Isaías 14 - Biblia Enxet

Apkelweykta makham ma'a kélnaqleykekxa axta megkatnahakxa apkelókxa

¹ Yepyóshok sa' elanok Wesse' egegkok ma'a Jacob. Apkelyéseykha sa' etnekxak makham ma'a Israel, yának sa' elhakxak makham israelitas ma'a xapop apagkok nak. Elyepetchegwak sa' nahan ma'a megkatnaha nak apkelókxa xamo', epaxqeykxak sa' ma'a Jacob énxet'ák apagkok.

² Elmok sa' takha' apxámokma apagko' pók aptémakxa énxet'ák ma'a israelitas, elyetlakxak sa' ekweykekxoho m'a apkelókxa, elmok sa' nahan yaqwayam etnéssesagkok apkelásenneykha naqsa m'a israelitas, cham'a Wesse' egegkok nak kañe' xapop apagkok. Elmok sa' israelitas ma'a ektáha axta chá'a apkelma, kóneg sa' etnessásekxak ma'a ektáha axta chá'a apnaqtawáseykegkoho.

Wesse' apwányam Babilonia kélwanyeykha

³ Énxet'ák Israel, apkellókassessek sa' agkok kéxegke kélyampe Wesse' egegkok eñama m'a ektémakxa nak kéllegeykegkoho, tén han ekyentaxnamo kélwáxok tén han kélmésso ekyentaxno agko' kélteme m'a kélásenneykha naqsa,

⁴ kólyetsetek sa' se'e eknaqtáxésamaxche nak amya'a yaqwayam sa' kólwanyaha m'a wesse' apwányam Babilonia: “¡Kóllano ektáhakxa wesse' aplo! ¡Kóllano ektáhakxa ekmassegwokmo m'a apcheymákpoho!

⁵ Apmasséssessek Wesse' egegkok ektémakxa nak apkelyennaqte m'a énxet'ák élmasagcha'a nak apkeltémakxa, apkelekkexchásekxeyk yámet apmeykha nak chá'a m'a wesse' aplo,

⁶ apkellegassáseykegkoho nak chá'a énxet'ák yetlo aplo apkeltekpageykencha'a nak chá'a meyke néxa, apkelteyammeykencha'a nak chá'a énxet'ák yetlo aplo, apmenxeneykencha'a nak chá'a meyke apkelmopyósa apkelányo.

⁷ Sawhékxók kaxwók meyke ektáhakxa apheykha énxet'ák ekyókxoho keso náxop, taqmelákxeyk apheykha, apkelwehéseykha nahan élpayheykxo apkelwáxok.

⁸ Wokmók yámet pinos tén han cedros élaqnéyak nak Líbano élpayheykekxa awáxok kélmasséssekmo exchep, táhak élpaqmeta s'e: ‘Méko sa' kaxwók negko'o hẽlyaqtennek apmassegwokmo nak xép.’

⁹ Yennegkexma s'e kóneg xapop nak nepyeseksa nak ma'a apkeletsapma, apkelántekkek nahan peya emok takha' exchep. Naqxétekhágkek apkelhagák ma'a apkeletsapma axta, apkelanyexakmek xép apyókxoho m'a apkelámha apmonye'e axta keso náxop; apkelchampákxeyk néten apkeltaháno apyókxoho m'a kelwesse'e apkelwányam axta ekyókxoho apheykegkaxa.

¹⁰ Apyókxoho nahan apheyásawók mók apkelpeywa m'a, aptáhak apcháneya s'e: ‘Méko exchepxa entáhak apyennaqte, eghágweykxók negko'o.

¹¹ Keso néxa exchep apcheymákpoho s'e tén han apháxenmo apkelpáwá m'a arpa apagkok. Élchónamaxche kaxwók ma'a apyetnamakxa néten, yápa apketkók nahan ma'a apchaqlamap.’

¹² “¡Apteyekmek xép néten yaw'a apwányam apteyapmól'a amonye' élseye! Kélyenyenteyk xép náxop, apnaqtawáseykegkoho axta chá'a m'a pók aptémakxa énxet'ák.

¹³ Aptéma axta chá'a kalchetmok apwáxok se'e: ‘Wántek sa' ko'o ekweykmoho m'a néten; apekkenwók sa' sektaháno ekyawe ektaqmalma m'a néten nak Dios yaw'a apagkok; axek sa' ko'o m'a makhawók agko' nak nexcheyha, cham'a egkexe eyaqneykekxexa nak ma'a aqsok kéláyókxa.

¹⁴ Wántek sa' ma'a teyp netnók agko' nak ma'a yaphope; atnehek sa' ma'a aptémól'a Dios meyke nak Ekhémo.’

¹⁵ ¡Apteyekmek eyke m'a kañe' apkelmaheykegkaxa nak chá'a apkeletsapma, cham'a kañók agko' nak máxek!

¹⁶ Apchaqneyk nahan chá'a apkelano m'a ektáha nak chá'a apkelwete, aptáhak nahan chá'a apkelpaqmeta neyseksa apkelányo s'e: ‘¿Enxoho énxet apkelyegwakkáseykencha'a axta chá'a énxet'ák ekyókxoho apheykegkaxa xa, apmassesseykmo nak ma'a apkelókxa apheykegkaxa nak chá'a pók aptémakxa énxet'ák,

¹⁷ aptemessáseykekxo nak meyke xama aqsok keso nélwanmégkaxa, apmassesseykmo nak ma'a tegma apkelyawe, mekxeykekxo axta m'a énxet'ák apkelmomap axta?’

¹⁸ Apyókxoho kelwesse'e apkelwányam apkelókxa chá'a apkeletsapmak yetlo kéláyo, yetneyk chá'a takhaxpop apagkok apagko' xama;

¹⁹ keñe exchep kélyenyawa aqsa megkatnahakxa takhaxpop, máxa m'a aqsok ápak kélyamasmal'a megkaleklól'a kélwáxok kóllano', máxa m'a kélhápak élteyammomáxchel'a nepyeseksa m'a énxet'ák aptekyawa, kélyaqténcháséyak la'a apyespa'ák, kélchexakhál'a m'a kañe' máxek ekxámokmakxal'a m'a meteymog.

²⁰ Megkólátawanyek sa' ektéma nak ma'a nápakha kelwesse'e apkelwányam nak, hakte aptawáseykha m'a apchókxa, apkelnapmeyk ma'a énxet'ák apagkok. Megkawegqók sa' chá'a apkelweynchámeykha m'a énxet'ák élmasagcha'a nak apkeltémakxa aptawán'ák neptámen.

²¹ Kóllánekxa sa' kéltáhakxa yaqwayam kólnápekxak kélketchek apkelennay'a eñama ekmaso apkeltémakxa m'a apyapmeyk nak, yaqwayam sa' megkalxének kaxwók apkelwáxok etnahagkok apagkok keso náxop, tén han exámaksek tegma apkelyawe keso nélwanmégkaxa.”

²² Aptáhak Wesse' ekha nak apyennaqte s'e: “Alenmexek sa' ko'o xa énxet'ák nak, amasséssók sa' apkelxénamap ma'a Babilonia, yetlo m'a apkeleymomap nak ma'a kañe', tén han ma'a apketchek ekweykekxoho m'a aptawán'ák nak.

²³ Ekyetnamakxa yelpa' ekmomhápa sa' atnessásekxa' tén han yókxexma apxámokmakxa sawe apkelyawe. Wáxñeksek sa' ma'a kéláxñesso ekmassesseykmoho nak aqsok” Wesse' egegkok ekha nak apyennaqte apxeyenma xa.

Asiria yaqwayam kólmasséssók

²⁴ Naqsók aptáha appeywa Wesse' ekha nak apyennaqte s'e: “Megkatnehek sa' megkalánamáxche m'a sekxeyenma axta ko'o kalanaxche'; aqsok sekmámenyého axta katnehek, katnehek sa'.

²⁵ Amasséssók sa' énxet'ák Asiria m'a seyókxa, alteyammaha sa' ma'a néten meteymog élekhahéyak ahagkok nak. Kamaskok sa' elhakpok énxet'ák ahagkok ma'a apkeltamheykha ekyentaxno apkelmésso nak chá'a m'a, kamaskok sa' apkelpata m'a aqsok ekyentaxno apkelpatmeykencha'a nak chá'a.

²⁶ Cháxa sekxéna nak ko'o alának ekyókxoho keso náxop. Xénchek ewáxok allegássesagkohok ma'a ekyókxoho apheykegkaxa nak chá'a pók aptémakxa énxet.”

²⁷ Apxénchek katnehek Wesse' ekha nak apyennaqte xa, méko nahan kawának kanókasha. Peyk ellegássesagkoho', méko nahan kayaqmagkassessók mók ma'a yaqwánxa etnehek.

Dios apxeyenma ellegássesagkohok filisteos

²⁸ Apxeyenmeyk axta Isaías apyeyam apketsapma axta wesse' apwányam Ahaz se'e amya'a nak:

²⁹ Filisteos, nágkalpayhekxa aqsa kélwáxok kélekkexchesa m'a yámet kéltekyaweykencha'a axta chá'a, hakte sa' kañék katyapok xama yéwa m'a ekteyapmakxa nak chá'a m'a yéwa, katyapok sa' xama yéwa ekwányam ekmowána kampa'.

³⁰ Keytek sa' pa'at yaqwayam elagkok apnaqtósso énxet'ák ahagkok meyke nak aqsok apagkok ma'a yókxexma ahagkok nak, tásek sa' katnehek apkellókasso apkelyampe m'a énxet'ák meyke nak aqsok ma'a apxanák. Keñe sa' ko'o wának emaskok meyk élnapma m'a énxet'ák apagkok, alnáhakkasek sa' nahan ma'a apkeleymomap enxoho apqántawo'.

³¹ ¡Filisteos, kélheykha nak apyókxoho tegma apkelyawe, kallapwomák, kalpayheykha kélatña'ák kóllekxagwaha, kólpexyennem kélaye! Hakte apkelxegakmek énxet apxámokma yaqwayam yempakhak ma'a ekpayho nak nexcheyha, máxa éten ekpánmal'a aptáhak; méko nahan xama enxoho apteyapma neyseksa m'a apkeleyweykekxa nak apkelxega.

³² ¿Háxko sa' kóltéhek kólátegmowagkokxak ektáha nak élápháseykha m'a apchókxa nak? “Dios appekkenma m'a Sión. Sa' elyexánegwakxak chá'a énxet'ák apagkok ekyentaxnamo nak chá'a apheykha m'a”.