Isaías 29 - Biblia Enxet

¹ ¡Tegma apwányam Ariel laye, tegma apwányam appakxenweykenxa axta m'a David! Elyeykhagkok sa' apagkok sekxók apyeyam xa yetlo m'a ekneywomáxche nak kañe',

² wának sa' eyke ko'o ewakhakpok ma'a Ariel, keñe sa' katyapok nenlekxagweykha tén han negápentega nenlegeykegkoho ekmáske m'a kañe'. Naqsók sa' ko'o atnéssesek aphawo tegma apwányam ma'a kélwatnamakxa nak chá'a aqsok ekwesey nak Ariel.

³ Aláphaksek sa' ko'o sẽlpextétamo ahagkok yaqwayam sa' ewakhegwók xép, wahaxtegkesek sa' nepyáwa m'a meteymog élyennaqte, amétegkesek sa' nahan máxek nepyáwa yaqwayam sa' kólchetamagkok.

⁴ Mékoho sa' kóltemessásekxa', kólpekkenek sa' náxop; máxa kélhagák ekpeywa sa' katnekxak ma'a appeywa; máxa negyexcháseykha sa' katnekxak ma'a appeywa.

^5-6 Katlakkasek sa' eyke aqsa ellegássesagkohok ekmanyehe agko' Wesse' ekha nak apyennaqte m'a apkelenmexma nak, yetlo takha' aplo, xóp ekyawheykha, tén han éxtegyawà ekyennaqte, éxchahayam ekyennaqte, tén han yaphope néten ekmaso yetlo eyáléwe ekmassesseykmohol'a aqsok. Xapop ánek agko' sa' etnekxak ma'a apkelenmexma apxámokma nak, máxa pa'at apák élchampe sa' kólteméssesek ma'a apyaqmáseykha apxámokma nak.

⁷ Máxa negwanmagko sa' etnahagkok emassegwók apyókxoho m'a énxet'ák apxámokma apkempakhaya nak chá'a m'a Ariel, apketámeykegko nak chá'a m'a tegma apkelyennaqte apagkok, ekhawo nahan ma'a apnaqtawáseykegkoho nak chá'a; máxa sa' etnahagkok ma'a ektémól'a agwetak xama aqsok negwanmagko m'a axta'a.

⁸ Máxa sa' etnahagkok ma'a ektémól'a meyk áto' kawanmaksek etwok ma'a apto, keñe apxatakha'a enxoho méko katnehek apto m'a apwáxok; essenhan ma'a ektémól'a hem áto' kawanmaksek ének ma'a apyá, keñe apxatakha'a enxoho hem egkaqhek keymeyk nahan apyespok. Sa' katnehek apyókxoho xa énxet'ák apxámokma nak apketámeykegko nak ma'a egkexe Sión.

⁹ ¡Kóllenxanmagkoho aqsa kéxegke kélteme élyeyháxma! ¡Kóllenxanmagkoho aqsa kélteme meyke kélaqta'ák, meyke kélwete xama aqsok! ¡Kóllenxanmagkoho aqsa kélyawheykha aptémól'a m'a anmen áto', neyseksa megkólyenéyak eykhe m'a anmen segaqhamól'a!

¹⁰ Hakte apcháhakkassegkek kéxegke teyn ekyentaxno agko' ma'a Wesse' egegkok. Dios appeywa apkellegasso eykhe chá'a apkeltennaséyak aqsok ma'a énxet'ák, apkeláhakkassessegkek eyke apáwa nápaqta'a m'a Wesse' egegkok.

¹¹ Ekyókxoho aqsok kélwete nak chá'a kéxegke tamheykekxak kéllányo m'a ektémól'a ektáxésamaxche weykcha'áhak kélyaqsáseykekxa kélyepetchessól'a ekyennaqte. Kélméssek agkok xama énxet apmopwána nak elyetsetek xa, katnehek amya'a yánékpok se'e: “Elyetsek se'e”, keñe etnehek yátegmowagkok: “Mowanche', kayhek kélyepetchesso.”

¹² Kélméssek agkok nahan xama m'a énxet megkamopwána nak elyetsetek, katnehek amya'a yánékpok se'e: “Elyetset se'e”, keñe etnehek yátegmowagkok: “Mowanchek ko'o alyetsetek.”

¹³ Aptáhak ko'o seyáneya Wesse' egegkok se'e: “Apkelpeywa aqsa chá'a ko'o apkelxeyenmak sétleykencha'a xa énxet'ák nak, apatña'ák aqsa apkelxeyenmak chá'a ko'o seyáyo, keñe m'a apkelwáxok nak megkalxegkáseykencha'a heyáwhok ko'o, énxet apkeltémókxa antéhek nahan chá'a m'a aptamheykegkaxa nak chá'a hélpeykesho', apkeltámésamap apagko'.

¹⁴ Ékeso éñamakxa peya nak ko'o atekkessesek makham aqsok magya'áseyak sempelakkasso nak agwetak nepyeseksa xa énxet'ák nak. Kamassegwók sa' ma'a ektémakxa nak apkelya'áseyak aqsok ma'a énxet'ák apagkok ekha nak apkelya'áseyak tén han ma'a ektémakxa nak ekha apkelmopwancha'a m'a énxet'ák apagkok ekha nak apkelmopwancha'a.”

¹⁵ ¡Énxet'ák laye, apkelyexánegkesso nak chá'a Wesse' egegkok yaqwayam ekpósek ma'a aqsok apmáheyo elanagkok, apkelánéyák nak chá'a apkeltémakxa ekmaso m'a ekyáqtésakxaxma apteme nak chá'a elpaqmétek se'e: “Méko segwet'a. Méko segya'ásegko!”

¹⁶ ¡Asagkók agko' nak la'a kéltémakxa kélnaqtawáseykencha'a aqsok! Máxa m'a yelpa' éltémól'a kaxhok ma'a ektáha nak apkelane. Megkatnehek kának xama aqsok ektáha nak chá'a apkelane s'e: “Mehélaneyk xép”, megkatnehek nahan kának nekha yelpa' ektáha nak chá'a apkelane s'e: “Mey'ásegkok aqsok apkelana nak.”

Israel kéltennasso kólwagkasek teyp

¹⁷ Kaxwók sa' katnekxak namyep ma'a naxma nak keñe sa' namyep kaxnágwakxohok ma'a naxma'.

¹⁸ Ellegak sa' meyke nak apeyk'ák apkelyetsetchesa sa' weykcha'áhak xama énxet xa ekhem nak, keñe sa' ma'a meyke nak apaqta'ák elwetekxaxma, kamaskok sa' elweynchamha ekyáqtésakxaxma.

¹⁹ Elpeykessásekxak sa' makham apkelwáxok Wesse' egegkok ma'a énxet'ák apmopyóseka nak, kalpayhekxak sa' apkelwáxok xamók Dios aptaqmalma nak Israel ma'a énxet'ák meyke agko' nak aqsok apagkok.

²⁰ Esawhohok sa' ma'a énxet'ák élyenneykha nak chá'a apkelpeywa, emasséssók sa' ma'a énxet'ák apkeleymákpoho nak, elmassegwók sa' ma'a énxet'ák élxéneykha nak apkelwáxok wánxa elanagkok ma'a aqsok ekmaso,

²¹ cham'a énxet'ák appehésseyam nak aqsa chá'a pók apkelane aqsok ekmaso, apmopwancha'a nak chá'a apkelpeywa elyexanchesha m'a énxet'ák segyekpelchémo, aptamhéyak nak chá'a apkelmopwancha'a amya'a megyánhek kóltaqmelchessásekxak apha m'a énxet meyke nak aptémakxa.

²² Ékeso éñamakxa aptáha nak appeywa Wesse' egegkok se'e, cham'a Israel Dios apagkok nak, apwagkasso axta teyp ma'a Abraham: “Memegqáyhek sa' kaxwók Jacob se'e kaxwo' nak tén han ma'a egmonye' sa', méxwásekxeyk sa' chá'a kaxwók apmegqakto,

²³ hakte apkelwet'ak sa' agkok aptawán'ák neptámen sekteméssesakxa m'a énxet'ák apagkok, elya'ásegwók sa' ektémakxa sektaqmalma, heyáwhok sa' chá'a ko'o, sektáha nak Dios Sektaqmalma apagkok ma'a Israel.

²⁴ Kaltámeyagkok sa' aptamhéyak ekha apkelmopwancha'a m'a énxet'ák melya'áseyak nak aptamhágkaxa, emok sa' nahan takha' kélxekmósso m'a énxet'ák apkelpaqméteykha nak chá'a ekmaso exének pók.”