Isaías 33 - Biblia Enxet

Nélhaxneykha Wesse' egegkok

¹ ¡Xép laye, apmassésseyam nak chá'a aqsok memassegwayam nak makham! ¡Xép laye, appelakkassesso nak chá'a esexnenak pók, megkólpelakkassesso nak makham kólsexnena'! Appenchessek sa' agkok apmassésseyam aqsok, kólmasséssók sa' xép, appenchessek sa' agkok appelakkassesso chá'a apsexnenagko pók kólpelakkassesek sa' xépxa kólsexnena'.

² Wesse', hẽlayósho henlanok negko'o, ektáha nak nélhaxanma exchep. Etne chá'a sempasmo negko'o yókxoho ekhem, tén han sẽlwagkasso teyp ma'a ekwa'a enxoho ekmaso negheykha.

³ Legáxcheyk agkok chá'a exchep appeywa ekyennaqte, elyexanmok chá'a énxet'ák, apkempákxeyk agkok chá'a néten yexpaqnek chá'a m'a apyókxoho énxet'ák apheykha nak keso náxop;

⁴ máxa sawa' apxámokmal'a apkelenmexma xa énxet'ák nak, apcháhapwokmek agkok chá'a ektamagkok, elyementamagkok chá'a m'a aqsok apagkok ekyetnakxa nak.

⁵ Méko kayeykhágwomhok ma'a Wesse' egegkok, hakte aphegkek ma'a néten; cha'a apsawheyáseykekxoho ekpéwomo nentémakxa Sión ma'a tén han ektaqmalma nentémakxa,

⁶ egkések sa' chá'a ektaqmalma apheykha énxet'ák ma'a. Aqsok ekmomnáwa segwagkassamo teyp ma'a ekha nak negya'áséyak tén han negyekpelchémo; ekxámokma aqsok egagkok akke m'a negaye nak Wesse' egegkok.

⁷ ¡Kóleyxho ektáhakxa apkelpáxameykha énxet'ák apkelyennaqte m'a ámay, tén han ektáhakxa apkellekxagweykha m'a énxet'ák kéláphasso nak esawha meyke ektáhakxa apheykha énxet'ák!

⁸ Meyke xama aqsok kaxwók tamhákxak ma'a ámay, méko kaxwók élpéwo m'a. Megkalanamáxchek ma'a ekhémo mók nélpaqhetchásamáxkoho tén han ma'a aphéssamo axta mók apkelpaqmeyesma m'a énxet; méko xama énxet enxoho megkólwanyémo.

⁹ Kesagkék ma'a xapop yaqhapchek nahan exma, kelyameygkek aqsok naxma m'a Líbano, kelyetcheyk áwa' yenta'a, yókxexma ekyamayéxma tamhákxak ma'a ekyapwátegweykenxa nak xapop Sarón, meyke xama aqsok entamhákxak ma'a yókxexma Basán tén han ma'a egkexe Carmelo.

¹⁰ Aptáhak Wesse' egegkok se'e: “Alának sa' ko'o kaxwók aqsok; axekmósek sa' kaxwók ekyókxoho sekteme sekwányam ahagko' tén han sekteme seyeymáxkoho.

¹¹ Hawók pa'at apák tén han aqsok apák kéllánéyak nak chá'a kéxegke tén han ma'a kélmáheyo nak chá'a kóllanagkok; kalwatnek sa' ma'a sénnama ekho nak táxa eyáléwe.

¹² Táhap sa' etnekxak ma'a énxet'ák; máxa yámet ekha nak am'ák kélyaqténma sa' etnahagkok eláléwha elmétek ma'a neyseksa táxa.

¹³ Kéxegke kélheykha nak makhawo', kóleyxho chá'a ekxénamaxche m'a aqsok sélane, keñe kélheykha nak keto' kólya'asagkoho chá'a sekmowána.”

¹⁴ Apkelpexyennegkek éltamheykha apkelwáxok énxet melya'assáxma m'a Sión, apkelyegwakkók apagkók ma'a énxet'ák élmasagcha'a nak apkeltémakxa, aptáhak apkelpaqmeta s'e: “¿Yaqsa enxama negko'o apwanchek exek neyseksa m'a táxa ekmassesseykmoho nak aqsok, cham'a eyáléwe ekyawe meyke néxa nak?”

¹⁵ Énxet apkelane nak chá'a aptémakxa ekpéwomo apxeyenma nak chá'a aqsok ekmámnaqsoho, mexámáséyak nak aqsok apagkok eñama apyennaqteyáseykha apyempehek, memà nak kólmések ma'a aqsok kélmésso naqsa, tén han melyeheykekxa nak chá'a yáneykpok elának ma'a aqsok ekmaso agko' nak tén han megkamopmenyého nak chá'a elanok ma'a aqsok ekmaso,

¹⁶ méko sa' katnehek apha xa, kaxek sa' apyexanmomakxa m'a meteymog élyennaqte nak, kaxek sa' chá'a m'a apto, megkameykkehek sa' nahan chá'a m'a yegmen apyá.

¹⁷ Éteyekxak sa' makham ma'a wesse' apwányam yetlo m'a ektémakxa nak apcheymákpoho; kawomhok sa' makhawók agko' néxa xapop ma'a apchókxa.

¹⁸ Xénwákxók sa' agkok chá'a apwáxok ma'a aqsok apcháya axta chá'a neyseksa apha, sa' etnehek chá'a s'e: “¿Háxko aphakxa m'a apkelmomo axta chá'a selyaqye eknegkenamaxche'? ¿Háxko aphakxa m'a apkelyetsátéyak axta chá'a ekwánxa ekyentaxno xama aqsok? ¿Háxko aphakxa m'a apkelyetsáteykekxa axta chá'a apwánxa apyókxoho m'a tegma apkelwenaqte?”

¹⁹ Kamaskok sa' exek nepyeseksa m'a énxet'ák megkalyexnegwayam nak chá'a apkelpeywa elának apnámakkok, ekmáske nak agya'asagkohok ma'a ektémakxa apkelpeywa, manlege nak ektáhakxa m'a apkelpeywa, mey'áseyák nak xama énxet.

²⁰ Elano m'a Sión, tegma apwányam nenláneykxa nak chá'a nélsawássessamo; yenmexho m'a Jerusalén, tegma apwányam meyke nak negakakxa xama aqsok; exhok sa' ma'a kélpakxanma apyennaqtél'a kéllane, megkólmowánal'a kólhaxyawaksek ma'a yámet apagkok kélatchesso kañe' xóp, megkalyetyapmal'a m'a apxát'ák nak.

²¹ Cha'a senxekmóssamakxa negko'o apcheymákpoho Wesse' egegkok ma'a. Xama yókxexma ekxámokmakxa nak ma'a wátsam, yegmen ényé ekyawe nak ekpayhakxa, melántexek sa' eyke sẽlenmexma yetlo yántakpayhe étkok apagkok ma'a, tén han ma'a yántakpayhe élyawe apagkok nak.

^22-23 Kelyelqamáxcheyk táma' kélnaqtete xa yántakpayhe ekyawe nak massegkek élyennaqtésso m'a yámet ekwenaqte agkok nak; megkólwanchek kólpeykásekxak ma'a apáwa agkok nak. Ólyementamok sa' ekxámokma agko' aqsok apagkok ma'a sẽlenmexma nak, kawomhok sa' apkelxawéyak aqsok apagkok ma'a meyke nak apaqta'ák, elmagkok sa' aqsok ma'a élmasagcha'a nak chá'a apyókxa apkelyelqamap nak chá'a. Hakte Wesse' egegkok apteme énxet segyekpelchémo egagkok, apteme senlánésso chá'a segánamakxa tén han wesse' apwányam egagkok, sa' hẽlwagkasek nahan teyp ma'a.

²⁴ Méko sa' xama énxet etnehek appeywa s'e: “Ekháxexcheyk ko'o.” Meyaqmagkásekxeyk sa' mók Dios melya'assáxma m'a énxet'ák apheykha nak Sión.