Isaías 11 - Biblia Enxet

Jesé aptáwen neptámen apsáyam meyke ektáhakxa negha tén han aptaqmelchessáseykekxa apheykha énxet'ák

¹ Etyapok sa' xama Jesé aptáwen neptámen; máxa sa' etnehek ma'a ektémól'a yámet awhak éltektépeykekxal'a, éltekteyapwayam la'a m'a kepmenák nak.

² Exek sa' chá'a yókxoho ekhem takhapxet ma'a Wesse' Espíritu apagkok, egkések sa' apya'áséyak tén han apmopwána aqsok, apmopwána apkelxekmowáséyak apnámakkok, tén han apyennaqte, tén han apyekpelchémo tén han apkeye m'a Wesse' egegkok.

³ Metnehek sa' nahan apkelyekpelchémo wánxa m'a ektémakxa nak apyókxa énxet, megyeyxók sa' nahan ma'a ektáhakxa enxoho amya'a apkellegeykha apcháneyákpexa etnéssesek.

⁴ Elyekpelkohok sa' chá'a yetlo ekpéwomo apkelánéseykekxa amya'a m'a énxet'ák apkelyelqamákpoho nak, emyókasek sa' nahan chá'a ektémakxa nak apheykha m'a énxet'ák meyke nak aqsok apagkok ma'a apchókxa. Máxa yámet sa' katnehek ma'a appeywa, yaqwayam sa' kallegássesagkohok ma'a énxet'ák apkelyennaqteyáseykha nak apyempe'ék, xama apwátekhapma sa' etnehek elnápok ma'a énxet'ák élmasagcha'a nak apkeltémakxa.

⁵ Exog sa' chá'a yetlo apcháhakkásamap ma'a aptémakxa ekpéwomo tén han ma'a amya'a ekmámnaqsoho nak, ektémól'a m'a nentétamáxchel'a.

⁶ Keñe sa' ma'a aqsok nawha'ák éllo nak kallawha aqsa xamók ma'a nepkések apketkók nak, keñe sa' neptána exnagkohok aqsa xamók ma'a yát'ay apketkók nak, keñe sa' weyke étkók kapaxqaha aqsa m'a méwa, sakcha'a apketchetsék apagko' sa' nahan kólteméssesek apkeláneykha.

⁷ Ekxegexma sa' katnehek weyke m'a óso, keñe sa' ma'a étkók nak kaxnagkohok aqsa xamo' kallókasek élyampé. Katwok sa' pa'at ma'a méwa, ektémól'a m'a weyke.

⁸ Apwanchek sa' enéwak sakcha'a apketchetse' ma'a ekpayhókxa nak máxek axagkok ma'a yéwa ekha nak eyaqtáwa, apwanchek sa' epogwátek ma'a kañe' axagkok nak.

⁹ Méko sa' xama enxoho kalának ekmaso ekyókxoho m'a egkexe ekpagkanamaxchexa ahagkok nak, hakte kasawhekxohok sa' apya'áséyak Wesse' egegkok ma'a ekyókxoho nak apchókxa, sa' katnehek ma'a ektémól'a ekláneyo yegmen ma'a wátsam ekwányam.

¹⁰ Kólhések sa' néten kólteméssesek aqsok magkenatchesso apagkok énxet'ák Jesé aptáwen neptámen xa ekhem nak; cham'a aphémo nak yámet éltektépeykekxa m'a kepmenák, elyo'ókxak sa' chá'a ektamok ma'a apyókxoho énxet'ák keso náxop, keñe sa' ma'a aphakxa nak katnehek ektaqmalma agko'.

Énxet'ák kélnaqleykekxa axta megkatnahakxa apkelókxa apkelweykta makham

¹¹ Exekmósek sa' makham apmopwána Wesse' egegkok apmako sa' enaqlanták makham énxet'ák apagkok apkeleymomap xa ekhem nak, apnaqlósawákxo sa' makham ma'a Asiria, Egipto, Patros, Etiopía, Elam, Sinar, Hamat tén han ma'a apkelókxa ekhéyak nak neyáwa wátsam ekwányam.

¹² Ekxenchesek sa' néten aqsok magkenatchesso yaqwayam sa' elwetak ma'a pók aptémakxa nak chá'a énxet'ák, yánchásekxak sa' makham ma'a israelitas kélnaqleykekxa axta megkatnahakxa apkelókxa; yánchásekxak sa' makham ma'a apkelmahéyak axta ekyókxoho yókxexma cham'a énxet'ák Judá apkexpánma axta.

¹³ Kamaskok sa' ektémakxa nak apkelyásekkesso m'a Efraín énxet'ák, kamaskok sa' nahan apkello m'a énxet'ák Judá, melyásekkesek sa' chá'a kaxwók Efraín énxet'ák ma'a Judá énxet'ák nak, megkaxének sa' nahan kaxwók apwáxok eltaqnawák Judá énxet'ák ma'a Efraín énxet'ák apagkok nak.

¹⁴ Épetchekxak sa' pók ektamagkok ma'a énxet'ák filisteos, ekpayho nak taxnegwánxa ekhem, neptámen sa' yeñék yáhapwók; épetchekxak sa' pók elyementamagkok aqsok apagkok ekxámokma m'a énxet'ák apheykha nak teyapmakxa ekhem. Kawomhok sa' nahan apteme apagkok ma'a yókxexma Edom tén han ma'a Moab, apkeláneykha sa' etnahagkok ma'a amonitas.

¹⁵ Emeykessesek sa' xama ámay Wesse' egegkok ma'a neyseksa Wátsam Ekwányam Ekyexwase nak, ey'aksek sa' apmek ma'a ekpayho nak wátsam Éufrates, etekkesek sa' éxchahayam ekyennaqte agko', kameykásekxak sa' neyseksa, siete aktegák sa' kalána', keñe sa' apwanchek elyeykhekxak meyke apkelhaxyawasso apkeltéto apmagkok.

¹⁶ Apkelchexyekmek sa' agkok makham apkelenyékta' Asiria xa apkeleymomap nak Wesse' egegkok énxet'ák apagkok, elwetak sa' ekyawe agko' ámay, ektéma axta m'a énxet'ák Israel apkelánteyapma axta m'a Egipto.