Isaías 3 - Biblia Enxet

Judá énxet'ák kéllegassáseykegkoho tén han Jerusalén

¹ ¡Kóltaqmelchesho kóllano'! Elántekkesek sa' Wesse' ekha nak apyennaqte Jerusalén tén han Judá m'a apyókxoho pók aptémakxa nak chá'a énxet'ák apkelseykentegkesso aqsok ma'a énxet'ák, tén han apyókxoho m'a apkelmeyáséyak nak chá'a aptéyak tén han ma'a yegmen.

² Elántekkesek sa' ma'a énxet'ák apkelyennaqte nak, tén han ma'a kempakhakma yapmeyk nak, tén han ma'a énxet'ák segyekpelchémo nak, tén han ma'a apkellegasso nak amya'a, tén han ma'a apkelya'áseykegkoho nak aqsok ekpowásamáxche', tén han ma'a apkelámha apmonye'e nak,

³ tén han ma'a sẽlpextétamo apkelámha apmonye'e nak, tén han ma'a kelwesse'e ekha nak kéláyo, tén han ma'a appékessáseyak nak chá'a apnámakkok, tén han ma'a ekha apmopwancha'a nak, tén han ma'a apkelyohóxma nak,

⁴ wokma'ák apketkók sa' etnéssesek ma'a kelwesse'e apkelwányam apagkok, sakcha'a sa' etnehek apkeláneykha.

⁵ Yentexek sa' katnehek apheykha m'a énxet'ák, yenmexekxak sa' aqsa chá'a m'a pók, megkeyxek sa' ma'a apkelxegexma apagko' nak chá'a. Elenmexekxak sa' apketkók ma'a apkelwányam nak, keñe sa' ma'a énxet'ák meyke nak kéláyo, elenmexekxak chá'a m'a énxet'ák ekha nak kéláyo.

⁶ Emok sa' aqsa nahan chá'a apyáxeg xama énxet, cham'a apyáxeg apagko' nak. Sa' etnehek chá'a yának se'e: “Yetneyk xép apkelnaqta yaqwayam elántaxnekxa'; etne wesse' egagkok; etne wesse' neyseksa s'e ekxámokma nak aqsok kélnaqtawáseykha.”

⁷ Keñe sa' ma'a pók etnehek yátegmowagkokxak se'e: “Mowanchek ko'o alánekxak xa aqsok ekmaso nak, méko ko'o sekto m'a exagkok, méko nahan ma'a sélnaqta yaqwayam enxoho alántaxnekxa'. Náhéltemésses wesse' nepyeseksa xa énxet'ák nak.”

⁸ Naqsók kéltegkesa m'a Jerusalén, keñe Judá kéltawáseyncha'a, hakte cham'a ekxénamaxchexa chá'a aqsok énmexma nak Wesse' egegkok ma'a tén han élánamáxchexa chá'a m'a aqsok eklókassamo nak wesse'.

⁹ Melmegqaqto kelsexnenagkók ma'a; melpóssók ma'a apkeltémakxa melya'assáxma, aphawók ma'a apkeltémakxa axta énxet'ák Sodoma, apkelxekmóssamók ma'a apyókxoho énxet'ák. ¡Énxet'ák laye, aptegyéyak apagko' yaqwayam kóllegássesagkoho'!

¹⁰ Apkeleñémo énxet appéwomo, hakte tásek sa' chá'a katnehek ma'a aqsok apkelane, kataksek sa' ektaqmalma apha m'a aptamheykha eñama apwasqápeykekxoho.

¹¹ Énxet'ák élmasagcha'a apkeltémakxa sa' laye, asagkek sa' chá'a katnehek ma'a aqsok apkelánéyák, Dios sa' ellegássesagkohok ekhawo m'a ektémakxa nak aqsok apkelánéyák.

¹² Sakcha'a m'a apnaqtawáseykegkoho nak énxet'ák ahagkok; kelán'ák kaxwo' tamheykegkok ma'a wesse' apagkok. Énxet'ák ahagkok, apkelyexancháseykha kéxegke m'a apkelámha apmonye'e kélagkok, apkelxegánegkessegkek apkelya'áseykekxo m'a mók ámay.

¹³ Apkelánekxeyk aptáhakxa Wesse' egegkok yaqwayam elyekpelkoho', appenchessek aptáhakxa yaqwayam elyekpelchásseshok ma'a énxet'ák apagkok.

¹⁴ Apkelyekpelchássásawók sa' agkok énxet'ák ma'a Wesse' egegkok, sa' etnehek elának énxet'ák segyekpelchémo nak tén han apkelámha apmonye'e nak apchókxa s'e: “Kéltawáseykha kéxegke m'a anmen yámet séneykekxa; kélmenyexcháseykegkek aqsok apagkok ma'a énxet'ák meyke nak aqsok apagkok, kélxátaweykekxeyk kañe' kélxanák ma'a aqsok kélmenyexéyak nak.

¹⁵ Megkólwanchek agko' kéxegke kólnaqtawasagkohok énxet'ák ahagkok, tén han kólteyágkasha chá'a nápaqta'a m'a énxet'ák meyke nak aqsok apagkok.” Cháxa aptáhakxa axta Wesse' ekha nak apyennaqte xa.

Jerusalén kelán'ák kéllegassáseykegkoho

¹⁶ Aptáhak axta nahan Wesse' egegkok se'e: “Kelán'ák ekheykha nak Sión cham'a éleymáxkoho nak, megkalháxahéyak nak kalxog, megkeysso nak kaleyxkohok kalyeheykha, éltaqmelcháseykha nak chá'a kalweynchamha kalxog yetlo élaqtáwaseykha m'a élnáxegkáseykha nak chá'a m'a amagkok,

¹⁷ meyke áw'ák sa' ko'o atnéssesek allegássesagkohok xa, weygké sa' waha', yáxña'akxoho sa' anegkenchásekxak ma'a ekyókxa, meyke apáwa.”

¹⁸ Emasseksek sa' Wesse' egegkok ekyókxoho élmeykegkaxa nak chá'a kelán'ák élnáxameykha xa ekhem nak: cham'a élnáxegkáseykha nak chá'a m'a amagkok, tén han ma'a eknaqtete nak chá'a m'a áw'ák, tén han ma'a élnatanma éltaqmalma,

¹⁹ tén han ma'a élchenméhe nak, tén han ma'a eknegkenma nak chá'a amék, tén han ma'a éláhakkasso nak chá'a naqta'a apáwa apkelexyawe,

²⁰ tén han ma'a eknegkenma nak chá'a akqatkok élyenma, tén han ma'a eknegkenma nak chá'a naxta'a amagkok élyenma, tén han ma'a eknaqtete naxta'a nak, tén han ma'a sokmátsa élmátsal'a élpaqneyam keyetsék axanák, tén han ma'a élnatanma ekha élmowancha'a nak,

²¹ tén han ma'a élatchesso nak aphék, tén han ma'a élyenma nak chá'a eknegkenma m'a awéhe'ék,

²² tén han ma'a élántaxno apkeltaqmalma apagko' nak, tén han ma'a élaqlamaxche', tén han ma'a apho nak tetéyespok élaqlamaxche', tén han ma'a nahápa agkok nak chá'a,

²³ tén han ma'a nélanyantáxama agkok, tén han ma'a apáwa apkeláxñe apkelexyawe agkok nak, tén han ma'a élatchesso akqatkok, tén han ma'a apáwa élpextete nak chá'a akqatkok.

²⁴ Kampak sa' ekpaqneyam ekmanyása ekyaqmageykekxa m'a sokmátsa; keñe sa' éltétamáxche katnehek ekyaqmageykekxa m'a táma'; keñe sa' ma'a éltaqmalma nak chá'a áwa', kayaqmagkasek ma'a meyke áwa' akqatkok; keñe sa' élántaxno apkelexyawáyól'a, etnehek apyaqmageykekxa m'a apáwa sẽlwáxaqxamól'a; keñe sa' ma'a éltaqmalma nak, kayaqmagkasek kélqaháseyak.

²⁵ Etekyók sa' énxet'ák apagkok kempakhakma, eletsapok sa' kempakhakma yapmeyk apagkok neyseksa émpakhamáxche'.

²⁶ Ellekxagwaha sa' énxet'ák ma'a tegma apwányam, kallapwomagkok sa', etaqmopagkohok apagko' sa', exhok sa' ma'a ektémól'a kelán'a ektaqmópeyak axakkók ekhal'a náxop.