séláneykha ko'o, sektáha nak Wesse' egegkok.

²⁰ Apweteyak ekxámokma m'a aqsok, makke elányo'; apwanchek eñak ekyennameykhaxma, megyeyxók eyke xama enxoho.

²¹ Apmenyeyk eykhe elának ekyawe tén han ektaqmalma nélxekmowásamáxche apagkok ma'a Wesse' egegkok eñama apteme Dios segwagkasso teyp;

²² kélmenyexchessegkek eyke chá'a aqsok apagkok xa énxet'ák nak, kélyementamomchek nahan chá'a, apyókxoho nahan apkelmomakpok chá'a, kélxatamchek chá'a m'a kañe' magmowagkexa nak antépok; kélmomchek chá'a xa énxet'ák nak méko nahan xama énxet enxoho yaqwayam elántekkesek, kélpóssegkek chá'a, méko nahan chá'a xama énxet enxoho yaqwayam elwagkasek teyp.”

²³ ¿Yaqsa sa' kélxama kéxegke kólyahakxohok se'e? ¿Yaqsa ekmako keyxhok yaqwánxa sa' katnehek?

²⁴ ¿Yaqsa axta éltémo elmenyexakpok ma'a énxet'ák Israel tén han elmakpok ma'a Jacob énxet'ák apagkok nak? ¿Háweya axta Wesse' egegkok? Apkeláneykegkek melya'assáxma apkenmexma m'a, megkalyaqwámeykegkok elyetlók ma'a ámay apxekmóssamakxa axta, melyeheykekxohok nahan ma'a segánamakxa apagkok nak.

²⁵ Axta keñamak apkeltaqnaweykegko m'a, apkellegassáseykegkók axta apchahaya kempakhakma ekmaso agko' nak, apwakhéssegkek axta m'a táxa; axta eyke emáheyók elya'ásegwók.