Isaías 38 - Biblia Enxet

Ezequías apháxamáp tén han kéltaqmelchesseyam

¹ Cháxa eyaqhémókxa axta han apháxamákpo ekyentaxno agko' Ezequías xa ekhem nak, tén axta apye'eykekxo m'a Dios appeywa aplegasso Isaías, Amós apketche. Aptáhak axta apcháneya s'e: —Aptáhak Wesse' egegkok se'e: ‘Elpaqhetchásekxoho sa' ma'a ekheykha nak apxagkok, hakte yetsapok sa'; metaqmelwome'.’

² Appeynchákpek axta appayhékxoho nápakha tegma m'a Ezequías, tén axta aptáha apkelmaxneya Wesse' egegkok se'e:

³ “Wesse' ahagkok, eltamhók ko'o exchep kaxénwakxohok apwáxok ektémakxa nak mayenseyam sekyetleykha tén han sekteméssesso naqsók agko', séláneya m'a ekleklamo nak xép apwáxok.” Tén axta apkelekxagweyncha'a ekwányam agko'.

⁴ Tén axta Wesse' egegkok apkeltamho Isaías

⁵ ey'ókxak etnehek yának Ezequías se'e: “Aptáhak Wesse' egegkok se'e, cham'a Dios apagkok nak ma'a apyáp nano' David: ‘Ekleg'ak ko'o exchep apkelmaxnagko, ekwet'ak nahan ma'a apaqtégmenek. Agkeyásekxak sa' ko'o makham xép quince apyeyam apweynchámeykha.

⁶ Awagkasek sa' ko'o exchep teyp tén han Jerusalén neyseksa apmáheyo emok ma'a wesse' apwányam Asiria. Amyók sa' ko'o s'e tegma apwányam nak.’”

²¹ Apkeltamhók axta Isaías kóllanaksek higo ekyexna élyamaye kóltekxekkesek yaqwayam enxoho kóltexnássesagkok ekyetnakxa aplegeykegkoho m'a wesse' apwányam, tén axta aptaqmelwokmo.

²² Tén axta Ezequías apkelmaxneyáncha'a m'a Isaías: —¿Yaqsa sa' aqsok magkenatchesso awanchek ko'o hey'ássesagkohok yaqwayam amhagkok ma'a Wesse' egegkok tegma appagkanamap apagkok nak?

⁷ Aptáhak axta apchátegmowagkokxo Isaías se'e: —Keso aqsok magkenatchesso yaqwayam sa' egkések Wesse' egegkok elának ma'a aqsok apkeltennasso axta elána':

⁸ Ataqhéssók sa' ko'o ekxega ekhem pessesse agkok ekweykekxoho diez kélchanteykegkaxa néten ma'a Ahaz tektek apagkok, cham'a ekweywénto nak. —Taqhegwokmek axta ekxega m'a ekhem pessesse agkok ekweykekxoho diez kélchanteykegkaxa néten, cham'a ekweywénto axta.

⁹ Xama axta aptaqmelwokmo m'a Ezequías wesse' apwányam axta m'a Judá, aptáxéssek axta s'e ektéma nak:

¹⁰ Axta temék ko'o élchetamso ewáxok se'e: Axog sa' ko'o sektáhakxoho étkok; eyáneyáxcheyk amhagkok apkelmaheykegkaxa nak chá'a apkeletsapma neyseksa eykhe makham ekxámokma ekhem sekha.

¹¹ Axta entemék ko'o ewáxok se'e: Móteyekxók sa' kaxwók Wesse' egegkok keso náxop, malwetekxók sa' kaxwók énxet apheykha nak keso nélwanmégkaxa.

¹² Éllekkessek sekpakxanma, élyementegke', máxa m'a ektémól'a kóllók keláneykha nepkések appakxanma. Máxa temék sekyókxa m'a ektémól'a yátépépe' apagkok ma'a xama énxet apchótmo nak chá'a, kélyaqtónmal'a nepxet. Yókxoho ekhem señassáseykegkoho tén han yókxoho axta'a.

¹³ Yókxoho axta'a ekpayheykha ahátog seklegeykegkoho ekmáske, máxa entemék élekkexma enxoho exchakkok ma'a yámakméwa. Yókxoho ekhem señassáseykegkoho tén han yókxoho axta'a.

¹⁴ Máxa yeptameygmen ekpáweykha ektemék ekxegeykencha'a egkenyek, máxa yágwáx'ay appáweykha ektemék seyápentegeykencha'a. Kelyampayak ahaqta'ák sénmexmo m'a néten. ¡Wesse', may'ásegkok ko'o sektáhakxa, hepásegwata'!

¹⁵ ¿Háxko eyke atnehek ko'o wának ma'a? hakte cha'a setnéssesso ko'o m'a. Eyeykhayak teyn ahagkok eñama seklegeykegkoho ekmáske émpehek.

¹⁶ Elweynchamha sa' chá'a m'a apkelmasma nak chá'a Wesse' egegkok, apaxqaha sa' eyke nahan ko'óxa xa apyókxoho nak. Etaqmelchásekxeyk makham xép, egkeyásekxeyk makham sekyennaqte.

¹⁷ Yaqmagákxeyk kaxwók meyke ektáhakxa ewáxok ma'a eklegeykegkoho nak ewáxok. Emágweykekxeyk xép ketók sekteyeykemxa m'a máxek segmassesseykmoho nak, hakte meyaqmagkáseykekxak mók ekyókxoho m'a may'assáxma.

¹⁸ Mopwanchek xép elpeykeshok ma'a aphagwayam nak kañe' takhaxpop, mopwanchek elteméssesek apcheymákpoho m'a apkeletsapma nak, mopwanchek elhaxnagkok ektémakxa nak xép mehegyenyaweykha m'a aphagwayam nak kañe' máxek.

¹⁹ Wánxa eyke apwanchek elpeykeshok xép ma'a énxet'ák apkelyenná nak makham, ekhawo nak sektáhakxa ko'o s'e ekhem nak. Eltennasha chá'a apketchek apyapmeyk ma'a ektémakxa nak xép mehegyenyaweykha.

²⁰ Apheyk Wesse' egegkok se'e yaqwayam hewagkasek ko'o teyp. Ólpáwaksek arpa egagkok, ólmeneykmaksek yókxoho ekhem neyseksók negheykha makham, cham'a Wesse' egegkok tegma appagkanamap apagkok nak.