Isaías 4 - Biblia Enxet

¹ Apqántawók sa' eleymakpok énxet xa ekhem nak, siete kelán'a sa' kalmeyawhok xama xa énxet'ák nak. Sa' katnehek kának se'e: “Hégho aqsa agmok antéhek entáwa', hegmassésses ektémakxa nak nélmegqakto meyke ennaqteyegka'a, nentegyéyak egagkók sa' eyke antéhek negko'o m'a nentéyak nak, ólántaxnekxak sa' nahan ma'a nélántaxno egagko' nak.”

Ekpayheykekxa egwáxok ekxénamaxche kawak egmonye'

² Tásek sa' katnehek aqsok apkeltémo nak kaltektépekxak Wesse' egegkok xa ekhem nak, kalyenmok sa' nahan; sa' etnehek apagkok ma'a énxet'ák Israel apkeleymomap nak meletsapma; sa' katnéssesek eyaqheykha chá'a kélwáxok ma'a aqsok ekyexna eknakxamáxche ektekkesso nak xapop tén han katnéssesek ekha kéláyo.

³ Eltamhakpok sa' “apkelpagkanchásamap Wesse' egegkok ma'a” énxet'ák apkeleymomap nak meletsapma m'a Sión, cham'a apkelwayam nak teyp ma'a Jerusalén apkelxawéyak nak yaqwayam exmakha m'a.

⁴ Apxénchek sa' agkok yaqwánxa etnéssesek Wesse' egegkok ma'a, peya enxoho ellegássesagkoho', ényeyásekxak sa' éma éltexnémáxche nak ekyegkenamaxche m'a kañe' Jerusalén, elyenyessásekxak sa' nahan élpeysameykha nak élmanyása apyempe'ék ma'a énxet'ák apheykha nak Sión.

⁵ Etekkesek sa' yaphope néten ekyáqtessóxma ekhem Wesse' egegkok takháxet ekyókxoho m'a egkexe Sión, tén han takhapxet ma'a énxet'ák apchaqneykekxa nak ma'a, keñe sa' axta'a élseyéxma tén han táxa eyáléwe. Keytek sa' Wesse' egegkok élseyéxma apagkok takhapxet apyókxoho énxet,

⁶ yaqwayam kaltaqmelchesek tén han kalmeyók; katnehek sa' pessesse apagkok apkenchesso chá'a m'a mayáhat ekmexanma tén han apkelyexanmomakxa chá'a m'a ekmámeka enxoho tén han éxchahakmo enxoho chá'a ekyennaqte.