Isaías 31 - Biblia Enxet

Apkeltaqnómap apkelmeyeykekxa nak chá'a Egipto aptegyeykha ekpasmo

¹ ¡Énxet'ák laye, apkelmeyeykekxa nak chá'a Egipto aptegyeykha ekpasmo, apkeláyo nak chá'a m'a ekha nak yátnáxeg apkelchánte, apkeláyo nak chá'a m'a ekxámokma nak yátnáxeg apkelyenyawasso apagkok, tén han apteme nak apkeláyo m'a énxet apxámokma apkelchánte nak yátnáxeg, keñe melenmexeykekxoho m'a aphakxa nak Dios Aptaqmalma nak Israel, melchetamsók ma'a Wesse' egegkok!

² Apwanchek eyke nahan aqsok ma'a, apwanchek etekkesek ma'a ekmaso nak negha, apxénchek agkok xama aqsok, elának nahan. Yenmexek sa' ma'a énxet'ák élmasagcha'a nak apkeltémakxa, appasmo nak chá'a m'a apkeláneykegkoho nak aqsok ekmaso.

³ Énxet apancha'awók ma'a egipcios, háwe m'a aqsok ekha nak élmowancha'a; yátnáxeg apancha'awók nahan ma'a apkelchánte nak, háwe m'a aphagák la'a. Ellegássesagkohok sa' Wesse' egegkok, esawhakpohok sa' elyaqnenek ma'a apkelmasma nak chá'a ekweykekxoho m'a apkeltaqmelchesso nak chá'a, elmassegwók sa' apyókxoho.

⁴ Aptáhak seyáneya Wesse' egegkok se'e: “Sa' etnehek éxyók Wesse' ekha nak apyennaqte epásegwaták énxet'ák apagkok apheykha nak Sión ma'a ektémól'a xama méwa eyaqhél'a xama nepkések, megkayél'a eyaqmaksek ma'a ektáha nak apkeláneykha, megkahaxanmal'a apxámokma yaqnekxak keláneykha nepkések eltamhok égwakkasek elwónchesek.

⁵ Sa' etnehek emyók Wesse' ekha nak apyennaqte Jerusalén ma'a ektémól'a náta, ekmasmal'a axagkok, émpeykhal'a m'a néten ekpayhókxa ekyetnakxa. Etaqmelchesek sa', ewagkasek sa' teyp, epasmok sa', emallahanchesek sa' aqsok ekmaso.”

⁶ Énxet'ák Israel, kólyo'óta sa' makham ma'a kéltaqnaweykencha'a kélagko' nak.

⁷ Hakte cham'a ekhem kéltaqnawágwokmo sa' kéxegke m'a aqsok kéleykmássesso sawo' ekyátekto ekmomnáwa nak tén han ma'a sawo ekmope ekmomnáwa nak, ektáha nak kéllánéyak kélagko' kéxegke élsexnenagkama nak chá'a,

⁸ kalnápok sa' sókwenaqte m'a énxet'ák apheykha nak Asiria, háwe sa' eyke énxet yaqwayam elnápok. Kamenxenek sa' kempakhakma m'a énxet'ák apagkok, keñe sa' ma'a wokma'ák kempakhakma yapmeyk nak katnéssesek kélásenneykha naqsa;

⁹ yenyehek sa' eñama apkeye m'a wesse' apwányam Asiria keñe sa' ma'a sẽlpextétamo kelwesse'e apagkok nak eyenyók sa' aqsa apchókxa. Wesse' egegkok apxeyenma ekyetna táxa eyáléwe ekyawe m'a Jerusalén, yaqwayam kallegássesagkohok ma'a apkelenmexma nak.