Isaías 12 - Biblia Enxet

Negmeneykmasso negmésso ekxeyenma egwáxok Dios

¹ Sa' kóltéhek kólpaqmétek kéxegke xa ekhem nak: “Wesse', ekméssek xép ekpayheykekxa ewáxok, hakte etaqnagkamchek axta eykhe ko'o exchep, massék eyke m'a aplo, egkeyásékxeyk makham meyke ektáhakxa ewáxok.

² Dios apteme chá'a sewagkasso teyp; may'ásseykmok nahan, magwayék nahan. Wesse' egegkok apteme sekyexanmo tén han segkésso sekyennaqte, cha'a apteme sewagkasso teyp ma'a.”

³ Kélwanchek sa' kéxegkáxa kólmahagkok kólyenagkok yegmen yetlo ekpayheykekxa kélwáxok xa ekteyapmakxa nak nélwagkásamáxche teyp,

⁴ keñe sa' kóltéhek se'e: “Kólmés ekxeyenma kélwáxok Wesse' egegkok, kóltennasha apyókxoho énxet'ák apheykha nak keso náxop aqsok apkelane nak, kólya'assásegwakxoho apteme néten ma'a ekyókxoho aqsok.

⁵ Kólmeneykmásses Wesse' egegkok, hakte apkeláneyak ekyawe agko' aqsok ma'a, yaqwayam nak kólya'asagkohok ekyókxoho keso náxop.

⁶ Kólwehesha yetlo ekpayheykekxa kélwáxok, kélheykha nak Sión, hakte apheyk kélnepyeseksa kéxegke m'a Dios Aptaqmalma apagkok nak ma'a Israel, yetlo ekyawe apcheymákpoho.”