Isaías 30 - Biblia Enxet

Apkeltaqnómap apkelmeyeykekxa nak chá'a Egipto aptegyeykha ekpasmo

¹ Aptáhak Wesse' egegkok se'e: “¡Énxet'ák laye sénmexeykekxa nak chá'a, apkeláneykekxa nak chá'a yaqwánxa etnahagkok meyke séltennasso ko'o, élchetámeykha nak chá'a apkelwáxok aqsok yaqwayam elanagkok megkatnaha nak ko'o séltémo elanagkok, apxámáseykegkek aqsa chá'a m'a melya'assáxma nak!

² Apkelmeyákxeyk ekpekhe agko' ma'a Egipto, keñe ko'o méko sélpaqhetchásamákpoho; apkelya'aweykxeyk apkeltamho elmeyók ma'a faraón, apkelhákxeyk ma'a kañe' Egipto apkeltamho elmeyawakpok.

³ Elyexanchesha sa' eyke aqsa chá'a elmeyók ma'a faraón, elmegqágwakxohok sa' ma'a apkelheykekxa nak chá'a kañe' Egipto.

⁴ Kéláphassegkek eykhe kéxegke énxet'ák kélapháseykha ekweykmoho m'a tegma apkelyawe Soan tén han ma'a Hanés,

⁵ apyókxoho sa' eyke elmegqágwakxohok eñama xa énxet'ák megkamopwána nak epasmok pók, mesókáseyam nak ma'a aqsok yaqwayam kapasmok tén han ekpayhawo nak kólmaha, wánxa aqsa m'a eyaqhémo nak anleyxmakha tén han ekmaso negha.”

⁶ Aqsok kélnaqtósso élxénamaxche', élleykha nak ma'a Négueb: Apkelpeywomók chá'a apkelmeyeykekxo Egipto apkelpátegkessama yámelyeheykok tén han yányátnáxeg apkelseykekxo aqsok élmomnáwa apagkok tén han mók aqsok apagkok israelitas ma'a yókxexma, ekxámokmakxa nak aqsok élmasagcha'a, élleykegkaxa nak ma'a méwa élyexweyweykegkól'a, tén han ma'a yéwa, tén han ma'a yéwa ekwányam élchampayól'a, apheykegkaxa nak ma'a énxet'ák mékcha'awo,

⁷ megkalmopwancha'a nak elanagkok xama aqsok, megkalmopwancha'a nak epasmok pók. Cháxa keñamak sekteméssessama nak ko'o apkelwesey: “Yéwa ekwányam ekyexwéweykha naqsa méko xama aqsok kalána'”.

⁸ Exegma kaxwo', etaxés sa' xama meteymog ekpayhe, epekken sa' apnaqtáxésso yaqwayam sa' keytek aqsa m'a, élhaxanma m'a egmonye' sa', yaqwayam katnehek ekxénweykekxoho chá'a kélwáxok meyke néxa.

⁹ Énxet'ák apkenmexeykekxa chá'a Dios xa énxet'ák nak, apyenseyam chá'a apkelyetleykha, megkalmopmenyého nak yeyxhok ma'a Wesse' egegkok nélxekmowásamáxche apagkok.

¹⁰ Etnehek chá'a elának énxet'ák apkelwetayo nak chá'a aqsok se'e: “Nágkayet akke aqsok kélwete”, keñe chá'a etnehek elának apkellegasso nak Dios appeywa s'e: “Ná hẽltennasha eyke aqsok ekxekmowásamáxkoho ekmámnaqsoho nak; hẽltennasha aqsa chá'a m'a amya'a ekmátsa nak ageyxho'; náhentawássesha m'a aqsok élxéneykencha'a nak egwáxok agweta'.

¹¹ Kólyensem kélyetlo s'e ámay nak, kólyetnakhágwom se'e ámay ekpéwomo nak, náhenxekmósseta kaxwók negko'o m'a Dios Aptaqmalma nak ma'a Israel.”

¹² Ékeso éñamakxa aptáha nak appeywa Dios Aptaqmalma nak Israel se'e: “Kéltaqnókek kéxegke s'e amya'a kéltennasso nak, kéláyók ma'a kélyennaqteyáseykha nak kélyempe'ék tén han ma'a ekmaso nak kéltémakxa', kélpasmeykekxék nahan ma'a;

¹³ cháxa keñamak kéltáha nak kélsexnánémaxche kélagko' kéxegke. Kélhawók ma'a meteymog kélhaxtal'a nepyáwa tegma netna'awo élmayhel'a, ekpelakkassól'a aqsa kayaqnenek neyseksa megkaxeyenma kélwáxok katnehek;

¹⁴ máxa sa' kóltéhek kólmasséssók ma'a ektémól'a yátegwáxwa apkelánamap la'a yelpa', appaqxamól'a apyókxoho, megyeymomap la'a xama nápakha'a apketkok appaqxo negmowána enxoho agmaha antahanchesek átex ólmok ma'a neyseksa táxa nak, essenhan yaqwayam enxoho agyáwak yegmen ma'a yámelchet.”

¹⁵ Aptáhak Wesse' egegkok se'e, cham'a Dios Aptaqmalma nak Israel: “Kólchexyem, kóllánekxa kélheykha keñe sa' kólwagkasaxchek teyp. Sa' kañék kélyennaqte kéxegke m'a ektaqmalma nak kélheykha tén han megkólya'ásseyam.” Makke kólmakók kéxegke,

¹⁶ kéltáhak aqsa kélpaqmeta s'e: “Ma', tásek eyke negko'o ólxog ólchántek yátnáxeg ólxeganmok.” Hoy táse', kólteme sa' kólxeganmok xa ektáha nak. Kéltáhak nahan kélpaqmeta s'e: “Ólchántek sa' yátnáxeg apkelyenyawasso élyennaqte nak ényahéyak.” Táse', apmelyeha'ak sa' etnehek apkenyehéyak ma'a ektáha nak apmenxenma.

¹⁷ Mil énxet sa' yenyahagkok yeyk xama apagko' énxet yaqwayam elnápok, keñe sa' kélyókxoho kéxegke kólenyahagkok kóleyk wánxa m'a cinco énxet apmáheyo elnápok ekwokmoho kéleyméxko kélqántawók kélagko', ektémól'a keymaxchek xama agko' yámet émha m'a néten egkexe étseksek nak, essenhan ma'a ektémól'a xama aqsok kélchenegkesso magkenatchesso m'a néten egkexe nak.

Énxet'ák kéltennasso kólásekhekxohok makham

¹⁸ Apkelhaxneyk kéxegke m'a Wesse' egegkok, yaqwayam sa' elásekhekxohok makham; apmakawók apagkók exekmósek kéxegke m'a ektémakxa nak apkelásekhayo, hakte Wesse' egegkok apteme Dios ekpéwomo aptémakxa. ¡Apkeleñémo apyókxoho ektáha nak apkelhaxanma m'a!

¹⁹ Énxet'ák Sión, kélheykha nak Jerusalén: megkóllekxagwaha sa' kaxwók kéxegke. Kélyósekak sa' elanok kéxegke Dios apleg'a enxoho kélpáxameykha ekyennaqte kólmaxnak yaqwayam epasmok, ketse' aplege sa' katnehek kélpeywa, yohók sa' chá'a yátegmowagkok.

²⁰ Egkések sa' eykhe kéxegke Wesse' egegkok kéllegeykegkoho tén han ekyentaxnamo kélheykha, akke apteme apkelxekmósso m'a, méxánegkesek sa' chá'a kaxwo'; kélaqta'ák kélagko' sa' chá'a kólweta'.

²¹ Kélyetnakhágwokmek sa' agkok chá'a kélxega, kóllegak sa' chá'a xama kélpeywa kélnentámen katnehek se'e: “Payhók ámay se'e, kólmeyenta s'e.”

²² Máxa aqsok ekmanyása sa' kóltemeykha kólwanyaha m'a kéleykmássesso kélagkok sawo ekmope ekmomnáwa nak tén han ma'a aqsok kéláyókxa kélyepetchesso nak émpe'ék ma'a sawo ekyátekto ekmomnáwa. Máxa aqsok ekmanyása sa' kólteméssesek kóltaqnók, máxa aqsok apák kélchexakha sa' kólteméssesek.

²³ Egkések sa' ekmámeye Wesse' egegkok, yaqwayam sa' kólchenekxak aqsok aktek, katekkesek sa' apxámokma apagko' hótáhap aptaqmalma m'a xapop. Xámok sa' nahan katnehek yókxexma yaqwánxa kallawha katawagkok pa'at weyke kélnaqtósso xa ekhem nak.

²⁴ Kawakxohok sa' nahan ekha ekto aqsok aktek kéltekxekxo ekmátsa agko' ma'a weyke éltamheykha nak kélchekha tén han ma'a yámelyeheykok kélchánte nak.

²⁵ Wokmek sa' agkok ekhem yaqwánxa keytek nentekyawa ekyawe, appallakmo sa' ma'a tegma apkelyennaqte nak, kaxek sa' wátsam tén han yegmen ényé ekyókxoho m'a meteymog élekhahéyak netna'awo nak tén han ma'a egkexe élwenaqte nak.

²⁶ Eltaqmelchessásekxak sa' apkelyense énxet'ák apagkok ma'a Wesse' egegkok, elpextehetchesagkok sa' nahan. Keñe sa' pelten máxa ekhem éltátchesso sa' etnehek apkelsassóxma, keñe sa' ma'a ekhem kayeykhágwomhok agko' sa' élsassóxma, megkaxók sa' ma'a ekweykenxa nak chá'a élsassóxma, máxa sa' katnehek ektáha enxoho siete ekyókxoho éltátchesso ekhéyak ma'a néten.

Asiria kéllegassáseykegkoho

²⁷ Kólenmexho hana makhawo nak, apyókxoho apagko' apxegakmok Wesse' egegkok; aplókók apagko', máxa éten ekyentaxno ekpánmal'a entáhak aplo, negyekpelchawók aplawa m'a apátog nak, máxa táxa, ekmassesseykmohol'a aqsok entáhak ma'a apaxkok nak,

²⁸ máxa wátsam ekteyapmal'a yegmen entáhak ma'a apkennama nak ekyetnél'a egyespok; apxegakmek yaqwayam éntaxnéssessak apheykha m'a pók aptémakxa nak chá'a énxet'ák, yaqwayam sa' kanaqlakxak ma'a nennaqtawásamáxchexa nak, apxegakmek yaqwayam elatchessessak apatña'ák énxet'ák ma'a ekho nak yátnáxeg kélatchessesso apwáxok yaqwayam sa' kalyetnakhássók chá'a apkelxega.

²⁹ Keñe sa' kéxegke, kólmeneykmaksek, ektémól'a kalanaxchek kélessawássessamo ektaqmalma axta'a; kalpayhekxak sa' kélwáxok, máxa sa' kóltéhek ma'a aptémól'a énxet apkelpáwassól'a yámámok neyseksa apkelxega elmahagkok ma'a Wesse' egegkok egkexe apagkok, apkelyexanmomakxa nak ma'a énxet'ák Israel.

³⁰ Eltamhok sa' kañexchek appeywa eyeymáxkoho nak ma'a Wesse' egegkok, exekmósek sa' nahan apmopwána, cham'a peya nak elának yetlo aplómo apagko', yetlo m'a táxa eyáléwe élwatnamo nak aqsok, tén han takha' aplo yetlo ekmámeye tén han yegmen élyennaqte.

³¹ Elyegweyk sa' énxet'ák Asiria apkelleg'a sa' appeywa m'a Wesse' egegkok, tén han apkellegassásegkoho sa',

³² ekyókxoho apyenyeykenta apmopwána sa' chá'a Wesse' egegkok kañexchek élpáwá aqsok kéltekpaga tén han arpa apkelpáwá m'a kañe' nak. Yempakhak sa' Wesse' egegkok ekyennaqte agko' ma'a.

³³ Nanók agko' apkelánesso énxet'ák Asiria tén han wesse' apwányam apagkok ma'a ekyetnamakxa nak sẽllegassáseykegkoho ekmáske, ekyawe nak ekpayhakxa tén han ekmattawóneg, eyáléweykegkaxa nak ekyawe m'a táxa yetlo ekxámokma m'a yántapák. Wesse' egegkok apkennama sa' káléwaksek ma'a, máxa sa' katnehek ma'a ényél'a eyáléwe m'a aqsok ánek ekyátekto eyáléwomól'a.