Isaías 22 - Biblia Enxet

Jerusalén ekxénamaxche' yaqwánxa kólteméssesek

¹ Xapop ekyapwate ekwesey nak sẽlxekmóssamakxa aqsok ekxénamaxche yaqwánxa kólteméssesek: ¿Yaqsa ektáha kélchánta nak kélyókxoho néten tegma?

² Tegma apwányam eksawheykekxoho nak kañe' ekyennamáxma tén han kélwehéseykha, ekyepetche nak ma'a ekneywomáxche', háwe sókwenaqte élnapma m'a apkeletsapma nak apheykha kañe', háwe nahan aptekyawa m'a neyseksa kempakhakma;

³ apkenyahágkek axta apyókxoho m'a kelwesse'e apagkok nak, xama axta apkelyexánegkesa m'a apmáheyo nak elyátagkok yágke, apkelmákpek axta. Makhawók axta apkelmahágkok apkenyahágko m'a énxet'ák apagkok apkelyennaqte nak, apkelmákpek axta eyke nahan ma'a.

⁴ Cháxa keñamak sektáha nak sekpeywa s'e: Hélyenyow exakko', peyk ko'o alekxagwaha; nágkóllenxánem aqsa hélpeykessásekxak ewáxok eñama ekmaso ektáhakxa m'a énxet'ák ahagkok.

⁵ Hakte appekkenchek axta Wesse' ekha nak apyennaqte yaqwayam kawak xama ekhem negyegwakto tén han sẽlmassésseyam tén han magya'áseyak nentáhakxa m'a xóp ekyapwate ekwesey nak sẽlxekmóssamakxa aqsok. Apkelyaqnegkásegkek ma'a meteymog kélhaxta nak nepyáwa tegma; wokmók élpayheykha kélatña'ák ma'a néten meteymog élekhahéyak nak.

⁶ Apkelánegkokxeyk yágke apagkok ma'a énxet'ák Elam, apkelchántákxeyk ma'a yátnáxeg apkelyenyawasso apagkok tén han ma'a yátnáxeg; apkelmágkokxeyk apkeláhakkásamap ma'a énxet'ák Quir.

⁷ Sawhékxók yátnáxeg apkelyenyawasso m'a ekyókxoho nak xóp élyapwate apagkok éltaqmalma agko' nak, keñe yátnáxeg apkelchánte apketámegko m'a apátog nak tegma apwányam.

⁸ Méko entáhak ma'a ekmasma nak chá'a Judá. Kélwet'ak kéxegke kélxátamakxa nak chá'a kélmeykha kélanchesso kempakhakma xa ekhem nak, cham'a apwesey nak Tegma Naxma,

⁹ kélwet'ak ekxámokma meteymog élmayhe m'a kañe' nak David Tegma Apwányam apagkok, kélyetmeyk nahan yegmen ma'a kélyátamakxa nak chá'a yegmen ekyetno nak kóneg;

¹⁰ kéllanawók tegma aphéyak nak ma'a Jerusalén, kélpalchessek nahan nápakha yaqwayam enxoho kólyennaqteyásekxak ma'a meteymog kélhaxta nak nepyáwa' tegma.

¹¹ Kéllanak nahan chá'a xama kélyátamakxa yegmen neyseksa m'a ánet meteymog kélhaxta nak nepyáwa tegma yaqwayam enxoho kólyetmekxak ma'a yegmen eñama nak ma'a nanók kélyátamakxa yegmen. Makke kóláyók kéxegke ektáha axta apkelane ekyókxoho xa, ektáha axta apkelane m'a nanók agko' axta.

¹² Apkeláneyáha axta kéxegke Wesse' ekha nak apyennaqte apkeltamho kóllekxagwaha xa ekhem nak tén han kallapwomagkok, tén han kólmópésagkohok kélyese kólántaxnekxak ma'a apáwa sẽlwáxaqxamól'a magkenatchesso éllapwáméyak.

¹³ Xénchek axta eyke aqsa kélwáxok kéxegke kólneywagkok tén han kalpayhekxak kélwáxok, kólnápok ma'a weyke tén han nepkések, kóltawagkok ma'a ápetek, kólyenagkok nahan ma'a vino. “Antawagkok, agyenagkok, hakte saka sa' óletsapok” —axta kéltáhak.

¹⁴ Tén axta sexekmowásekpoho ko'o m'a Wesse' ekha nak apyennaqte. Aptáhak axta seyáneya s'e: “Malásekhekxók sa' ko'o xa megkólya'assáxma nak; kóletsapok sa' kéxegke eñama xa kéltémakxa nak.” Wesse' egegkok ekha nak apyennaqte appeywa xa.

Kélyaqmagkasso pók aptamheykha nak chá'a kañe' tegma apyawe aptaqmalma

¹⁵ Aptáhak ko'o seyáneya Wesse' ekha nak apyennaqte s'e: “Ey'ókxa sa' Sebná, apkemha apmonye' nak ma'a tegma apyawe aptaqmalma, etne sa' yának se'e:

¹⁶ “¿Yaqsa apkelánéya exchep se'e? ¿Yaqsa ekmésso yaqwayam yának kalanaxchek xama takhaxpop se'e? ¿Yaqsa éltémo yának kóllánegwók xama sẽlátawanyamakxa m'a néten nak? ¿Yaqsa éltémo yának kólmétawók meteymog ma'a néllókassamakxa nak chá'a nélyampe?

¹⁷ Eyensók sa' xép makhawók agko' ma'a Wesse' egegkok, apteméssessamól'a m'a énxet ekyennaqte nak apyempehek. Énnaqtések sa' apyempehek emok,

¹⁸ máxa aqsok ekyaqye sa' etnéssesek éttelegwasagkok, eyensók sa' ma'a ekyawakxa nak exma xapop. Sa' yetsapwók ma'a. Sa' kaxnagwók yátnáxeg apkelyenyawasso apagkok eyaqheykencha'a nak chá'a apwáxok ma'a, emegqaksek sa' xép ma'a wesse' apagkok tén han ma'a ekheykha nak apxagkok.

¹⁹ Alwátessesek sa' ko'o exchep aptamheykha atekkesek sa' ma'a ektémakxa nak aptamheykha.

²⁰ “Awónmakha sa' ko'o séláneykha xa ekhem nak, cham'a Eliaquim, Hilquías apketche nak;

²¹ ataxneyásekxak sa' ma'a aptaxno apwenaqte nak xép, athetchesek sa' nahan nepxet ma'a aptétamap apmeykha nak chá'a exchep, keñe sa' agkések ma'a ektémakxa nak xép aptamheykha apteme ekha kélyeheykekxoho. Máxa apyáp sa' etnehek ma'a apyókxoho énxet'ák apheykha nak Jerusalén tén han ma'a Judá.

²² Kéláyo sa' atnéssesek, agkések sa' ketchessam'átog David apxagkok nak; Méko sa' kápekxak chá'a apmeykesa enxoho chá'a m'a, méko sa' nahan kameykásekxak chá'a m'a apchápeykxo enxoho chá'a.

²³ Máxa taháno ekyawe eyeymáxkoho apagkok sa' etnehek ma'a ekheykha nak apyáp apxagkok. Awasqakkasek sa' ko'o m'a aphamakxa nak. Máxa sa' atnéssesek ma'a ektémól'a láwa kélyaqxaqxól'a ekyennaqte.

²⁴ Sa' kólmakhésha chá'a ekyókxoho aqsok élmomnáwa ekyetnakxa nak chá'a m'a apyáp apnámakkok, tén han ma'a apyókxoho aptawán'ák neptámen nak, tén han ma'a ekyókxoho mók ektémakxa nak chá'a aqsok étkók kélmeykegkaxa, cham'a egheykok nak ekweykekxoho m'a yátegwáxwa.

²⁵ “Kayawheykha sa' láwa kélyaqxaqxamakxa axta ekyennaqte agko' xa ekhem nak; kóllók sa', keñe sa' katyamok, keñe sa' ma'a ekyókxoho aqsok kélmakheyáseykha axta m'a, kalpaqxek sa'.’” Wesse' egegkok ekha nak apyennaqte, apxeyenma xa.