Isaías 10 - Biblia Enxet

¹ ¡Kéxegke laye, kélpekkenma nak segánamakxa megkapéwomo, tén han kélpenchesso nak kéllegasso m'a kéltémókxa nak chá'a etnahagkok énxet'ák ekyentaxno agko' nak,

² megkóltaqmelchessáseykekxa nak apheykha m'a énxet'ák apkelyelqamákpoho nak, tén han megkóllányo nak ektémakxa apheykha m'a énxet'ák ahagkok meyke nak aqsok apagkok, kélnaqtawáseykegkoho nak chá'a m'a xentampe'e nak, tén han kélmenyexcháseyak nak chá'a aqsok agkok ma'a élyeheykha nak!

³ ¿Háxko sa' kóltéhek kéxegke apkelyetsetchásekxo sa' kéltémakxa m'a Dios, kélwet'a sa' kaxegmak makhawók ma'a kéllegeykegkoho nak? ¿Yaqsa sa' kólyo'ókxak kólmaxnegwakxak yaqwayam kapasmok? ¿Háxko sa' kólnegkenwók ma'a aqsok kélagkok ekxámokma élmomnáwa nak?

⁴ Sa' agkok kéxegke kólháxahagkok nepyeseksa m'a apkelmomap nak tén han ma'a aptekyawa axta neyseksa kempakhakma, kóletsaphok sa' xamo'. Makke kamassak makham aplo m'a Wesse' egegkok; xénchek makham apwáxok ellegássesagkoho'.

Dios apchásenneykekxa énxet'ák Asiria yaqwayam ellegássesagkohok énxet'ák

⁵ “¡Wesse' apwányam Asiria! Cha'a apteme yámet seklo nak ko'o m'a séllegassáseykegkoho nak chá'a, yámet sekmeykha nak chá'a m'a seklawa enxoho.

⁶ Eyáphássek ko'o ektamagkok ma'a apheykegkaxa nak énxet'ák megyáyo nak Dios, xama apheykegkaxa selókassamo nak chá'a ko'o, yaqwayam sa' elmenyexchesagkok tén han elyementamagkok ma'a aqsok apagkok ekxámokma élmomnáwa nak, yaqwayam sa' elteyammaha etnéssesek ma'a ektémól'a ólteyammaha yelpa' m'a ámay.

⁷ Makke katnahak élchetamso apwáxok wesse' apwányam Asiria xa ektáha nak, háwe nahan apmakókxa etnehek xa. Xénchek aqsa apwáxok emasséssók tén han esawhohok apxámokma apagko' ma'a énxet.

⁸ Aptáhak appeywa s'e: ‘Apyókxoho kelwesse'e apkelwányam apteme apkelámha apmonye'e ahagkok ko'o.

⁹ Aphawók ko'o pók sélányo m'a tegma apkelyawe nak, cham'a Calnó tén han ma'a Carquemis, keñe tegma apwányam Hamat aphawo nahan ma'a Arpad, keñe tegma apwányam Samaria aphawo nahan ma'a Damasco.

¹⁰ Élwetágweykmek ko'o m'a énxet'ák ekxámokma nak aqsok apcháyókxa, apyeykhásseykmók ma'a ektémakxa nak ekxámokma aqsok apcháyókxa m'a énxet'ák apheykha nak Jerusalén tén han ma'a Samaria.

¹¹ ¿Mowancheya ko'o atnéssesek énxet'ák Jerusalén yetlo aqsok apcháyókxa m'a sekteméssesakxa axta m'a énxet'ák Samaria yetlo m'a aqsok apcháyókxa nak?’”

¹² Appenchessek sa' agkok Wesse' egegkok ekyókxoho aqsok apmáheyo nak elának ma'a egkexe Sión tén han ma'a Jerusalén, eñássesagkohok sa' ma'a wesse' apwányam Asiria eñama eyaqheykha apwáxok se'e aptamheykha nak, tén han eñama megyésso yeykpoho', tén han eyeymáxkoho apwáxok.

¹³ Hakte axta aptáhak appeywa wesse' apwányam Asiria s'e: “Sekwasqapma ahagko' ko'o keñamak sélana xa; ewanchek ko'o aqsok, séláneykekxa ahagko' ma'a yaqwánxa atnehek. Ekyementegkek nekha xapop apagkok ma'a énxet'ák, élmeyk ma'a aqsok apagkok ekxámokma élmomnáwa nak, máxa xama énxet apyennaqtél'a ektemék sekmassesseykmo m'a kelwesse'e apkelwányam nak.

¹⁴ Élmeyk ko'o aqsok apagkok ekxámokma nak ma'a énxet'ák, ahagkok ektáhak ma'a ekyókxoho xapop, máxa m'a énxet apkellexchágwayam la'a náta axagkok elmok ma'a appok neyseksa megkótéyák, méko axta xama enxoho élyeykáseykha axempenák, méko axta xama enxoho ekmayheykha tén han ekpayheykha átog.”

¹⁵ ¿Awancheya kaxénmakha ekyeykhásseykmoho póte m'a ektáha nak chá'a apmeykha? ¿Awancheya nahan kaxénmakha ekyennaqte nápaqtók ektáha nak chá'a apmeykha apkelyepto yámet ma'a hó neym épakyek ekyawe nak? ¿Háxko katnehek kaxog kéltasqapeykha, ekteme nak aqsa wánxa yámet, mexña enxoho m'a énxet ektáha nak apseykha?

¹⁶ Cháxa keñamak peya nak etnessásekxak meyke apkelwasqapma Wesse' ekha nak apyennaqte xa énxet'ák élyenneykha agko' nak apyempe'ék, elméxenchessesek sa' apyempe'ék máxa táxa élwatno sa' etnéssesek.

¹⁷ Etnekxak sa' táxa eyáléwe m'a Dios aptaqmalma, apkelsássessóxma nak chá'a m'a Israel, xama ekhem agko' sa' nahan elwatnek tén han emasséssók ekyókxoho m'a yámet ekha nak am'ák tén han ma'a ekmompánaqma ekyetnama nak ma'a apchókxa.

¹⁸ Emasséssessók sa' ekyókxoho agko' ma'a naxma apagkok éltaqmalma nak tén han ma'a aqsok apkeneykekxa nak chá'a. Máxa xama énxet apháxamáp sa' etnéssesek, ekmassél'a apyennaqte.

¹⁹ Ántawók agko' sa' nahan kaleymaxchek yenta'a m'a naxma, kawomhok sa' nahan sakcha'a apmopwána eyaqtennek.

²⁰ Kamaskok sa' etnehek apkeláyo ektáha nak apmassésseyam, apkeleymomap nak apqántawók kañe' Israel xa ekhem nak, cham'a Jacob énxet'ák apagkok meletsapma nak, Wesse' egegkok sa' aqsa elyennaqtések apteme apkeláyo, cham'a Dios aptaqmalma apagko' nak ma'a Israel.

²¹ Etnekxak sa' makham melya'ásseyam Dios ekha nak apmopwána apkeleymomap nak apqántawók ma'a Jacob énxet'ák apagkok.

²² Apxámok sa' eykhe etnehek xép, énxet'ák apagkok, Israel, ektémól'a m'a wátsam xóp ekxámokmal'a, apqántawók sa' eyke elwata'. Xénáxcheyk kólmasséssók, kólteméssesek sa' ma'a ekpayhawo nak kólteméssesek.

²³ Hakte apxénchek emasséssók aqsok ma'a Wesse' ekha nak apyennaqte, kalanaxchek sa' nahan ma'a ekyókxoho kañe' apchókxa.

²⁴ Aptáhak Wesse' ekha nak apyennaqte s'e: “Énxet'ák ahagkok, kélheykha nak Sión, nágkóle aqsa énxet'ák Asiria, eltekpogmakha sa' eykhe yámet apagkok, elya'asha sa' eykhe néten yámet elenmexek kéxegke, ekhawo apteméssessamakxa axta m'a egipcios,

²⁵ kaxwók sa' eyke ko'o allegássesagkohok ma'a, kasawhohok sa' kamasséssók ma'a seklo nak.

²⁶ Ellegássesagkohok sa' ma'a Wesse' ekha nak apyennaqte, ekhawo apteméssesakxa axta apmenxena m'a énxet'ák Madián, cham'a Oreb meteymog nak, exekmósek sa' nahan apmopwána yenmexek ma'a énxet'ák Asiria, ekhawo aptémakxa axta apxekmóssama apmopwána apkelenmexma m'a énxet'ák Egipto.

²⁷ Kólhaxyawássesek sa' kélpata ekyentaxno kélpatmeykencha'a nak chá'a xa ekhem nak, kólekkexekxak sa' ma'a aqsok ekyentaxno élyaqhapma nak chá'a.” Apkelpéwók apkelxegakmo énxet'ák Asiria m'a ekpayho nak Rimón,

Énxet'ák Asiria apkelxegayam

²⁸ apkelwa'a m'a yókxexma Aiat, apkelyeykhágwa'ak ma'a Migrón, apkexakhagwa'ak apkelseykha m'a Micmás,

²⁹ apkelyeykhákxeyk ma'a ekyapwate apkelyeykheykekxexa nak chá'a énxet'ák, apkelhakmek sekxók ma'a yókxexma Gueba; kelyegweyxcheyk ma'a Ramá, kenyaháxcheyk ma'a Guibea Saúl tegma apwányam apagkok nak.

³⁰ ¡Kólpáxamha ekyennaqte kélheykha nak Bat-galim! ¡Kóleyxho kélheykha nak yókxexma Laisa! ¡Kólátegmowák, énxet'ák kélheykha nak Anatot!

³¹ Apkenyahágkek ma'a énxet'ák Matmená, apkelyexanmeyk ma'a énxet'ák apheykha nak Guebim.

³² Sakhem agko' apchaqnágwa'a énxet'ák apkelántaxnegwayam nak aqsa chá'a megkatnahakxa apchókxa m'a yókxexma Nob; apkelyaqyeyáseyha apmék apmako ektamagkok ma'a egkexe Sión, meteymog étseksek nak ma'a Jerusalén.

³³ Kóllano, apkelyaqnenchásegkek yenta'a élyawe yetlo apyennaqtésso apyempehek ma'a Wesse' ekha nak apyennaqte; apkelyaqtennákxók ma'a élwenaqte agko' nak, hagwa'akteyk náxop ma'a élweykmoho nak netnók agko' ma'a naw'ék.

³⁴ Póte apmáha apkelyaqtenna m'a naxma ekyentaxno nak, apkelyaqnegkásegkek náxop ma'a yenta'a éltaqmalma agko' nak ma'a Líbano.