Isaías 27 - Biblia Enxet

Énxet'ák Israel apkelmallane aqsok ekyentaxno

¹ Elyetxák sa' sókwenaqte apagkok Wesse' egegkok yéwa ekwányam ekwesey nak Leviatán xa ekhem nak, cham'a sókwenaqte apagkok ekmahamta nak, tén han ekyawe, ekha nak ekyennaqte, yéwa ekwányam élyaqseykekxohol'a, yéwa ekwányam ekpexyaweykegkohol'a náxop kaxog, yaqhek sa' nahan ma'a yegmen askok ekyawe ekyetnama nak ma'a wátsam ekwányam.

² Sa' etnehek epaqmétek Wesse' egegkok xa ekhem nak: “Kólmeneykmásses anmen yámet kélcheneykekxa ektaqmalma nak.

³ Ko'o chá'a séláneykha xa, sektáha nak Wesse', yókxoho ekhem chá'a sekyásseséyak. Yókxoho ekhem chá'a sektaqmelchesso tén han yókxoho axta'a, yaqwayam enxoho megkóltawasha.

⁴ Massék ko'o séltaqnaweygko xa. Tekkek sa' agkok am'ák tén han ekmompánaqma m'a neyseksa, wampakhak sa' ko'o, asawhohok sa' alwatnek ekyókxoho.

⁵ Kéltamhók agkok ko'o almeyók, tásek hépetchekxak makham, naqso', tásek hépetchekxak makham ko'o.”

⁶ Kataqmelekxak sa' apheykha Jacob énxet'ák apagkok se'e egmonye' nak, máxa yámet élatchessól'a kepmenák xapop sa' etnahagkok, máxa yámet éltektépeykekxa sa' etnahagkok elántépekxak ma'a énxet'ák Israel, tén han ma'a ektémól'a kalyapwa', kasawhekxohok sa' aqsok ekyexna apagkok keso nélwanmégkaxa.

⁷ Megkaxnawok apkellegassáseykegkoho Dios énxet'ák Israel ma'a ekweykenxa axta chá'a apkellegassáseykegkoho m'a apnaqtawáseykegkoho axta chá'a, megkaxnawok nahan chá'a apkelnapma m'a ektémakxa axta chá'a apkelnapma.

⁸ Apkellegassáseykegkók axta énxet'ák apagkok Dios apkeltémo kólnaqlakxak ma'a megkatnahakxa nak apkelókxa, apwátekhapmeyk axta ekyennaqte agko' apkelántekkessama, ektémól'a kaxchahák ma'a éxchahayam eñama nak teyapmakxa ekhem.

⁹ Meyaqmagkásekxeyk sa' eyke aptémakxa mey'assáxma m'a Jacob, emasséssesek sa' aqsok megyaqhémo aptemessásekxo enxoho ánek ma'a meteymog apwatnéssamakxa nak chá'a aqsok ma'a kéleykmássesso, apteméssesa enxoho m'a ektémól'a kóltepelchekxak ma'a meteymog lamhatánek, tén han megkeyméxko enxoho xama m'a yámet kéláncháséyak élpagkanamaxche nak tén han ma'a meteymog kélwatnamakxa nak chá'a aqsok ekmátsa nak ekpaqneyam éten agkok, kélmésso m'a aqsok kéláyókxa.

¹⁰ Apmopso aptáhak ma'a tegma apwányam apyennaqte nak, máxa m'a tegma aptaqmópéyak la'a, máxa m'a ekyamayél'a exma yókxexma meykel'a énxet. Weyke ekteykegkaxa pa'at ma'a, ekteykegkaxa m'a yámet áwa' tén han ekheykegkaxa chá'a kallókasek élyampé.

¹¹ Kalekkexaxchek chá'a aktegák xama yámet ekyawe élyamaka enxoho; keñe chá'a kelán'a kalmok katnehek táxa agkok. Énxet meyke apkelya'áséyak aqsok xa. Ékeso éñamakxa peya sa' megkalepyósek elanok ma'a ektáha axta Apkelane.

¹² Elának sa' aqsok Wesse' egegkok xa ekhem nak eyeynamo ma'a Éufrates ekweykekxoho m'a wátsam Egipto, máxa sa' etnehek ma'a aptémól'a énxet apkempassól'a apyempe'ék apák ma'a hótáhap apaktek; keñe sa' kéxegke israelitas, kélxama kélxama sa' chá'a kólmaxchek kólánchásekxa'.

¹³ Kólpáwaksek sa' kélaqkahasso ekyennaqte ekpáwà xa ekhem nak, keñe sa' ma'a apkelxegánegwayam axta m'a Asiria, ekhawo nahan ma'a kélnaqleykekxa axta m'a Egipto, elmeyenták sa' Jerusalén elpeykessetámhok ma'a Wesse' egegkok, cham'a egkexe ekpagkanamaxchexa nak.