Isaías 16 - Biblia Enxet

Énxet'ák Moab apkelyexánegweykekxa Judá

¹ Kóláphés nepkések apketkók kélmésso naqsa m'a egkexe Sión, apkeleñama m'a meykexa nak énxet tegma apwányam Selá.

² Máxa náta élyegwakto, éxakhál'a aqsa axanák aptamheykegkok apkelyeykheykekxoho wátsam Arnón ma'a énxet'ák apheykha nak Moab.

³ Aptáhak apkeláneya apheykha nak Sión se'e: “Kóllánekxa yaqwánxa kóltéhek yaqwayam hẽlmeyók negko'o, kólteme segmasma negko'o. Hegáhakkas pessesse kélagkok ektáhakxoho yetseksók ekhem, ektémól'a m'a axta'al'a; elmés apkelyexanmomakxa m'a énxet'ák kélnaqleykekxa nak megkatnahakxa apkelókxa. Nágkólpelakkasses aqsa kólának elmakpok ma'a énxet'ák apkelxegányam nak.

⁴ Kólho aqsa elyexanmok kélheykegkaxa m'a énxet'ák apkelxegányam nak Moab. Kólteme apkelyexanmomakxa apmonye'e m'a énxet'ák apmáheyo nak elnápok.” Massegwokmek sa' agkok kélnaqtawáseykegkoho tén han ekyeyk'a sa' ma'a kélmassésseyam nak, apkelántepa sa' apchókxa m'a apkelántaxnegwayam nak aqsa chá'a megkatnahakxa apchókxa,

⁵ xama David aptáwen neptámen sa' etnehek wesse' apwányam, ekyennaqte apteme wesse' apwányam, ektaqmalma apwáxok. Etnehek sa' xama énxet segyekpelchémo meyke aptémakxa, ekha apcháyo, yaqwayam sa' elának ma'a aqsok ekpéwomo, ekmanyehe sa' nahan chá'a elánekxések ektémakxa apheykha m'a énxet'ák.

⁶ Negya'ásegkók ektémakxa nak ekyawe apkeleymákpoho m'a énxet'ák Moab: éleymáxkoho apkelwáxok, apkene etnahágkok néten kéláyo, meleysso eleykpoho' tén han apkelpaqméteykha naqsa ekteme nak mékoho.

⁷ Ékeso éñamakxa peya sa' ellekxagwaha apyókxoho énxet'ák apheykha nak Moab elanok ma'a apchókxa; kalyaqhapmakha sa' apkelwáxok, kaqhek sa' apkelwáxok elanok ma'a énxet'ák apheykha nak Quir-haréset.

⁸ Kelyameygkek anmen yámet kélcheneykekxa m'a yókxexma Hesbón tén han ma'a Sibmá apkelyaqtennéyak axta m'a apkelwesse'e apagkok nak ma'a énxet'ák. Kelweykmek axta aktegák ma'a yókxexma Jazer, sawheykekxók axta m'a yókxexma meykexa nak énxet, kelweykmók axta m'a teyp agko' nak wátsam ekwányam.

⁹ Cháxa keñamak sélekxagweyncha'a nak ko'o sélano m'a anmen yámet kélcheneykekxa nak Sibmá, tén han ma'a Jazer, pallénteyk ahaqtek égmenek sélano m'a Hesbón tén han ma'a Elalé, hakte legáxcheyk kélpáxameykha ekyennaqte kempakhakma m'a neyseksa nak aqsok ekyexna apkeneykekxa m'a énxet'ák tén han ma'a aqsok ekyexna eknakxamáxche nak.

¹⁰ Kamaskok sa' ekpayheykekxa egwáxok tén han negátseykha m'a yókxexma; kamaskok sa' ma'a negwóncháseykha nak ekpayheykekxa egwáxok, tén han ma'a negmeneykmáseykha nak neyseksa anmen yámet kélcheneykekxa, kamaskok sa' nahan kalyaqhapaxchek ma'a anmen yámet ekyexna yaqwayam kalanaxchek ma'a égmenek. Massegwokmek ma'a nélpáxameykha nak negátseykha.

¹¹ Máxa arpa apxát'ák élaktamáxchel'a entáhak ekpexyennama ewáxok sélano m'a Moab tén han ma'a Quir-haréset.

¹² Elmeyekxak sa' eykhe énxet'ák Moab ma'a apkelpeykessamókxa nak chá'a aqsok kéleykmássesso, elmaxneyagkok sa' eykhe ekwokmoho ekmassa apkelyenna, elmeyekxak sa' eykhe elmaxneyagkok ma'a tegma apkelpeykessamókxa nak chá'a mók ektémakxa aqsok apcháyókxa, melwetyehek sa' eyke aqsok.

¹³ Cháxa appeywa axta Wesse' egegkok nano', apxeyenma axta yaqweykenxa etnéssesek ma'a Moab.

¹⁴ Aptáhak kaxwók Wesse' egegkok se'e: “Kólmasséssók sa' ektémakxa nak ekha ekyennaqte Moab ma'a ekwokmo sa' apqántánxo apyeyam, ektémól'a m'a xama énxet kélméssól'a aptamheykha ekweykmoho apqántánxo apyeyam, megkeyxek sa' apxámokma énxet apheykha m'a kañe', apqántawók apagko' sa' eleymakpok, mékoho sa' nahan etnahagkok.”