Isaías 1 - Biblia Enxet

Judá, apheykegkaxa nak énxet'ák melya'assáxma

¹ Aqsok apwete axta m'a Isaías, eñama kélxekmósso, ektémakxa axta m'a tegma apwányam Judá tén han ma'a Jerusalén, cham'a Amós apketche nak, neyseksa aptamhéyak axta kelwesse'e apkelwányam Judá m'a Ozías, Jotam, Ahaz, tén han ma'a Ezequías.

² Néten tén han náxop, kóleyxho aptáhakxa nak appeywa Wesse' egegkok: “Éktegkessegkek ko'o kélketchek ekwokmoho aptamhágko apkelwányam, keñe sénmexeykekxo.

³ Keykpelkohok ótep ma'a weyke, kay'asagkohok nahan aphaxta apagkok ótep ma'a yámelyeheykok, keñe m'a Israel, énxet'ák ahagkok ahagko' nak melyekpelchehe', méko nahan apkelya'áseyak.”

⁴ ¡Énxet'ák melya'assáxma laye, ekyentaxno nak apkeltémakxa ekmaso, énxet'ák élmasagcha'a nak apkeltémakxa aptawán'ák neptámen, énxet'ák apkeláneykegkoho nak aqsok ekmaso! Kélyamasmeyk ma'a Wesse' egegkok, kélyetnakhassegkek ma'a Dios Aptaqmalma apagkok nak ma'a Israel, kélpekkeneykekxeyk kélnentámen.

⁵ Kélmenyeyk aqsa kéxegke kóltéhek sélenmexeykha, méko kaxwók yaqwánxa enxoho anlegássesagkohok ma'a kélyókxa. Sawheykekxók élyense m'a kélpátek, massegkek nahan kélyennaqte.

⁶ Méko ektaqmelakxa enxoho ekyókxoho kélyempe'ék kéxegke; élyense ekyókxoho, éma heykegkok kéltekpageykha, keltepelchamaxche'; méko nahan élánéssama, méko nahan élpextehetchessama, megkóltexnassáseykegkok nahan ma'a pánaqte néltexnémáxche yaqwayam enxoho kamasséssesek ekmáske.

⁷ Yókxexma ekmaso kéltemessáseykekxak ma'a kélókxa, kelwatnegkek táxa eyáléwe m'a tegma apkelyawe nak. Kélnápaqta'awók nahan apteykegkok kéxegke kélenmexma m'a aqsok kélcheneykekxa nak. Meyke xama aqsok tamhákxak ma'a ekyókxoho nak, máxa m'a ektéma axta kélmassesseykmo m'a Sodoma.

⁸ Sión aqsa kéméxche', máxa kélpakxanmal'a entemék ekyetnama axakkók ma'a neyseksa nak anmen yámet kélcheneykekxa, máxa tegma kélpakxanmal'a aqsa néten meyke kóneg entemék ekyetnama axakkók ma'a nepyeseksa nak yánsamáne kélcheneykekxa, máxa tegma apwányam apwakhél'a apkelenmexma entemék ekyetnama axakko'.

⁹ Axta agkok negko'o hẽleykmok egqántawók ma'a Wesse' ekha nak apyennaqte, aghágwakxohok axta m'a ektémakxa axta énxet'ák apheykha axta m'a tegma apwányam Sodoma tén han ma'a Gomorra.

Ekmámnaqsoho nélpeykessamo Dios

¹⁰ Kélámha kélmonye'e nak Sodoma, kóleyxho Wesse' egegkok appeywa; énxet'ák Gomorra, kóltaqmelchesho kóleyxhok apmako nak elxekmósek ma'a Dios egagkok.

¹¹ Aptáhak Wesse' egegkok se'e: “¿Yaqsa ektáha sélsántegkesa nak ekxámokma kélnaqtósso kélnapma? Élekleykmek ko'o m'a nepkések apkelennay'a nak kélwatno tén han ma'a weyke étkók pexmok agkok nak; ektaqnawágweykmek ko'o m'a weyke kelennay'a nak éma agkok tén han ma'a nepkések apkelennay'a nak tén han ma'a yát'ay apketkók nak éma apagkok.

¹² Hélyo'óták chá'a ko'o kéxegke. ¿Yaqsa eyke éltémo kólántaxnegwaták chá'a kañe' tegma apwáxok ahagkok yetlo megkóltaqmelchesso?

¹³ Náhélsantagkas chá'a kaxwók aqsok yaqwayam nak chá'a hélmések ma'a aqsok mékoho nak; mowanchek ko'o atekhánek kaxwók éten agkok ma'a. Kóláneyha chá'a kéxegke énxet'ák elánegwaták kélessawássessamo nak pelten apketkok tén han ma'a sábado, mowanchek eyke ko'o alanha aqsa apkeláneyak apkelsawássessamo m'a énxet'ák, apkeláneykegkoho nak aqsok ekmaso.

¹⁴ Ataqnawhok ko'o m'a kélessawássessamo nak chá'a pelten apketkok tén han ma'a kélaqneykekxexa nak chá'a; ¡aqsok ekyentaxnéssamo ewáxok tamheykekxa', eyampóssegke'!

¹⁵ Kélya'ássek agkok chá'a kéxegke kélmék néten kóltéhek nempeywa nélmaxnagko, malanók chá'a ko'o kéxegke; kólxámaksohok eykhe nahan kélteme nempeywa nélmaxnagko, mañék eyke ko'o. Keltexnémáxcheyk éma kélmék ekyetno kélyógkexma.

¹⁶ ¡Kólyenyesák kélyempe'ék, kólmópesaxchekxa'! ¡Maltamhók ko'o kaxwók ótak ma'a kéltémakxa élmasagcha'a nak! ¡Kólwátésák kéllánéyak aqsok ekmaso!

¹⁷ ¡Kóltámesaxche kéllánéyak aqsok ektaqmela, kólwasqápekxoho kóllának ma'a aqsok ekpéwomo nak, kólpásem ma'a énxet'ák kélnaqtawáseykegkoho nak, kóltaqmelchessásekxa ekheykha m'a élyeheykha nak, kólmeyókas nahan ektémakxa nak chá'a ekha m'a kelán'a tampe nak!”

¹⁸ Aptáhak Wesse' egegkok se'e: “Kólchexyem, ólpaqmétek sa' anxének se'e aqsok nak. Ekyexwase agko' eykhe tamhákxak ma'a kéltémakxa nak megkólya'assáxma, ekmope sa' eyke ko'o atnessásekxa' ektémól'a m'a yeyam appok la'a; máxa apáwa kéltamheykekxal'a hómáyok sa' eykhe katnehek, ekmope sa' eyke ko'o atnessásekxa', ektémól'a m'a nepkések apwa'.

¹⁹ Leyawók sa' agkok kélwáxok kóltéhek ekha kélyeheykekxoho, kóltawagkok sa' aqsok ekyexna éltaqmalma ektekkesso nak xapop;

²⁰ kéllenxanmégkók sa' agkok kélmámenyého kóltéhek élyennaqte kélwáxok, kóletsapok sa' neyseksa kempakhakma.” Wesse' egegkok apagko' apxeyenma xa.

Wesse' egegkok yaqwayam yáxñásekxak Jerusalén

²¹ ¡Aphágweykxók kelán'a ekyaqmagkáseyak pók énxet ekma nak chá'a ekyánmaga ekpathetéyak ma'a tegma apwányam meyenseyam nak Wesse' egegkok! Tásek axta chá'a katnehek aqsok apkelánéyák apyókxoho énxet'ák apheykha nak ma'a, cham'a nanók axta, kapéwhok axta chá'a, keñe kaxwók aptamhágko tekyawa yapmeyk.

²² Kélhawók axta kéxegke m'a sawo ekmope ekmomnáwa, keñe kéltemessásexchekxoho kélagko' ekho aqsok apák kélchexakha, kélhawók axta m'a vino ektaqmalma, keñe kéltemessásexchekxoho kélagko' ekho yegmen.

²³ Élyennaqte apkelwáxok ma'a kelwesse'e apkelwányam kélagkok nak, énxet'ák élmasagcha'a apkeltémakxa nahan ma'a apkelxegexma'a. Meltaqheksók nahan elxawagkok selyaqye m'a apyókxoho nak, etegyagkok nahan yaqwayam nak kólmésagkok aqsa chá'a m'a aqsok kelméyáséyak naqsa nak. Meltaqmelchessásekxeyk ekheykha m'a élyeheykha nak, megkalyetnakhaksók nahan apkelwáxok ektémakxa nak ekheykha m'a kelán'a xentampe'e nak.

²⁴ Cháxa keñamak Wesse' ekha nak apyennaqte, Apyennaqte apagko' nak ma'a Israel, aptáha appeywa s'e: “¡Wánxa kólteme! Allegássesagkohok sa' ko'o m'a sélenmexma nak. Ayaqmagkásekxak sa' mók ma'a apkeltémakxa nak.

²⁵ Añássesagkohok sa' ko'o makham wanmexek xép, alwatnések sa' ekyókxoho aqsok apák apagkok; amópessásekxak sa' ekyókxoho ekmanyása apyempehek.

²⁶ Wának sa' exnekxak makham énxet'ák segyekpelchémo apagkok, ektéma axta m'a nanók axta, tén han ma'a appékessáseyak nak chá'a apnámakkok, ektéma axta m'a sekxók axta. Ekpenchessek sa' agkok ko'o sekteméssesso xa, kóltemessásekxak sa' makham apwesey ‘Tegma apwányam ekyetnamakxa sẽltaqmelchessáseykekxa negha’, Tegma apwányam magyenseyam ‘Wesse' egegkok’

²⁷ Alwagkasek sa' ko'o teyp énxet'ák apheykha nak Sión sey'eykekta nak ko'o yetlo ekpéwomo sélánéseykekxa apheykha;

²⁸ alyaqtennagkok sa' eyke m'a élyennaqte nak apkelwáxok tén han ma'a melya'assáxma nak, eletsapok sa' ma'a seyamasma nak.

²⁹ Kalmegqaksek sa' kéxegke xa yámet élyawe nak tén han ma'a kélcheneykekxexa nak pánaqte exnók, eyaqheykencha'a agko' nak chá'a kélwáxok, cham'a kélpeykessamókxa nak chá'a m'a aqsok kéláyókxa.

³⁰ Kólxohok sa' kéxegke m'a yámet ekyawe élyamayél'a áwa', kólxohok sa' ma'a ektémól'a kélcheneykekxexa pánaqte exnók, meykel'a yegmen.

³¹ Pa'at apák sa' etnekxak ma'a énxet apyennaqte nak, keñe sa' ma'a aqsok apkelane nak katnekxak táxa éllo: káléwhok sa' nahan xamók xa ánet nak, méko sa' nahan xama enxoho kaspanchesek.”