Isaías 26 - Biblia Enxet

Negmeneykmasso negmallane

¹ Cháxa ekhem nak, sa' kalmeneykmasaxchek Judá s'e negmeneykmasso nak: “Yetneyk negko'o xama tegma apwányam apyennaqte egagkok; yaqwayam hẽlwagkasek teyp, aphaxtegkek Wesse' egegkok meteymog ma'a nepyáwa tén han ma'a ekyennaqtésso nak.

² Kólmeykesák atña'ák yaqwayam sa' elántexek ma'a énxet'ák apkelpéwomo melyenseyam nak apteme melya'ásseyam.

³ Wesse', eltaqmelcheshok chá'a exchep yetlo meyke ektáhakxa apwáxok ma'a melyenseyam nak chá'a apteme melya'ásseyam, hakte apcháyók chá'a exchep ma'a.

⁴ Kólteme chá'a kéláyo m'a Wesse' egegkok, hakte cha'a apteme segmasma apyennaqte memassegwayam ma'a.

⁵ Etnéssásekxohok chá'a kónegók agko' ma'a énxet'ák apkeleymákpoho nak, mékoho chá'a etnéssásekxak etegkesek náxop ma'a tegma apwányam magmowána nak antaxnegwók kañe',

⁶ yaqwayam enxoho elteyammaha m'a énxet'ák apkelyelqamákpoho nak tén han ma'a apmopyóseka nak.”

⁷ Péwók ámay apagkok ma'a énxet'ák apkelpéwomo nak; Wesse', xép apteméssesso meyke élyapwátéyak ma'a ámay apagkok nak.

⁸ Wesse', negyekpelchémók negko'óxa ektaqmalma nélxega m'a ámay senxekmóssamakxa nak ma'a segánamakxa apagkok. Egmenyeyk chá'a negko'o exchep kaxének egwáxok.

⁹ Awanhók agko' chá'a exchep ekmámenyého ewáxok axta'a; weykmók chá'a kañók agko' ewáxok sétamso. Apkelyelpelchawók sa' agkok xép énxet'ák keso náxop, kaltámeyagkok sa' énxet'ák ma'a ekpéwomo nak nentémakxa.

¹⁰ Elepyóshok sa' eykhe elanok xép ma'a élmasagcha'a nak apkeltémakxa, megkaltámeyagkek sa' eyke yaqwayam elanagkok aqsok ekpéwomo m'a; élmasagcha'a agko' apkeltémakxa nepyeseksa énxet'ák ekha nak apkelyeheykekxoho m'a, melya'ásegkok nahan ektémakxa nak apteme apwányam apagko' ma'a Wesse' egegkok.

¹¹ Wesse', appenchessek xép aptáhakxa yaqwayam ellegássesagkoho', makke elya'ásegkok ma'a; apkelwet'ak sa' agkok ektémakxa ekyawe apkelásekhayo exchep ma'a énxet'ák apagkok, elmegqeyk sa'. ¡Kamassessamho annal'a aplo xa énxet'ák nak!

¹² Wesse', egméssegkek xép ektaqmalma negheykha; naqsók xép apkelane chá'a ekyókxoho m'a aqsok nenlanakxa enxoho chá'a.

¹³ Wesse', Dios egagkok, nentemegkek negko'o kelwesse'e egagkok ma'a pók kelwesse'e nak, negya'ásegko' eyke exchep apteme wánxa Wesse' egegkok.

¹⁴ Apkeletsekkek eyke m'a, menaqxétekhágwomek chá'a; pessesse aptamhágkokxa', melchempekxeyk chá'a néten hakte apkellegassásegkok xép, apmasséssekmek nahan, apmasséssekmók apagko' nahan apkelxénamap chá'a.

¹⁵ Wesse', apxámáseykekxeyk xép pók aptémakxa énxet'ák; apxámáseykekxeyk yaqwayam kataxchek chá'a m'a apcheymákpoho, apyáncháseykegkek chá'a m'a ekyókxoho nak néxa xapop apkelókxa.

¹⁶ Wesse', agketmok chá'a exchep nenlegágkoho enxoho ekyentaxnamo egwáxok, cham'a senlegassásegkoho enxoho, yetlo magyennaqtésso nempaqhetchesso.

¹⁷ Wesse', máxa kelán'a lóso' nentamheykegkok negko'o nápaqtók xép ketók ekmaheyókxal'a katnehek naqláwa, ekyettelegweykhal'a, ekpayheykhal'a átog kañegkohok ekmáske.

¹⁸ Máxa enlós'awók negko'o nentamheykegkok, néllegeykegkók ekmáske egwáxok, máxa eykhe entemék nempalchessama enxoho egketchek, méko eyke, máxa éxchahayam aqsa. Manseykenták negko'o yaqwayam ólwagkasek teyp ma'a apkelókxa, mexek sa' nahan chá'a énxet yaqwayam exek keso nélwanmégkaxa.

¹⁹ Eyke m'a énxet'ák apagkok apkeletsapma nak enaqxétekhágwók sa', kanaqxétekhagkokxak sa' ma'a aphopák nak. Enaqxétekhagkok sa' ma'a apkeletsapma nak keso náxop, elwehesha sa' kalpayhekxak apkelwáxok. Hakte apcháphassegkek xép élseyéxma apagkok ekho yálye, keñe sa' ma'a apkeletsapma axta elántépekxak makham keso náxop.

²⁰ Kólxeg, énxet'ák ahagkok, kólántex kañe' kélxanák kólápekxa sa' atña'ák kélagkok. Kólyexánem sekxók yaqwatakxoho, ekwokmoho ekyeyk'a m'a Wesse' egegkok aplo.

²¹ Hakte etyapok sa' Wesse' egegkok ma'a aphamakxa nak chá'a yaqwayam ellegássesagkohok apkeltémakxa melya'assáxma m'a énxet'ák apheykha nak keso náxop, kamaskok sa' kakpósek kaxwók énxet apmatñà keso náxop, yáxñakxoho sa' kapekkenekxak ma'a ektémakxa nak chá'a ekyetno apyógkexma énxet ma'a kañe'.